Text-आकाशवाणी छत्रपती संभाजीनगर - दिनांक 14.08.2025 रोजीचे सायंकाळी 06.10 वाजेचे मराठी बातमीपत्र

 Regional Marathi Text Bulletin, Chhatrapati Sambhajinagar

Date – 14 August 2025

Time 18.10 to 18.20

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक – १४ ऑगस्ट २०२५ सायंकाळी ६.१०

****

·      एकोणऐंशीव्या स्वातंत्र्यदिनाच्या पूर्वसंध्येला राष्ट्रपती द्रौपदी मुर्मू देशवासियांना संबोधित करणार

·      देशभरात पोलीस, गृहरक्षक, सुधारात्मक सेवेतल्या उत्कृष्ट कार्यासाठी सेवा आणि शौर्य पदकं जाहीर

·      हर घर तिरंगा मोहिमेला उत्स्फुर्त प्रतिसाद-नागरिकांकडून सुमारे तीन कोटी सेल्फी अपलोड

आणि

·      वोट चोरी शब्दावर केंद्रीय निवडणूक आयोगाचा आक्षेप

****

देशाचा एकोणऐंशीवा स्वातंत्र्यदिन उद्या साजरा होत आहे. स्वातंत्र्यदिनाच्या पूर्वसंध्येला राष्ट्रपती द्रौपदी मुर्मू देशवासियांना संबोधित करणार आहेत. सायंकाळी सात वाजल्यापासून आकाशवाणी आणि दूरदर्शनच्या सर्व केंद्रांवरून राष्ट्रपतींचं संबोधन प्रथम हिंदी आणि नंतर इंग्रजी भाषेतून प्रसारित केलं जाईल. या संबोधनाचा स्थानिक भाषांमधला अनुवाद रात्री साडेनऊ वाजता प्रसारित होईल.

****

पंतप्रधान नरेंद्र मोदी यांच्या हस्ते उद्या नवी दिल्लीत लाल किल्ल्यावर ध्वजारोहण होणार आहे. त्यानंतर ते राष्ट्राला संबोधित करतील. यावर्षीच्या स्वातंत्र्य दिन सोहळ्याची संकल्पना ‘नवा भारत’ अशी आहे. या सोहळ्यासाठी देशभरातून पाच हजारावर विशेष पाहुणे आमंत्रित आहेत, राज्यातील लखपती दीदी, बचत गटाच्या प्रमुख आणि आत्मनिर्भर क्लस्टर लेव्हल फेडरेशन पुरस्कार विजेत्या दीदी अशा एकूण २० महिलांनाही या सोहळ्याचं आमंत्रण देण्यात आलं आहे.

****

राज्यातला मुख्य शासकीय सोहळा मुंबईत मंत्रालयात होणार असून, मुख्यमंत्री देवेंद्र फडणवीस यांच्या हस्ते ध्वजारोहण होईल. राज्यपाल सी. पी. राधाकृष्णन यांच्या हस्ते पुण्यात ध्वजारोहण होणार आहे. मराठवाड्यात छत्रपती संभाजीनगर इथं पालकमंत्री संजय शिरसाट यांच्या हस्ते, तर बीड इथं पालकमंत्री तथा उपमुख्यमंत्री अजित पवार यांच्या हस्ते ध्वजारोहण होणार आहे. जालना इथं पालकमंत्री पंकजा मुंडे, परभणी- पालकमंत्री मेघना बोर्डीकर, हिंगोली- पालकमंत्री नरहरी झिरवाळ, नांदेड- पालकमंत्री अतुल सावे, लातूर- पालकमंत्री शिवेंद्र राजे भोसले तर धाराशिव इथं पालकमंत्री प्रताप सरनार्इक यांच्याहस्ते ध्वजारोहण होणार आहे.

****

स्वातंत्र्यदिनाच्या पार्श्वभूमीवर एक हजार ९० पोलीस, अग्निशमन कर्मचारी, होमगार्ड, नागरी संरक्षण आणि सुधारात्मक सेवेतल्या कर्मचाऱ्यांना सेवा आणि शौर्य पदकं जाहीर झाली आहेत. यामध्ये महाराष्ट्रातल्या पोलीस सेवेतल्या ४९, अग्निशमन सेवेतल्या आठ, गृहरक्षक दल पाच, तर सुधारात्मक सेवेतल्या आठ कर्मचाऱ्यांना सन्मानित करण्यात येणार आहे. सीमा सुरक्षा दलानेही १६ सैनिकांना अत्युत्तम वीरतेसाठी शौर्य पदकं जाहीर केली आहेत.

नक्षलवाद्यांविरुद्ध शौर्याने लढणाऱ्या गडचिरोली पोलिस दलातील ७ अधिकारी आणि अंमलदारांना राष्ट्रपतींचं शौर्यपदक जाहीर झालं आहे.

