आकाशवाणी औरंगाबाद दि.29.11.2019 सकाळी 07.10 वाजेचे मराठी बातमीपत्र

AIR NEWS BULLETIN, AURANGABAD 28.11.2019 18.00

Regional Marathi Text Bulletin, Aurangabad

Date – 28 November 2019

Time 18.00 to 18.05

Language Marathi

आकाशवाणी औरंगाबाद

प्रादेशिक बातम्या

दिनांक २८ नोव्हेंबर २०१९ सायंकाळी ६.००

****

$F8B7D50A-C9BE-4C04-839F-1D0C7D00C1E

 महाविकास आघाडीने आज आपला किमान समान कार्यक्रम जाहीर केला. यिवसेनेचे एकनाथ शिंदे, काँग्रेस प्रदेशाध्यक्ष बाळासाहेब थोरात, राष्ट्रवादी काँग्रेसचे प्रदेशाध्यक्ष जयंत पाटील, नवाब मलिक यांच्यासह अन्य नेते यावेळी उपस्थित होते. सामान्य नागरिकांना दहा रुपयांत जेवण, आर्थिक दुर्बल तसंच शेतकरी पाल्यांना बिनव्याजी कर्ज, पिकाला योग्य भाव, बेरोजगार भत्ता, आर्थिक दुर्बल घटकातल्या मुलींसाठी मोफत शिक्षण, तालुकास्तराव एक रुपयात आरोग्य तपासणी, पीक विमा योजनेची पुनर्रचना, आदी मुद्यांचा या किमान समान कार्यक्रमात समावेश आहे. सरकारी नोकऱ्यांपैकी रिक्त पदांवर तत्काळ भरती प्रक्रिया राबवणार असल्याची माहिती यावेळी देण्यात आली. शेतकरी कर्जमाफी तसंच अवकाळी पावसामुळे नुकसानग्रस्त शेतकऱ्यांना अधिकच्या मदतीबाबतही विधानसभेत बहुमत चाचणीनंतर सरकार स्थापन झाल्यावर निर्णय घेतला जाईल, असं यावेळी सांगण्यात आलं.

****

 शिवसेना पक्षप्रमुख उद्धव ठाकरे आज संध्याकाळी सहा वाजून ४० मिनिटांनी मुंबईत शिवाजी पार्कवर मुख्यमंत्री पदाची शपथ घेणार आहेत. ठाकरे यांच्या समवेत राष्ट्रवादी काँग्रेस पक्षाचे छगन भुजबळ, जयंत पाटील आणि काँग्रेस प्रदेशाध्यक्ष बाळासाहेब थोरात हे मंत्रिपदाची शपथ घेणार असल्याचं, पीटीआयच्या बातमीत म्हटलं आहे. या शपथविधी सोहळ्यासाठी देशभरातल्या प्रमुख राजकीय पक्षांच्या नेत्यांना आमंत्रित करण्यात आलं आहे. शपथविधी सोहळ्याची जय्यत तयारी झाली असून, अनेक नेते, विविध पक्षांचे पदाधिकारी तसंच सर्वसामान्य नागरिक शिवाजी पार्क मैदानावर जमण्यास प्रारंभ झाला आहे.

****

 महाराष्ट्र नवनिर्माण सेनेकडून अमित राज ठाकरे यांच्या नेतृत्वाखाली आज मुंबई महापालिकेवर थाळीनाद महामोर्चा काढण्यात आला.महापालिकेतील कंत्राटी कामगारांचे आणि कचरा वाहतुक कामगारांचे थकीत वेतन तत्काळ मिळावं या मागणीसाठी हे आंदोलन करण्यात आलं.या महामोर्चानंतर कामगारांचे किमान वेतन पुढील ३ आठवड्यात देण्याचे लेखी पत्र महापालिका प्रशासनानं मनसेला दिलं.

