Text - आकाशवाणी छत्रपती संभाजीनगर – दिनांक 06.07.2025 रोजीचे सकाळी 07.10 वाजेचे मराठी बातमीपत्र

 Regional Marathi Text Bulletin, Chhatrapati Sambhajinagar

Date – 06 July 2025

Time 7.10 AM to 7.20 AM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ०६ जुलै २०२५ सकाळी ७.१० मि.

****

·      आषाढी एकादशीचा राज्यभरात उत्साह, मुख्यमंत्र्यांच्या हस्ते श्री विठ्ठल रुक्मिणीची शासकीय महापूजा

·      राज्यावरची संकटं दूर करण्याची शक्ती देण्याचं मुख्यमंत्र्यांचं पांडुरंगाकडे साकडं

·      मराठी आणि मराठी माणूस यावर तडजोड नाही-राज ठाकरे तसंच उद्धव ठाकरे यांची स्पष्टोक्ती

·      बीड लैंगिक अत्याचार प्रकरणातले सर्व सीडीआर तपासण्याची राज्य महिला आयोगाची ग्वाही

आणि

·      सुपर युनायटेड रॅपिड अँड ब्लिट्झ बुद्धिबळ स्पर्धेत भारताचा डी. गुकेश अजिंक्य

****

आषाढी एकादशीचा सोहळा आज सर्वत्र भक्तिभावाने साजरा होत आहे. एकादशीचा मुख्य सोहळा पंढरपूर इथं साजरा होत आहे. आज पहाटे मुख्यमंत्री देवेंद्र फडणवीस आणि त्यांच्या सुविद्य पत्नी अमृता फडणवीस यांच्या हस्ते श्री विठ्ठल रुक्मिणीची शासकीय महापूजा करण्यात आली. यावेळी नाशिक जिल्ह्याच्या नांदगाव तालुक्यातल्या जातेगाव इथले कैलास उगले आणि कल्पना उगले यांना मानाचे वारकरी म्हणून मुख्यमंत्र्यांसह महापूजेत सहभागी होण्याची संधी मिळाली. महापूजेनंतर मुख्यमंत्र्यांच्या हस्ते मानाच्या वारकरी दाम्पत्याचा सत्कार करण्यात आला.

पांडुरंगाने राज्यावरची संकटं दूर करण्याची शक्ती द्यावी, सन्मार्गाने चालण्याची सुबुद्धी द्यावी, बळीराजाला सुखी समाधानी करण्याकरता आशीर्वाद द्यावा, असं साकडं घातल्याचं मुख्यमंत्र्यांनी सांगितलं. ते म्हणाले,

बाईट – मुख्यमंत्री देवेंद्र फडणवीस

****

यंदाच्या आषाढी वारीसाठी पंढरपुरात वीस लाख भाविक दाखल झाल्याचा प्रशासनाचा अंदाज आहे. विठ्ठल मंदिर तसंच चंद्रभागा परिसर वारकऱ्यांच्या गर्दीनं फुलून गेला असून, मंदिरामध्ये फुलांची आकर्षक सजावट करण्यात आली आहे. दर्शनासाठी आलेल्या भाविकांच्या व्यवस्थेसाठी गोपाळपूर हद्दीत मंदिर समितीने सर्व सुविधायुक्त दोन जर्मन हँगर अर्थात भव्य सभामंडपं उभारले असल्याची माहिती जिल्हाधिकारी कुमार आशीर्वाद यांनी दिली. पंढरपूर शहरात पालिकेनं स्वच्छतेसाठी एक हजार ६५० कर्मचारी नियुक्त केल्याचं याबाबतच्या वृत्तात म्हटलं आहे.

****

दरम्यान, मुख्यमंत्र्यांच्या हस्ते काल पंढरपूर इथं कृषी पंढरी या शेती प्रदर्शनाचं उद्घाटन झालं. शेतकऱ्यांचा उत्पादन खर्च कमी करून उत्पादकता वाढवण्यासाठी राज्य सरकार प्रयत्नरत असल्याचं प्रतिपादन मुख्यमंत्र्यांनी केलं. ते म्हणाले...

बाईट – मुख्यमंत्री देवेंद्र फडणवीस

दरम्यान, मुख्यमंत्र्यांनी काल वाखरी इथं संत श्री ज्ञानेश्वर महाराजांच्या पालखीचं दर्शन घेतलं. पालखी खांद्यावर घेऊन दिंडी सोहळ्यातही त्यांनी सहभाग घेतला. पालखी प्रमुख विश्वस्त योगी निरंजन नाथ यांनी मुख्यमंत्र्यांचं माऊलींची प्रतिमा देऊन स्वागत केलं. मुख्यमंत्र्यांच्या प्रमुख उपस्थितीत निर्मल दिंडी, चरण सेवा उपक्रम तसंच आरोग्य वारीचा काल समारोप झाला.