****

विभाजन विभिषिका दिवस आज पाळण्यात येत आहे. स्वातंत्र्याच्या उंबरठ्यावर देशाची झालेली फाळणी आणि त्यावेळेस झालेल्या भीषण संहाराच्या स्मृत्यर्थ हा दिवस पाळला जातो. या अनुषंगाने देशभरात आज फाळणीच्या आठवणी दाखवणाऱ्या छायाचित्र प्रदर्शनांसह विविध उपक्रम राबवण्यात येत आहेत.

****

हर घर तिरंगा अभियानाचं यंदाचं हे चौथं वर्ष आहे. या मोहिमेच्या पोर्टलवर आतापर्यंत तिरंग्यासह काढलेल्या सुमारे तीन कोटी सेल्फी अपलोड झाल्या आहेत. या मोहिमेचा संक्षिप्त आढावा घेणारा हा वृत्तांत –

राष्ट्रध्वज म्हणजे राष्ट्रीय अस्मितेचं प्रतीक. आकाशात डौलाने फडकणारा तिरंगा, मनामनातली राष्ट्रभक्तीची भावना जागृत ठेवतो. एकीकडे पाश्चिमात्य देशांतले लोक त्यांचा राष्ट्रध्वज मुक्तपणे मिरवत असतांना, आपल्याकडे मात्र राष्ट्रध्वजाबाबतच्या नियमावलीमुळे, त्याला दुरुन अभिवादन करण्याचीच सर्वसामान्यांना मुभा होती. मात्र पंतप्रधान नरेंद्र मोदी यांनी २०२२ मध्ये राष्ट्रध्वजाच्या या नियमांत सकारात्मक बदल केले, आणि देशभरातल्या नागारिकांना आपल्या घरावर तिरंगा फडवण्याचं आवाहन केलं. पंतप्रधानांच्या पुढाकारातून सुरू झालेल्या हर घर तिरंगा मोहिमेचं हे चौथं वर्ष. आपल्या घरी तिरंग्यासोबत काढलेल्या सेल्फींचा या मोहिमेच्या पोर्टलवर अक्षरश: पाऊस पडतोय.

हर्षवर्धन दीक्षित, आकाशवाणी छत्रपती संभाजीनगर

 

छत्रपती संभाजीनगर इथे “हर घर तिरंगा” उपक्रमांतर्गत स्क्रॅप बँडचं दिमाखदार सादरीकरण करण्यात आलं. महानगरपालिका आयुक्त जी. श्रीकांत यांच्या संकल्पनेतून साकार झालेल्या या उपक्रमात, महापालिकेच्या मुकूंदवाडी इथल्या केंद्रीय प्राथमिक आणि माध्यमिक विद्यालयातल्या विद्यार्थ्यांनी देशभक्तीपर गीतांच्या विविध सुरावटी सादर केल्या.

बीड शहरात आज तिरंगा फेरी काढण्यात आली. या फेरीत राजकीय पक्षाचे पदाधिकारी, सर्वसामान्य नागरिक सहभागी झाले होते. जालना जिल्ह्यात सर्वांनी हर घर तिरंगा अभियान साजरं करावं, असं आवाहन जिल्हाधिकाऱ्यांनी केलं आहे.

परभणी शहरापासून जवळ असलेल्या श्री क्षेत्र त्रिधारा इथे ओंकारेश्वर विद्यालयाच्या वतीने “तिरंगा फेरी” आणि “राष्ट्रध्वज सन्मान पथदर्शन” करण्यात आलं. केंद्र प्रमुख माणिक चव्हाण आणि माहिती अधिकारी प्रभाकर बारहाते यांनी या फेरीला हिरवा झेंडा दाखवला.

हिंगोली जिल्ह्यात भव्य तिरंगा फेऱ्या काढण्यात आल्या. कळमनुरी इथे काढलेल्या तिरंगा रॅलीत  भाजपा जिल्हाध्यक्ष गजानन घुगे यांच्यासह अनेक नागरिक आणि शालेय विद्यार्थी, मोठ्या संख्येने सहभागी झाले.

नांदेड च्या स्वामी रामानंद तीर्थ मराठवाडा विद्यापीठामध्ये राष्ट्रीय सेवा योजनेच्या वतीनं हर घर तिरंगा अभियानांतर्गत भव्य तिरंगा रॅली काढण्यात आली.  विद्यापीठाचे प्र-कुलगुरू डॉ. अशोक महाजन यांनी तिरंगा झेंडा दाखवून या रॅलीचं उद्घाट्न केलं

नशा मुक्त भारत नशा मुक्त धाराशिव या अभियानांतर्गत आज धाराशिव इथं येरमाळ्याच्या येडाई व्यसनमुक्ती केंद्राच्या वतीने व्यसनमुक्ती जनजागृती फेरी काढण्यात आली.

एकल महिलांना सामाजिक प्रतिष्ठा देण्याच्या उद्देशाने लातूर जिल्ह्यातल्या उदगीर तालुक्यात चांदेगावच्या जिल्हा परिषद शाळेत एकल महिलेच्या हस्ते ध्वजारोहण करण्यात आलं.