****

 गडचिरोली जिल्ह्यात आज सकाळी नक्षल्यांनी आलापल्ली-भामरागड मार्गावर झा़डे आडवी टाकुन रस्ता अडवला.त्यामुळं काही काळासाठी वाहतुक ठप्प झाली होती. पीपल्स लिबरेशन गुर्रिल्ला आर्मीच्या पीएलजीए स्थापना दिनाच्या पार्श्वभूमीवर नक्षलवादांनी हि कारवाई केली असल्याचं या बाबतच्या वृत्तात म्हटलं आहे.

****

 भारतीय जनता पक्षाचे जळगावचे माजी जिल्हाध्यक्ष उदय वाघ यांचं आज सकाळी अमळनेर इथं हृदयविकाराच्या झटक्यानं निधन झालं. आमदार स्मिता वाघ यांचे ते पती होत. वाघ यांच्या पार्थिव देहावर उद्या सकाळी अमळनेर तालुक्यात डांगर या त्यांच्या गावी अंत्यसंस्कार करण्यात येणार आहेत.

****

 स्त्री शिक्षणाचे प्रणेते महात्मा ज्योतिबा फुले यांच्या पुण्यतिथीनिमित्तानं आज सर्वत्र त्यांना अभिवादन करण्यात आलं. औरंगाबाद इथं विविध संघटनांच्या वतीनं महात्मा फुले यांच्या पुतळ्याला पुष्पहार अर्पण करून आदरांजली वाहण्यात आली.

 जालना नगरपालिकेत नगराध्यक्षा संगीता गोरंट्याल यांनी महात्मा फुले यांच्या पूर्णाकृती पुतळ्यास पुष्पहार अर्पण करून अभिवादन केलं. नगरपालिकेच्या अधिकारी, कर्मचाऱ्यांसह सामाजिक क्षेत्रातल्या मान्यवरांनी यावेळी उपस्थित राहून फुले यांना अभिवादन केलं. धुळे शहरातही फुले यांच्या पुतळ्यास माल्यार्पण करून विविध मान्यवरांनी अभिवादन केलं.

****

 जालना जिल्ह्यात अवकाळी पावसामुळे झालेल्या पीक नुकसानाच्या भरपाईसाठी प्राप्त अनुदान वाटपाचं ९१ टक्के काम पूर्ण झालं आहे. जिल्ह्यातल्या नुकसानग्रस्त शेतकऱ्यांसाठी पहिल्या टप्प्यात सरकानं ११० कोटी रुपयांचा निधी दिला होता. त्यापैकी जवळपास एक लाख शेतकऱ्यांच्या बँक खात्यांमध्ये १०० कोटी रुपये जमा करण्यात आल्याची माहिती जिल्हा प्रशासनानं दिली आहे.

****

 परभणी तालुक्यात झरी इथल्या प्रयोगशील शेतकरी मेघा देशमुख यांना महाऍग्रोचा सहावा राज्यस्तरीय कृषी प्रदर्शनाचा मानाचा बॅरिस्टर जवाहर गांधी शेतकरी सन्मान पुरस्कार जाहीर झाला आहे. उद्या शुक्रवारी २९ नोव्हेंबरला केंद्रीय मंत्री रावसाहेब दानवे यांच्या हस्ते तसंच अनेक मान्यवरांच्या उपस्थितीत औरंगाबाद इथं हा पुरस्कार प्रदान करण्यात येणार आहे.

 दरम्यान, या सहाव्या कृषी प्रदर्शनाला उद्यापासून औरंगाबाद इथं प्रारंभ होत आहे. पैठण रस्त्यावर कृषी विज्ञान केंद्र मैदानावर आयोजित या चार दिवसीय प्रदर्शनात पीक प्रात्यक्षिकांसह विविध विषयावर चर्चासत्र तसंच आधुनिक शेती औजारं पहायला मिळणार आहेत.