****

राज्यात ठिकठिकाणच्या विठ्ठल मंदिरांमध्ये भाविकांनी दर्शनासाठी मोठी गर्दी केली आहे. छत्रपती संभाजीनगर नजिक पंढरपूरकडे पायी जाणाऱ्या भाविकांसह दिंड्या तसंच पालख्यांनी शहरातले रस्ते फुलून गेले आहेत. छत्रपती संभाजीनगर, परभणी, अहिल्यानगरसह राज्यभरात अनेक शैक्षणिक संस्थांमधून निघालेल्या बाल वारकऱ्यांच्या दिंड्यांनी स्थानिकांचं लक्ष वेधून घेतलं. विविध संस्था संघटनांच्या वतीनं अभंग तसंच भक्तीगीत गायनाचे कार्यक्रमही आयोजित करण्यात आले आहेत.

परभणी विभागातून आषाढी वारीसाठी एस.टी.तर्फे येत्या ११ जुलै पर्यंत अतिरिक्त विशेष २१० बस गाड्या सोडण्यात आल्या आहेत. एखाद्या आगारात प्रवाशांची गर्दी पाहता जादा बस सोडण्याचा निर्णयही आगार प्रमुख घेणार आहेत.

दरम्यान, उपवासाच्या काळात भगरीचं सेवन करतांना, नागरिकांनी योग्य काळजी घेण्याचं आवाहन बीड जिल्हा आपत्ती व्यवस्थापन विभागाचे मुख्य कार्यकारी अधिकारी तथा निवासी उपजिल्हाधिकारी शिवकुमार स्वामी यांनी केलं आहे.

****

मुख्यमंत्री माझी लाडकी बहीण योजनेतल्या सर्व पात्र लाभार्थ्यांना जून महिन्याचा सन्मान निधी वितरित करण्याची तांत्रिक प्रक्रिया सुरू करण्यात आली आहे. महिला आणि बालविकास मंत्री आदिती तटकरे यांनी सामाजिक माध्यमावरील आपल्या संदेशाद्वारे ही माहिती दिली. पात्र लाभार्थ्यांच्या 'आधार' सलग्न बँक खात्यात कालपासून हा सन्मान निधी जमा होण्यास प्रारंभ झाला.

****

मराठी भाषा आणि मराठी माणूस यावर कदापिही तडजोड होणार नाही, मराठीसाठीची एकजूट कायम राहावी, असं आवाहन, महाराष्ट्र नवनिर्माण सेनेचे अध्यक्ष राज ठाकरे तसंच शिवसेना उद्धव बाळासाहेब ठाकरे पक्षाचे प्रमुख माजी मुख्यमंत्री उद्धव ठाकरे यांनी केलं आहे. काल मुंबईत वरळी इथं झालेल्या मेळाव्यात ते बोलत होते. दोन्ही नेत्यांच्या या मेळाव्यातल्या भाषणाचा हा संपादित अंश...

बाईट – राज ठाकरे, अध्यक्ष, महाराष्ट्र नवनिर्माण सेना आणि

उद्धव ठाकरे, प्रमुख, शिवसेना उद्धव बाळासाहेब ठाकरे पक्ष

****

विविध आव्हानात्मक परिस्थितींचा सामना करतांना प्रत्येक नवीन विषयाचा विद्यार्थी या नात्याने प्रांजळपणे अभ्यास करण्याची गरज, सरन्यायाधीश भूषण गवई यांनी व्यक्त केली. काल मुंबईत मुंबई उच्च न्यायालयाच्या वतीने सरन्यायाधीशांचा गौरव करण्यात आला, या सत्काराला ते उत्तर देत होते. मुंबई उच्च न्यायालयाचे मुख्य न्यायमूर्ती आलोक आराधे यांच्यासह अनेक मान्यवर यावेळी उपस्थित होते. सरन्यायाधीश भूषण गवई यांच्या हस्ते उच्च न्यायालयातील लाईव्ह स्ट्रीमिंग प्रणालीचं उद्घाटन करण्यात आलं.

मुंबईत शासकीय विधी महाविद्यालयात भारतरत्न डॉ. बाबासाहेब आंबेडकर यांच्या अध्यापन कारकीर्दीला ९० वर्षे पूर्ण झाल्यानिमित्त स्मृतीपटलाचं अनावरण काल सरन्यायाधीशांच्या हस्ते करण्यात आलं. बाबासाहेबांची अध्यापन कारकीर्द मोलाची आणि प्रेरणादायी असल्याचं प्रतिपादन सरन्यायाधीशांनी यावेळी केलं.

