आकाशवाणी छत्रपती संभाजीनगर - दिनांक 30.09.2026 रोजीचे दुपारी 01.00 वाजेचे मराठी बातमीपत्र

Regional Marathi Text Bulletin, Chhatrapati Sambhajinagar

Date - 30 September 2026

Time 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ३० सप्टेंबर २०२६ दुपारी १.०० वा.

****

जपानमध्ये सुरु असलेल्या आशियाई क्रीडा स्पर्धेत भारताने आज चार सुवर्ण पदकांची कमाई केली. तिरंदाजीत ज्योती सुरेखा वेण्णम, चिकिता तनिपार्थी आणि प्रथिका प्रदीप यांच्या संघाने चीनचा २३८-२३४ असा पराभव करत सुवर्ण पदकाला गवसणी घातली. तसंच साहिल जाधव-चिकिता तनिपार्थी यांच्या मिश्र कंपाउंप जोडीनेही दक्षिण कोरियाचा पराभव करत सुवर्ण पदक पटकावलं. तिरंदाजीतच पुरुषांच्या कंपाउंड संघाने देखील सुवर्ण पदक पटकावलं. साहिल, गणेश मनिरत्नम आणि कुशल दलाल यांच्या संघाने चीन चा पराभव करत ही कामगिरी केली.

नेमबाजीत ट्रॅप मिश्र प्रकारात नीरु धांडा आणि चिनान केनाई यांच्या जोडीने कतारचा पराभव करत सुवर्ण पदक जिंकलं.

मुष्टियुद्धात महिलांच्या ६० किलो वजनी गटात प्रिया घंघासने कांस्य पदक जिंकलं. ७५ किलो वजनी गटात लव्हलिना बोर्गोहेन हिने अंतिम फेरीत धडक मारली. उपांन्त्य फेरीत तिने कझाकिस्तानच्या खेळाडुचा पराभव केला.

स्क्वॅशमध्ये महिला संघाने सिंगापूरचा दोन - शून्य असा पराभव करत उपान्त्य फेरीत प्रवेश केला. कुस्तीमध्ये पुरुषांच्या ८७ किलो वजनी गटात सुनील कुमारनेही उपान्त्य फेरी गाठली.

भारत आता या स्पर्धेत दहा सुवर्ण, २१ रौप्य आणि २७ कांस्य पदकांसह ५८ पदकं जिंकून सातव्या स्थानावर पोहोचला आहे. 

****

दरम्यान, गृहमंत्री अमित शहा यांनी तिरंदाजीत सुवर्णपदक जिंकल्याबद्दल भारतीय संघाचं अभिनंदन केलं आहे. संघाच्या उत्कृष्ट कामगिरीने जगाला भारताचं ध्येयावरील अचूक लक्ष आणि दबावाखाली जिंकण्याचा दृढनिश्चय दाखवून दिला आहे असं शाह यांनी सामाजिक माध्यमावरच्या संदेशात म्हटलं आहे. क्रीडा मंत्री डॉ. मनसुख मांडविया यांनीही पदक विजेत्या खेळाडुंचं अभिनंदन केलं आहे.

****

अचूक आणि अद्ययावत मतदार यादी हा लोकशाहीचा आत्मा असल्याचं भारतीय जनता पक्षाचे ज्येष्ठ नेते आणि केंद्रीय मंत्री शिवराज सिंह चौहान यांनी म्हटलं आहे. ते आज नवी दिल्लीत पत्रकारांशी बोलत होते. मतदार यादीत चुकीची किंवा अपात्र नावे समाविष्ट झाल्यास निवडणूक प्रक्रियेच्या अखंडतेवर परिणाम होऊ शकतो. मतदार यादीतील अनियमिततेच्या विरोधकांच्या आरोपांवर चौहान यांनी प्रश्नचिन्ह उपस्थित करत दिवंगत व्यक्तींची नावे मतदार यादीतून वगळण्यास कोणताही आक्षेप नसावा असं स्पष्ट केलं.