*****

***

आकाशवाणी औरंगाबाद – दि.28.11.2019 सायंकाळी 06.00 वाजेचे मराठी बातमीपत्र

आकाशवाणी औरंगाबाद - सांगली जिल्हा वार्तापत्र दिनांक - २८.११.२०१९

AIR NEWS BULLETIN, AURANGABAD 28.11.2019 13.00

Regional Marathi Text Bulletin, Aurangabad

Date – 28 November 2019

Time 1.00 to 1.05pm

Language Marathi

आकाशवाणी औरंगाबाद

प्रादेशिक बातम्या

दिनांक -२८ नोव्हेंबर २०१९ दुपारी १.०० वा.

****

भारतीय जनता पक्षाच्या खासदार प्रज्ञासिंह ठाकूर यांच्यावर आक्षेपार्ह वक्तव्य प्रकरणी कारवाईचे संकेत भाजप कार्याध्यक्ष जे पी नड्डा यांनी दिले आहेत. ते आज दिल्लीत पत्रकारांशी बोलत होते. ठाकूर यांचं वक्तव्य तसंच विचारधारेचं भाजप कधीही समर्थन करत नसल्याचं नड्डा यांनी सांगितलं. ठाकूर यांना संरक्षण मंत्रालयाच्या सल्लागार समितीवरून हटवलं जाईल, तसंच संसदेच्या या सत्रात त्यांना संसदीय पक्षाच्या बैठकीत सहभागाची परवानगी नसेल, असंही नड्डा यांनी सांगितलं.

ठाकूर यांनी काल लोकसभेत केलेल्या या वक्तव्याच्या निषेधार्थ आज विरोधी पक्षांच्या अनेक सदस्यांनी या प्रकरणी ठाकूर यांच्यावर कारवाई करण्यासह या मुद्यावर सदनात चर्चेची मागणी केली. अध्यक्ष ओम बिर्ला यांनी ही मागणी फेटाळून लावताच, काँग्रेस, द्रमुक, तृणमूल काँग्रेससह इतर सदस्यांनी या मुद्यावरून सभात्याग केला.

संरक्षण मंत्री राजनाथ सिंह यांनी प्रज्ञासिंह ठाकूर यांच्या या वक्तव्याचा निषेध करत, ठाकूर यांच्या विचारधारेचा निषेध केला. महात्मा गांधी हे देशाचे आदर्श होते, आणि राहतील, असं राजनाथसिंह यांनी नमूद केलं.

राज्यसभेतही या मुद्यावरून मार्क्सवादी कम्युनिस्ट पक्ष आणि आम आदमी पक्षाच्या नेत्यांनी या विषयावरून स्थगन प्रस्ताव दिले होते, सभापती व्यंकय्या नायडू यांनी हे प्रस्ताव फेटाळून लावत नियमित कामकाज सुरू ठेवलं.

****

ग्रामीण कारागीरांचा विकास हे सरकारचं ध्येय असल्याचं सुक्ष्म, लघु आणि मध्यम उद्योग मंत्री नितीन गडकरी यांनी म्हटलं आहे, ते आज लोकसभेत प्रश्नोत्तराच्या तासात एका प्रश्नाच्या उत्तरात बोलत होते. स्थानिक उद्योगांना प्रोत्साहन देण्यासाठी चीन मधुन येणाऱ्या बांबूच्या वस्तुंवर ३० टक्के आयात कर लावला असून, चारशे रेल्वे स्थानकांवर कुल्हड बंधनकारक करण्यात आल्याचं, गडकरी यांनी सांगितलं. मध उत्पादनात मोठ्या प्रमाणावर वाढ करण्यात येत असून, साखरेप्रमाणे मधाचे स्फटिक तयार करण्यात येत असल्याची माहिती गडकरी यांनी दिली.

