Regional Urdu Text Bulletin, Chhatrapati Sambhajinagar
Date: 01 May-2026
Time: 09:00-09:10 am
آکاشوانی چھترپتی سمبھاجی نگر
علاقائی خبریں
تاریخ: یکم/مئی ۶۲۰۲ء
وقت: ۰۱:۹-۰۰:۹
***** ***** *****
::::: سرخیاں::::::
پیش ہیں خاص خبروں کی سرخیاں:
٭ 67 ویں مہاراشٹر دن کی مناسبت سے آج پرچم کشائی سمیت مختلف پروگرامس کا انعقاد۔
٭ ریاست میں مردم شماری کا آج سے آغاز۔
٭ عصمت ریزی کے سبب ٹھہرے حمل کے اسقاط کیلئے مدت کی کوئی حد نہیں ہونی چاہیے: سپریم کورٹ کا اظہارِ خیال۔
٭ نندوربار ضلع کے نواپور تعلقے میں مرغیاں برڈفلو سے متاثر۔
اور۔۔۔٭ موتی رام اگروال جالنہ مرچنٹ بینک کی عنبڑ برانچ میں 96 لاکھ روپؤں کا گولڈ لون گھپلہ؛ تین افراد گرفتار۔
***** ***** *****
اب خبریں تفصیل سے...
67 واں مہاراشٹر دن آج منایا جارہا ہے۔ اس سلسلے میں سرکاری پرچم کشائی کی مرکزی تقریب ممبئی کے شیواجی پارک میں منعقد کی گئی ہے جس کا آغاز صبح آٹھ بجے ہوا۔ اس تقریب کے دوران ریاست کے گورنر جشنو دیو ورما نے وزیرِ اعلیٰ دیویندر پھڑنویس کی موجودگی میں پرچم لہرایا۔
مہاراشٹر دن کی مناسبت سے مراٹھواڑہ کے بیڑ، چھترپتی سمبھاجی نگر، جالنہ، لاتور، پربھنی، ہنگولی، ناندیڑ اور دھاراشیو اضلاع میں رابطہ وزیروں کے ہاتھوں پرچم کشائی کی سرکاری تقریب کا انعقاد کیا گیا۔
***** ***** *****
وزیرِ اعلیٰ دیویندر پھڑ نویس آج‘ یشونت راؤ چوہان ممبئی- پونے ایکسپریس وے کی گنجائش میں اضافے کی خاطر تعمیر کیے گئے ”Missing Link Project“ کا افتتاح کریں گے۔ یہ ملک کا پہلا تیز تر اور محفوظ ایکسپریس وے ہوگا۔ اس شاہراہ کی تکمیل کے ساتھ پونے سے ممبئی کا سفر‘ تیز تر‘ محفوظ اور آسان ہوجائے گا۔
***** ***** *****
ریاست کے سات اضلاع میں صحت سے منسلک MRI خدمات عوام کے نام وقف کیا جارہا ہے۔ ساتھ ہی بیڑ سمیت ریاستکے 11 اضلاع میں مفت ڈائیلائسیس خدمات کی توسیع بھی کی جائے گی۔ MRI خدمات‘ ناندیڑ، دھاراشیو، ہنگولی، پربھنی سمیت سات اضلاع کے سرکاری اسپتالوں میں شروع کی جارہی ہے۔
***** ***** *****
صحت ِ عامہ اور خاندانی بہبود کی ریاستی وزیر میگھنا ساکورے بورڈیکر نے تھیلیسیمیا سے پاک مہاراشٹر مہم کو فروغ دیتے ہوئے آج سے 8 مئی تک ”سنکلپ ہفتہ“ منانے کی ہدایت دی ہے۔ اس کے ذریعے بدن میں خون نہ بننے کی بیماری تھیلیسیمیا کی روک تھام‘ طبّی جانچ اور عوامی بیداری پر زور دیا جائے گا۔
***** ***** *****
ریاستی قانون ساز کاؤنسل کے انتخابات کیلئے پرچہئ نامزدگی داخل کرنے کی آخری تاریخ کل ختم ہوگئی۔ دس نشستوں کیلئے بڑی جماعتوں کے امیدواروں کی جانب سے دس درخواستیں داخل کی گئی ہیں۔ ان میں ایک خالی نشست پر ضمنی انتخاب ہورہا ہے۔ اس کیلئے بی جے پی کے سنیل کرجتکر، سنجئے بھینڈے، ویویک کولہے، مادھوی نائیک اور پرمود جٹھار نے نامزدگی داخل کی وہیں راشٹروادی کانگریس کی جانب سے سابق رکنِ اسمبلی ذیشان صدیقی نے اپنا پرچہ داخل کیا۔ ان انتخابات میں حصہ لینے کی خاطر شیوسینا کی جانب سے پرہار سنگھٹنا کے صدر بچو کڑو اور قانون ساز کاؤنسل کی ڈپٹی چیئرپرسن نیلم گورہے نے اپنی درخواستیں داخل کیں۔ اس سے قبل بچو کڑو نے نائب وزیرِ اعلیٰ ایکناتھ شندے کی موجودگی میں شیوسینا میں شمولیت اختیار کی۔ اس موقع پر انھوں نے وضاحت کی کہ پرہار ایک سماجی تنظیم کے طور پر کام کرتا رہے گا۔ شیوسینا اُدّھو بالا صاحب ٹھاکرے پارٹی کی طرف سے کاؤنسل میں حزبِ اختلاف کے سابق رہنماء امباداس دانوے نے اپنی نامزدگی کا پرچہ داخل کیا۔