राज्यभरात विविध ठिकाणी अनेकविध उपक्रमांच्या माध्यमातून हर घर तिरंगा अभियान साजरं झालं.

****

राजकीय व्यक्तींकडून वापरण्यात येणाऱ्या वोट चोरी या शब्दावर केंद्रीय निवडणूक आयोगानं आक्षेप घेतला आहे. अशा प्रकारचे शब्द मतदारांच्या प्रतिष्ठेवर आणि आयोगाच्या प्रामाणिकपणावर आघात असल्याचं आयोगाने म्हटलं आहे. एक व्यक्ती एक मत हे तत्त्व पहिल्या निवडणुकीपासून लागू असून बोगस मतदानाच्या तक्रारी पुराव्यानिशी सादर केल्या पाहिजेत, असंही आयोगानं म्हटलं आहे.

****

मुख्यमंत्री देवेंद्र फडणवीस यांच्या हस्ते आज मुंबई महानगर प्रदेश विकास प्राधिकरण आणि बृहन्मुंबई महापालिकेच्या विविध प्रकल्पांचं उद्घाटन तसंच लोकार्पण करण्यात आलं. मुंबईतले दोन महत्त्वाचे पूलही मुख्यमंत्र्यांच्या हस्ते राष्ट्राला अर्पण करण्यात आले. यामुळे पूर्व आणि पश्चिम उपनगर प्रवासाच्या वेळेत बचत होणार आहे. मुंबईतील कोस्टल रोड नागरिकांसाठी उद्या स्वातंत्र्यदिनापासून २४ तास खुला असणार आहे. बीडीडी चाळ वासियांना पुनर्विकासातून साकारलेल्या ५५६ सदनिकांचं वितरणही मुख्यमंत्र्यांच्या हस्ते आज करण्यात आलं.

****

दरम्यान, मुंबईतल्या डबेवाल्यांनी तयार केलेली कोडिंग पद्धत संगणकापेक्षा अचूक असल्याचं, मुख्यमंत्री देवेंद्र फडणवीस यांनी म्हटलं आहे. आज मुंबईत डब्बेवाला आंतरराष्ट्रीय अनुभव केंद्राचे उद्घाटन केल्यानंतर बोलतांना मुख्यमंत्री म्हणाले –

बाईट - मुख्यमंत्री देवेंद्र फडणवीस

****

रुग्णांना उपचार सुविधा देण्यात शासनासोबतच खाजगी संस्थांचाही सहभाग असल्याचं, उपमुख्यमंत्री अजित पवार यांनी म्हटलं आहे. छत्रपती संभाजी नगर इथे कर्नावट कर्करोग रुग्णालयाच्या उद्घाटनप्रसंगी आज ते बोलत होते. कर्करोगावरील उपचारांबाबत संशोधन होत आहे, मात्र कर्करोग होऊच नये यासाठी आपल्या दैनंदिन जीवनमानात तसंच आहारात बदल करणं आवश्यक असल्याचं मत, उपमुख्यमंत्री अजित पवार यांनी यावेळी व्यक्त केलं.

****

मुला-मुलींमध्ये भेद करणारी मानसिकता बदलण्याचं आवाहन राज्याचे सामाजिक न्याय मंत्री तथा छत्रपती संभाजीनगरचे पालकमंत्री संजय शिरसाट यांनी केलं आहे. छत्रपती संभाजीनगर शहरानजीक पंढरपूर इथे कन्या सन्मान दिवस या उपक्रमात ते आज बोलत होते. कन्या जन्माचं स्वागत करुन मुलींचा जन्मदर वृद्धिंगत करण्यास चालना देण्यासाठी ‘कन्या सन्मान दिवस’ आज छत्रपती संभाजीनगरच्या सर्व मंडळ मुख्यालयात साजरा करण्यात आला.

****

महाराष्ट्र बॅडमिंटन असोसिएशनच्या वतीने नागपूर इथे झालेल्या राज्यस्तरीय योनेक्स-सनराईज जी.एच. रायसोनी मेमोरियल, महाराष्ट्र सब-ज्युनिअर निवड बॅडमिंटन स्पर्धेत छत्रपती संभाजीनगरच्या सार्थक नलावडे आणि नागपूरच्या दितीषा सोमकुवार यांनी १७ वर्षाखालील मिश्र दुहेरी गटात सुवर्णपदक पटकावलं. सार्थक नलावडे याची ओडिशात भुवनेश्वर इथल्या शासकीय साई ॲकॅडमीत क्रीडा प्रशिक्षणासाठी निवड झाली आहे.

****

हवामान

राज्याच्या बहुतांश भागात विजांच्या कडकडाटासह पावसाची शक्यता आहे. कोकण तसंच विदर्भातल्या काही जिल्ह्यांना ऑरेंज अलर्ट तर मराठवाड्यात सर्व आठही जिल्ह्यांना यलो अलर्ट देण्यात आला आहे.

****