****

नांदेड जिल्ह्यात राष्ट्रीयकृत बँकांच्या शाखा वाढवाव्यात, अशी मागणी नांदेडचे खासदार प्रताप पाटील चिखलीकर यांनी केली आहे. ते लोकसभेत शून्यकाळात बोलत होते. जिल्ह्यात राष्ट्रीयकृत बँकांच्या पुरेशा शाखा नाहीत, जिल्हा मध्यवर्ती बँकेच्याही अनेक शाखा बंद आहेत. त्यामुळे शेतकऱ्यांसह सर्वसामान्यांना विमा रक्कम भरण्यासह इतर बँक व्यवहार करण्यात अडचणी येतात, याकडे चिखलीकर यांनी लक्ष वेधलं.

****

आयएनएक्स मीडिया आर्थिक गैरव्यवहार प्रकरणी माजी केंद्रीय अर्थमंत्री पी चिदंबरम यांना जामीन देण्यास अंमलबजावणी संचालनालय - ईडीने विरोध दर्शवला आहे. आज या प्रकरणी सर्वोच्च न्यायालयात झालेल्या सुनावणीदरम्यान, चिदंबरम हे न्यायालयीन कोठडीत असूनही महत्त्वाच्या साक्षीदारांवर प्रभाव टाकण्याचा प्रयत्न करत असल्याचं ईडीने न्यायालयाला सांगितलं. या गैरव्यवराशी संबंधित बारा बँक खाती तपास यंत्रणांना आढळली असून, विविध देशांमधल्या बारा अचल संपत्तीची माहितीही मिळाली असल्याचं, ईडीनं न्यायालयाला सांगितलं.

****

महाराष्ट्रात महाविकास आघाडीचं सरकार येऊ नये, यासाठी भारतीय जनता पक्षाने लोकशाहीची कुचेष्टी केल्याचं, काँग्रेसच्या हंगामी अध्यक्ष सोनिया गांधी यांनी म्हटलं आहे. त्या आज दिल्लीत काँग्रेसच्या संसदीय पक्षाच्या बैठकीत बोलत होत्या. या संदर्भात राज्यपालांची भूमिकाही निंदनीय असल्याची टीका गांधी यांनी केल्याचं, पीटीआयच्या बातमीत म्हटलं आहे.

दरम्यान, शिवसेना पक्षप्रमुख उद्धव ठाकरे आज संध्याकाळी सहा वाजून ४० मिनिटांनी मुंबईत शिवाजी पार्कवर मुख्यमंत्री पदाची शपथ घेणार आहेत. ठाकरे यांच्या समवेत राष्ट्रवादी काँग्रेस पक्षाचे छगन भुजबळ, जयंत पाटील आणि काँग्रेस प्रदेशाध्यक्ष बाळासाहेब थोरात हे मंत्रिपदाची शपथ घेणार असल्याचं, पीटीआयच्या बातमीत म्हटलं आहे. या शपथविधी सोहळ्यासाठी देशभरातल्या प्रमुख राजकीय पक्षांच्या नेत्यांना आमंत्रित करण्यात आलं आहे.

****

भंडारा इथं आज अतिरिक्त जिल्हाधिकारी रोहन घुगे यांच्या हस्ते बालकामगार प्रथेविरुध्द जनजागृती अभियानाचं उदघाटन करण्यात आलं. कामगार आयुक्त कार्यालयातल्या  अधिकाऱ्यांच्या नेतृत्वात कृतीदलातर्फे विविध ठिकाणचे वीटभट्टी मालक तसंच विविध आस्थापनांची तपासणी करुन बालकामगार विरुध्द माहितीपत्रक देण्यात आली. तसंच हमीपत्र लिहून घेत जनजागृती करण्यात आली.

****

वाशिम जिल्ह्यात रबी पिकांची पेरणी पूर्ण झाली आहे. गहू आणि हरभरा पिकांची चांगली वाढ झाली असल्यानं शेतकऱ्यांच्या आशा पल्लवित झाल्या असल्याचं आमच्या वार्ताहरानं कळवलं आहे.