اسی بیچ دانوے نے کل کانگریس پارٹی کے ریاستی صدر ہرش وردھن سپکاڑ سے ملاقات کی۔ جس کے بعد سپکاڑ نے ایک صحافتی کانفرنس میں علیحدہ امیدوار کھڑا نہ کرنے کے فیصلے کا اعلان کیا۔ پرگیہ ساتو نے بھی بی جے پی کی جانب سے ضمنی انتخاب کیلئے اپنی نامزدگی کا پرچہ داخل کیا۔ اسی بیچ ودھان بھون کے عہدیداروں نے بتایا کہ اس چناؤ میں حصہ لینے کیلئے پانچ آزاد امیدواروں نے اپنی نامزدگی کے کاغذات داخل کیے۔
***** ***** *****
یہ خبریں آکاشوانی چھترپتی سمبھاجی نگر سے نشر کی جارہی ہیں۔
***** ***** *****
ریاست میں آج سے اس بار کی مردم شماری کا آغاز ہورہا ہے۔ اس کے تحت یکم مئی تا 15 مئی کے درمیان عام شہریان اپنے مکانات کا اندراج ویب سائٹ se.census.gov.in پر کرواسکتے ہیں۔ ریاست کی چیف پرنسپل سینس افسر نروپما ڈانگے نے ممبئی میں ایک اخباری کانفرنس کے دوران یہ اطلاع دی۔ اس رجسٹریشن کے بعد 11 ہندسوں کا ایک سینس I.D. ملے گا۔ درج کی گئی اس معلومات کی تصدیق 16 مئی تا 14 جون کے دوران گھروں پر آنے والے حکومتی اہلکار کریں گے۔ جن شہریان نے بذاتِ خود اپنے گھروں کی معلومات درج نہیں کروائی ہو تو مردم شماری پر مامور اہلکار خود یہ معلومات ریکارڈ کریں گے۔
***** ***** *****
عصمت ریزی کے نتیجے میں ٹھہرے حمل کے اسقاط کیلئے مدت کی کوئی حد نہیں ہونی چاہیے۔ سپریم کورٹ نے اس رائے کا اظہار کیا۔ عدالت نے مرکزی حکومت کو ہدایت دی ہے کہ وہ متاثرہ کو حمل ٹھہرنے کے 20 ہفتوں کے بعد بھی اسقاط کی اجازت دینے کیلئے قانون میں ضروری ترمیم کرے۔ چیف جسٹس سوریہ کانت اور جسٹس جوائے مالیہ باگچی کی بینچ نے 15 سالہ متاثرہ کے 30 ہفتوں پر مشتمل حمل گرانے سے متعلق سنوائی کے دوران یہ رائے ظاہر کی۔
***** ***** *****
بدھ پورنیما آج منائی جارہی ہے۔ صدرِ جمہوریہ نے اس موقع پر ملک کے شہریان کو مبارکباد دی ہے۔ صدرِ جمہوریہ نے اپنے پیغام میں کہا ہے کہ مہاتما بدھ کا ہمدردی، عدم تشدد‘ امن اور حکمت کا لازوال پیغام پوری انسانیت کی رہنمائی کرتا رہے گا۔
***** ***** *****
وزیرِ اعلیٰ دیویندر پھڑنویس نے کہا ہے کہ ریاست میں جدید وائرس کی تشخیص کی خاطر تجزیہ گاہوں کا نیٹ ورک قائم کیا جائے گا۔ اس خصوص میں ناگپور میں ریاستی سطح کی لیباریٹری اور چھترپتی سمبھاجی نگر سمیت آکولہ، شولاپور، دھولیہ اور میرج کے میڈیکل کالجز میں ان لیباریٹریز کے قیام کو منظوری دی گئی ہے۔ اس پہل کیلئے 29 کروڑ 21 لاکھ روپؤں کا فنڈ دستیاب کرایا گیاہے۔