****

महाज्योतीच्या माध्यमातून विद्यार्थ्यांना यूपीएससी, एमपीएससी, कौशल्य विकास प्रशिक्षण आणि पीएच.डी. फेलोशिपचा लाभ अधिक प्रभावीपणे मिळावा, यासाठी आवश्यक निधी उपलब्ध करून देण्याचे निर्देश महसूल मंत्री आणि ओबीसी उपसमितीचे अध्यक्ष चंद्रशेखर बावनकुळे यांनी दिले आहेत. मुंबईत काल झालेल्या बैठकीत ते बोलत होते. ‘महाज्योती’मार्फत आतापर्यंत सुमारे ९ हजार ८०० विद्यार्थ्यांना विविध प्रशिक्षण देण्यात आलं आहे. चालू वर्षात सुमारे २ हजार विद्यार्थ्यांना यूपीएससी आणि एमपीएससी प्रशिक्षण, तर ८ हजार विद्यार्थ्यांना कौशल्य विकास प्रशिक्षण देण्याचं नियोजन करण्यात आलं आहे. प्रलंबित असलेल्या सुमारे १२६ कोटी रुपयांच्या देयकांसह प्रशिक्षण आणि फेलोशिपसाठी आवश्यक निधीची तरतूद करण्याबाबत संबंधित विभागांनी परस्पर समन्वयानं कार्यवाही करावी, असे निर्देश बावनकुळे यांनी दिले. विद्यार्थ्यांच्या प्रशिक्षण आणि शैक्षणिक योजनांमध्ये निधीअभावी अडथळे निर्माण होऊ नयेत, यासाठी आवश्यक नियोजन करण्यावर त्यांनी भर दिला.

****

भारतीय तटरक्षक दलाने गुजरात एटीएसच्या समन्वयाने लक्षद्वीपच्या पश्चिमेकडील अरबी समुद्रात अंमली पदार्थ तस्करीविरोधात कारवाई केली. या कारवाईत सुमारे ५२६ किलो हेरॉईन आणि मेथॅम्फेटामाइन जप्त करण्यात आलं. आंतरराष्ट्रीय बाजारात या अंमली पदार्थांची किंमत तीन हजार कोटी रुपयांहून अधिक आहे. याप्रकरणी नौकेवरील पाच पाकिस्तानी नागरिकांना ताब्यात घेण्यात आलं.

****

परभणी पोलिसांनी आंतरराज्यीय साखळी चोरांचा पर्दाफाश केला आहे. चोरांनी साखळी ओढून नेल्याच्या एका प्रकरणाचा तपास करत असतांना स्थानिक गुन्हे शाखा पथकाला तांत्रिक विश्लेषणाच्या आधारे उत्तर प्रदेशातल्या अंतरराज्यीय आरोपीचा माग लागला. दोन आरोपींना ताब्यात घेऊन पोलिसांनी त्यांच्याकडून जवळपास १ लाख ६० हजार किमतीचा मुद्देमाल जप्त केला. एक आरोपी फरार असून पोलिस त्याचा शोध घेत असल्याचं आमच्या वार्ताहरानं सांगितलं.

****

आगामी सण उत्सवांच्या काळात प्रवाशांची होणारी गर्दी लक्षात घेत दक्षिण मध्य रेल्वे काही विशेष गाड्या चालवणार आहे. यामध्ये नांदेड-दिल्ली-नांदेड, जालना-छपरा-जालना आणि नांदेड-उधना-नांदेड या गाड्यांचा समावेश आहे.

दरम्यान, हडपसर-घोरपडी दरम्यान तिसऱ्या रेल्वे मार्गाच्या कामामुळे बीडहून पुणे जंक्शनला जाणारी आणि पुणे जंक्शनहून बीडला येणारी रेल्वेसेवा तीन ऑक्टोबरला रद्द करण्यात आली आहे.

****

छत्रपती संभाजीनगर जिल्ह्यात वेरूळच्या श्री घृष्णेश्वर मंदिर वेरूळ विकास आराखड्यांतर्गत मंदिरासमोरच्या खुलताबाद जंक्शन ते वेरुळ या मार्गावर भुयारी मार्गाचं बांधकाम करण्यात येणार आहे. यासाठी या मार्गावरची सर्व जड वाहतूक येत्या २९ मार्च २०२७ पर्यंत बंद ठेवण्याचे आदेश प्रभारी पोलीस अधीक्षक प्रशांत स्वामी यांनी दिले आहेत.

****