****

नाशिक जिल्ह्यात थंडीचा जोर वाढला निफाड तालुक्यात नांदूर मधमेश्वर इथं देश विदेशातून १८ हजारांहून अधिक पक्षी दाखल झाले आहे.

****

आकाशवाणी औरंगाबाद दि.28.11.2019 दुपारी 01.00 वाजेचे मराठी बातमीपत्र

AIR NEWS BULLETIN, AURANGABAD 28.11.2019 11.00AM

आकाशवाणी औरंगाबाद

संक्षिप्त बातमीपत्र

२८ नोव्हेंबर २०१९ सकाळी ११.०० वाजता

****

शिवसेना पक्षप्रमुख उद्धव ठाकरे आज संध्याकाळी सहा वाजून ४० मिनिटांनी मुंबईत शिवाजी पार्कवर मुख्यमंत्री पदाची शपथ घेणार आहेत. ठाकरे यांच्या समवेत राष्ट्रवादी काँग्रेस पक्षाचे छगन भुजबळ, जयंत पाटील आणि काँग्रेस प्रदेशाध्यक्ष बाळासाहेब थोरात हे मंत्रिपदाची शपथ घेणार असल्याचं, पीटीआयच्या बातमीत म्हटलं आहे. या शपथविधी सोहळ्यासाठी देशभरातल्या प्रमुख राजकीय पक्षांच्या नेत्यांना आमंत्रित करण्यात आलं आहे. यामध्ये पंतप्रधान नरेंद्र मोदी, कॉंग्रेस अध्यक्षा सोनिया गांधी, पश्चिम बंगालच्या मुख्यमंत्री ममता बॅनर्जी, दिल्लीचे मुख्यमंत्री अरविंद केजरीवाल, मध्य प्रदेशचे मुख्यमंत्री कमलनाथ, छत्तीसगडचे मुख्यमंत्री भूपेश बघेल, द्रमुकचे अध्यक्ष एम के स्टॅलिन, यांचा समावेश आहे. याशिवाय राज्यभरातून ५०० शेतकरी या शपथविधी सोहळ्यास उपस्थित असतील.

दरम्यान, शिवाजी पार्कवर शपथविधी सोहळा होणार असल्यानं मुंबई उच्च न्यायालयानं सुरक्षेच्या मुद्यावरुन चिंता व्यक्त केली आहे. शिवाजी पार्क हे खेळाचं मैदान आहे की मनोरंजनाचं, असा प्रश्न उपस्थित करणाऱ्या याचिकेवर काल सुनावणी घेताना न्यायालयानं, सार्वजनिक जागेवर असे कार्यक्रम घेण्याची प्रथा पडता कामा नये, असं म्हटलं. या कार्यक्रमाबद्दल काहीही बोलणार नसून, यावेळी काही अनुचित प्रकार घडू नये, अशी प्रार्थना करत असल्याचं न्यायालयानं म्हटलं आहे.

****

अमरावती जिल्ह्यात यंदाच्या शासकीय कापूस खरेदीला जिल्हाधिकारी शैलेश नवाल यांच्या हस्ते करण्यात प्रारंभ आला. शेतकऱ्यांना कापूस वेचणी यंत्रासह इतरही साहित्य पुरवण्यात येईल, वेगवेगळ्या प्रयोगांसाठी शेतकऱ्यांना जिल्हा प्रशासन सहकार्य करेल असं जिल्हाधिकाऱ्यांनी यावेळी सांगितलं.

****

गोव्यात पणजी इथं सुरू असलेल्या पन्नासाव्या आंतरराष्ट्रीय चित्रपट महोत्सवाचा आज समारोप होत आहे. गेल्या आठ दिवसांपासून सुरू असलेल्या या आशियातल्या सर्वात मोठ्या चित्रपट महोत्सवात विविध विषयांवरची तीस पेक्षा अधिक चर्चासत्रं झाली, तसंच विविध भाषेतले अनेक चित्रपट दाखवण्यात आले.

****