***** ***** *****
نندوربار ضلع کے نواپور تعلقے کے ایک پولٹری فارم میں مرغیاں برڈ فلو سے متاثر پائی گئی ہیں۔ گذشتہ مہینے کی 13 اور 14 تاریخ کو اس فارم کی 200کے قریب مرغیاں اچانک مردہ پائی گئیں۔ ان مرغیوں کے خون کے نمونے بھوپال کی طبّی تجزیہ گاہ میں جانچ کیلئے بھیجے گئے‘ جس سے معلوم ہوا کہ یہ مرغیاں برڈ فلو سے متاثر تھیں۔ اس سے متعلق موصولہ خبر میں کہا گیا ہے کہ اس علاقے کے ایک کلو میٹر دائرے میں وقع چھ پولٹری فارموں میں موجود ایک لاکھ 40 ہزار مرغیوں کو سائنسی طریقے سے تلف کیا جائے گا۔
***** ***** *****
جالنہ ضلع کے عنبڑ میں واقع موتی رام اگروال جالنہ مرچنٹ بینک میں اصلی سونے کی بجائے نقلی سونا رکھ کر گولڈ لون لینے کا انکشاف ہوا ہے۔ جس کے بعد 96 لاکھ 41 ہزار روپؤں کے غبن کا معاملہ سامنے آیا ہے۔ اس بینک کے کھاتے دار امول گائیکواڑ کی فریاد پر بینک کی عنبڑ شاخ کے مینیجر رام پرساد جاجو، کیشئر انگد ییولے اور سپاہی سومناتھ نسوالے کے خلاف عنبڑ پولس اسٹیشن میں کیس درج کیا گیا ہے۔ ان تینوں ملزمین کو گرفتار کیے جانے کی اطلاع پولس انسپکٹر سنتوش گھوڑکے نے دی ہے۔ گذشتہ ہفتے کینرا بینک کی بدناپور شاخ میں بھی اسی طرح کا سات کروڑ روپؤں کا گھپلہ بے نقاب ہوا تھا۔
***** ***** *****
نوویں نیپال انٹرنیشنل کرٹکس فلم فیسٹیول میں بیڑ سے تعلق رکھنے والے پربھات کمار ہولکر نے مراٹھی فلم ”بھرڑ ڈوڑیانچی“ کیلئے بہترین ایڈیٹر اور بہترین چائلڈ آرٹسٹ کے دو انعامات جیتے ہیں‘ وہیں میناکشی ہولکر کو اس فلم کیلئے بہترین پلے بیک سنگر کا اعزاز دیا گیا۔
***** ***** *****
ڈویژنل کمشنر جی شریکانت نے ہدایت دی ہے کہ چھترپتی سمبھاجی نگر شہر کی آبرسانی کیلئے مقررہ مدت کی حد کا احترام کیا جائے۔ موصوف کل آبرسانی اسکیم کے حوالے سے منعقدہ ایک جائزاتی اجلاس سے خطاب کررہے تھے۔ انھوں نے اس موقع پر ہدایت دی کہ اس بات کو یقینی بنایا جائے کہ پروجیکٹ کانٹریکٹرز کی ادائیگیاں التواء میں نہ رہیں۔
***** ***** *****
پربھنی کے ضلع کلکٹر سنجئے سنگھ چوہان نے ضلع میں بڑھتی گرمی کے پس منظر میں تمام شہریان سے ضروری احتیاطی تدابیر اختیار کرنے کی اپیل کی ہے۔ اس دوران ریاست میں سب سے زیادہ درجہ حرارت کل چندر پور میں 45 ڈگری سیلسیئس درج کیا گیا۔ وہیں مراٹھواڑہ کے پربھنی میں اوسط درجہ حرارت 43.5 ڈگری ریکارڈ کیا گیا‘ وہیں چھترپتی سمبھاجی نگر‘ دھاراشیو اور ناندیڑ اضلاع میں اوسط درجہ حرارت 42 ڈگری سیلسیئس درج کیا گیا۔
***** ***** *****
پربھنی پولس دستے کے ٹائسن کتے نے ناگپور میں منعقدہ 69 ویں کل ہند پولس ڈیوٹی میٹ میں ایک سونے اور ایک چاندی کا تمغہ جیتا ہے۔ پربھنی کے پولس سپرنٹنڈنٹ نے ٹائسن اور اس کی نگہداشت کرنے والے دو پولس ملازمین کو مبارکباد دی ہے۔
***** ***** *****
::::: سرخیاں::::::
اور آخر میں اس بلیٹن کی خاص خبریں ایک بار پھر...
٭ 67 ویں مہاراشٹر دن کی مناسبت سے آج پرچم کشائی سمیت مختلف پروگرامس کا انعقاد۔
٭ ریاست میں مردم شماری کا آج سے آغاز۔
٭ عصمت ریزی کے سبب ٹھہرے حمل کے اسقاط کیلئے مدت کی کوئی حد نہیں ہونی چاہیے: سپریم کورٹ کا اظہارِ خیال۔
٭ نندوربار ضلع کے نواپور تعلقے میں مرغیاں برڈفلو سے متاثر۔
اور۔۔۔٭ موتی رام اگروال جالنہ مرچنٹ بینک کی عنبڑ برانچ میں 96 لاکھ روپؤں کا گولڈ لون گھپلہ؛ تین افراد گرفتار۔
***** ***** *****