****

लातूर जिल्ह्याच्या अहमदपूर तालुक्यातल्या हाडोळती इथले शेतकरी अंबादास पवार यांची काल सहकार मंत्री बाबासाहेब पाटील यांनी भेट घेतली, पाटील यांनी पवार यांच्या पीककर्जाचा संबंधित बँकेकडे भरणा केला.

****

बीड इथल्या लैंगिक अत्याचार प्रकरणातले सर्व सीडीआर दूरध्वनीवरील संभाषण ध्वनिमुद्रण तपासलं जाणार असल्याचं, राज्य महिला आयोगाच्या अध्यक्षा रूपाली चाकणकर यांनी म्हटलं आहे. काल बीड इथं यासंदर्भातल्या आढावा बैठकीत त्या बोलत होत्या. या प्रकरणात इतर विद्यार्थिनींना देखील अशा पद्धतीच्या कृत्याचा सामना करावा लागला असेल तर तक्रारी करण्याचं आवाहन, त्यांनी केलं. तपास पूर्ण होत आल्यावर सविस्तर माहिती दिली जाईल, असंही चाकणकर यांनी सांगितलं.

****

माजी मंत्री अशोकराव पाटील डोणगावकर यांचं काल छत्रपती संभाजीनगर इथं निधन झालं, ते ८१ वर्षांचे होते. पाटील यांनी गंगापूर-खुलताबाद मतदारसंघाचं विधानसभेत प्रतिनिधित्व केलं होतं. डोणगावचे सरपंच, जिल्हा परिषद सदस्य, तसंच जिल्हा बँकेचे संचालक म्हणून काम पाहिलेले डोणगावकर यांनी, माजी मुख्यमंत्री मनोहर जोशी यांच्या मंत्रिमंडळात राज्यमंत्री म्हणून जबाबदारी सांभाळली होती. पाटील यांच्या पार्थिव देहावर आज डोणगाव इथं अंत्यसंस्कार होणार आहेत.

****

क्रोएशिया इथं सुरू असलेल्या सुपर युनायटेड रॅपिड अँड ब्लिट्झ बुद्धिबळ स्पर्धेत भारताच्या डी. गुकेशनं विजेतेपद पटकावलं आहे. अंतिम फेरीत त्याने अमेरिकेच्या वेस्ली सो चा पराभव केला. १८ पैकी १४ गुण मिळवून गुकेशनं रॅपिड फॉरमॅट मध्ये पहिलं स्थान पटकावलं. पोलंडचा जॉन दुडा दुसऱ्या स्थानावर असून माजी विश्वविजेता, मॅग्नस कार्लसन तिसऱ्या स्थानावर आहे. भारताचा प्रज्ञानंद या स्पर्धेत संयुक्तपणे चौथ्या स्थानावर राहिला.

****

जॉर्जियातल्या बटुमी इथं आजपासून बुद्धिबळ फिडे महिला विश्वचषक स्पर्धा सुरू होत आहे. भारताच्या ९ महिला बुद्धिबळपटू यात सहभागी होत आहेत.

****

क्रिकेट

भारत-इंग्लंड दरम्यान, बर्मिंगहम इथं सुरू असलेल्या दुसऱ्या कसोटी सामन्यात आज पाचव्या आणि अंतिम दिवशी, इंग्लंडला जिंकण्यासाठी ५३६ धावांची गरज आहे. आज दुस-या डावात इग्लंड तीन बाद ७२ धावांवरुन पुढे खेळण्यास सुरुवात करणार आहे. त्याआधी काल भारतानं आपला दुसरा डाव सहा बाद ४२७ धावांवर घोषित करुन इंग्लंडसमोर ६०८ धावांचं लक्ष्य ठेवलं.

****

हवामान

मध्य महाराष्ट्रात काही ठिकाणी जोरदार ते अति जोरदार पाऊस पडेल असा हवामान विभागाचा अंदाज आहे. मराठवाड्यात छत्रपती संभाजीनगर आणि जालन्यासह इतर काही जिल्ह्यांना यलो अलर्ट देण्यात आला आहे. नाशिक जिल्ह्यात सुरू असलेल्या पावसामुळे गंगापूर धरणातून तीन हजार सातशे, दारणा धरणातून पाच हजार १६० आणि नांदूर मधमेश्वर धरणातून १२ हजार ६२० घनफूट प्रतिसेकंद वेगाने पाण्याचा विसर्ग सुरू आहे.

****