Regional Marathi Text Bulletin, Aurangabad
Date – 02 December 2019
Time 18.00 to 18.05
Language Marathi
आकाशवाणी औरंगाबाद
प्रादेशिक बातम्या
दिनांक ०२ डिसेंबर २०१९ सायंकाळी ६.००
****
मुंबई – अहमदाबाद बुलेट ट्रेनच्या प्रकल्पासह राज्यात
सुरू सर्व विकास कामांच्या प्रकल्पांचं पुनरावलोकन करण्याचे आदेश मुख्यमंत्री उद्धव
ठाकरे यांनी दिले आहेत. शेतकरी आणि आदिवासींनी त्यांच्या जमीनी बुलेट ट्रेन प्रकल्पामध्ये
जात असल्यामुळे याला तीव्र विरोध केला आहे.
सरकार सर्वसामान्यांचं आहे. आरे कार
शेड प्रकल्पासारखं आपण बुलेट ट्रेनच्या प्रकल्पाला स्थगिती दिलेली नाही, अशी माहितीही
ठाकरे यांनी काल रात्री उशिरा पत्रकारांशी बोलताना दिली. राज्य सरकार राज्याच्या आर्थिक
स्थितीवर एक श्र्वेत पत्रिका काढणार असल्याचंही त्यांनी यावेळी सांगितलं. सुमारे पाच
लाख कोटी रुपयांचं कर्ज असलेलं राज्य सरकार शेतकऱ्यांना विनाअट कर्ज माफी देण्यावर
ठाम असल्याची माहितीही मुख्यमंत्र्यांनी यावेळी दिली. त्यांचा पक्ष सहभागी असलेल्या
भाजपच्या नेतृत्वाखालील गेल्या सरकारचा प्राधान्यक्रम चुकला नसल्याचं नमुद करताना राज्यात
सुडाचं राजकारण केलं जाणार नसल्याचं ते म्हणाले.
दरम्यान, आपला पक्ष राज्यातील जनतेवर बुलेट ट्रेनचा बोजा टाकण्याविरुद्ध असल्याचं
शिवसेनेचे खासदार संजय राऊत यांनी म्हटलं आहे. राज्याची आर्थिक स्थिती खूप गंभीर आहे,
असं त्यांनी सांगितलं. नरेंद्र मोदी सरकारनं देशाच्या हिरक महोत्सवी स्वातंत्र्य दिनापर्यंत
म्हणजे पंधरा ऑगस्ट २०२२पर्यंत हा प्रकल्प पूर्ण करण्याचं महत्त्वाकांक्षी लक्ष्य ठेवलं
आहे.
****
भाजपच्या नेत्या पंकजा मुंडे पक्ष सोडणार नाहीत,
असं पक्षाचे प्रदेशाध्यक्ष चंद्रकांत पाटील यांनी म्हटलं आहे. मुंडे यांनी त्यांच्या
समाजमाध्यमांवरील प्रतिमेतून पक्षाचं नाव हटवल्यानं खळबळ उडाल्याच्या पार्श्र्वभूमीवर
पाटील यांनी ही माहिती दिली आहे. त्या भाजप सोडतील या आशयाच्या वृत्तांचंही पाटील यांनी
खंडण केलं आहे. भाजपचे नेते मुंडे यांच्या संपर्कात आहेत. त्या विधानसभा निवडणुकीतील
पराभवानंतर आत्मपरिक्षण करत आहेत परंतु त्या भाजप सोडत आहेत, असा याचा अर्थ होत नसल्याचंही
त्यांनी म्हटलं आहे. अनेक नेते उद्धव ठाकरे
यांच्या नेतृत्त्वाखाली आपल्या पक्षाच्या संपर्कात असल्याच्या शिवसेना नेते संजय राऊत
यांच्या विधानाचाही त्यांनी इन्कार केला. राज्यात अपघातानं सत्तेवर आलेलं सरकार अशा
निराधार बातम्या पसरवत आहे. त्यांचे ठाकरे कुटुंबीयांसमवेत चांगले संबंध असण्याची शक्यता
आहे परंतु याचा अर्थ त्या शिवसेनेत जात आहेत, असा होत नाही, असंही त्यांनी म्हटलं.
****
माजी मुख्यमंत्री देवेंद्र फडणवीस यांनी भाजपचे खासदार
अनंतकुमार हेगडे यांच्या आरोपांचं खंडण केलं आहे. फडणवीस यांना गेल्या महिन्यात केवळ
केंद्र सरकारचा चाळीस हजार कोटी रुपयांचा निधी वाचवण्यासाठी बहुमत नसताना मुख्यमंत्री
बनवण्यात आलं होतं, असं खासदार हेगडे यांनी म्हटलं होतं. केंद्र सरकारनं कोणत्याही निधीची मागणी केली नाही आणि राज्य सरकारनं
कोणताही निधी पाठवला नाही, असं फडणवीस यांनी या संदर्भात म्हटलं आहे.
****
अहमदनगर जिल्ह्यातील २०१३ मधील सोनई हत्याकांड प्रकरणी
मुंबई उच्च न्यायालयानं चार आरोपींची फाशीची कायम ठेवली असून एका आरोपीला निर्दोष मुक्त
केलं आहे.
****
हैद्राबाद इथं झालेल्या
डॉ. प्रियंका रेड्डी अत्याचार प्रकरणी आज हिंगोली जिल्ह्यातील जवळा बाजार इथं बाजार
पेठ बंद ठेवून निषेध नोंदवण्यात आला. बुलडाणा जिल्ह्यातील
खामगाव इथं महिला संघटनांनी आंदोलन केलं. धुळे शहरात विश्व हिंदू परिषद आणि हिंदूत्वादी
संघटनांनी निदर्शनं करून डॉ. प्रियंका रेड्डी अत्याचार आणि खून प्रकरणातील आरोपींना
फाशीची मागणी करणारं निवेदन जिल्हाधिकाऱ्यांना सादर केलं.
****
हिंगोली शहरात शहर वाहतुक पोलिसांनी आज हेल्मेट सक्तीसाठी
मोहीम राबवली. यावेळी हेल्मेट न वापरणाऱ्या पोलिसांवरही कारवाई करण्यात आली. हेल्मेटधारी
वाहनचालकांचं फुलं देऊन स्वागत करण्यात आलं.
****
धुळे तालुक्यातील नकाणेवार गावालगत पांझरा नदी पात्रातून
अवैध वाळू उपसा करणाऱ्या वाळू चोरांवर कारवाई करणाऱ्या धुळे ग्रामीणचे तहसीलदार किशोर
कदम यांच्या पथकावर काल हल्ला करण्यात आला. यात तहसिलदार कदम आणि अन्य एक जण जखमी झाला
आहे. धुळे जिल्हा तलाठी संघानं आज जिल्हाधिकारी कार्यालयासमोर याविरुद्ध निदर्शनं केली.
****
नांदेडइथून धावणाऱ्या काही रेल्वे गाड्यांत तात्पुरत्या
स्वरूपात डब्बे वाढविण्यात आले आहेत. श्री गंगानगर-नांदेड – श्री गंगानगर द्वि साप्ताहिक
एक्स्प्रेस मध्ये एक तृतीय श्रेणीचा वातानुकूलित डब्बा आणि श्री गंगानगर-नांदेड – श्री
गंगानगर साप्ताहिक एक्स्प्रेस मध्ये एक तृतीय
श्रेणीचा वातानुकूलित डब्बा वाढवण्यात आल्याचं रेल्वे जनसंपर्क विभागानं कळवलं आहे.
*****
***
