आकाशवाणी छत्रपती संभाजीनगर - दिनांक 06.10.2026 रोजीचे दुपारी 01.00 वाजेचे मराठी बातमीपत्र

Regional Marathi Text Bulletin, Chhatrapati Sambhajinagar

Date - 06 October 2026

Time 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ०६ ऑक्टोबर २०२६ दुपारी १.०० वा.

****

राज्यातल्या सर्व धरणांमध्ये सध्या ७४ पूर्णांक १७ टक्के उपयुक्त पाणीसाठा आहे. राज्यातल्या प्रमुख, मध्यम आणि लघु प्रकल्पांसह एकूण ३ हजार ३२ धरणांमध्ये ३० हजार २७१ पूर्णांक १० दशलक्ष घनमीटर उपयुक्त पाणीसाठा आहे. गेल्या वर्षी ६ ऑक्टोबर रोजी हा साठा ८९ पूर्णांक ५७ टक्के होता. त्या तुलनेत यंदा पाणीसाठ्यात घट झाली आहे.

कोकण विभागात सर्वाधिक ९० पूर्णांक २५ टक्के तर छत्रपती संभाजीनगर विभागात सर्वात कमी, सुमारे ४४ टक्के उपयुक्त पाणीसाठा आहे. पुणे विभागात ८५ पूर्णांक ४८, नाशिकमध्ये ८१ पूर्णांक ६६, नागपूरमध्ये ७१ पूर्णांक ७८ आणि अमरावती विभागात ६२ पूर्णांक ८३ टक्के पाणीसाठा आहे.

छत्रपती संभाजीनगर विभागातल्या ९२९ धरणांमध्ये ३ हजार २१२ पूर्णांक ९० दशलक्ष घनमीटर पाणीसाठा असून, जायकवाडी धरणात ७८ पूर्णांक ६६ टक्के, येलदरीत ६१ पूर्णांक ३८, विष्णुपुरीत ८१ पूर्णांक ७३, तर माजलगाव धरणात २६ पूर्णांक ३४ टक्के उपयुक्त पाणीसाठा आहे.

राज्यातल्या धरणांमधला पाणीसाठा गेल्या वर्षीच्या तुलनेत कमी असला, तरी पुणे, नाशिक आणि कोकण विभागातल्या प्रमुख प्रकल्पांमध्ये पाणीसाठ्याची स्थिती समाधानकारक आहे. तर, छत्रपती संभाजीनगर विभागातला पाणीसाठा राज्याच्या सरासरीपेक्षा कमी असल्याचं दिसून येत आहे.

****

राज्य विधानपरिषदेच्या पाच जागांसाठी होणाऱ्या द्वैवार्षिक निवडणुकीसाठी उमेदवारी अर्ज दाखल करण्याचा आज शेवटचा दिवस आहे. औरंगाबाद पदवीधर मतदारसंघातून राष्ट्रवादी काँग्रेसचे सतीश चव्हाण, तर महाविकास आघाडीकडून शिवसेना उद्धव बाळासाहेब ठाकरे पक्षाचे दिलीप घुगे यांनी उमेदवारी अर्ज दाखल केला. उमेदवारी अर्जांची छाननी उद्या होणार असून, शुक्रवारपर्यंत अर्ज मागे घेता येणार आहेत. २३ ऑक्टोबरला मतदान, तर २७ ऑक्टोबरला मतमोजणी होईल.

****

भारताच्या स्वदेशी जहाजबांधणी क्षमतेचं महत्त्वपूर्ण प्रात्यक्षिक म्हणून संरक्षण मंत्री राजनाथ सिंह यांच्या हस्ते आज विशाखापट्टणममध्ये हिंदुस्तान शिपयार्ड लिमिटेडमध्ये ‘फ्लीट सपोर्ट शिप-1’ चं जलावतरण आणि ‘फ्लीट सपोर्ट शिप-5’ ची पायाभरणी करण्यात आली. यासोबतच अद्ययावत स्लिपवे-4 आणि ३०० टन क्षमतेच्या गॉलियाथ क्रेनचं उद्घाटनही त्यांच्या हस्ते झालं. या सुविधांमुळे मोठ्या आणि गुंतागुंतीच्या जहाजांची निर्मिती करण्याची शिपयार्डची क्षमता वाढणार आहे. फ्लीट सपोर्ट नौकेमुळे भारतीय नौदलाच्या युद्धनौकांना इंधन, पाणी आणि अन्य सामग्रीचा पुरवठा होणार असल्यानं या युद्धनौका अधिक काळ तैनात राहू शकणार आहेत.

****

सखोल पुनरीक्षण प्रक्रियेतल्या कथित घोटाळ्याच्या मुद्द्यावरून आज विरोधी पक्षांनी दिल्लीत संसद भवनापासून निवडणूक आयोगाच्या मुख्यालयापर्यंत निषेध मोर्चा काढण्याचा प्रयत्न केला, मात्र या मोर्चाला अकाशवाणी भवनापाशी सुरक्षा कर्मचाऱ्यांनी अडवलं. यानंतर हे आंदोलक संसद रस्त्यावर बसून राहिले. या मोर्चात काँग्रेस अध्यक्ष मल्लिकार्जुन खरगे, लोकसभेतले विरोधी पक्ष नेते राहुल गांधी यांच्यासह अन्य विरोधी पक्षांचे खासदार सहभागी झाले होते.

****

देशाची, दूरदृष्यप्रणालीद्वारे औषधौपचार देणारी सेवा, ई-संजीवनीनं पन्नास कोटी वैद्यकीय सल्ल्यांचा टप्पा पार केला आहे. देशभरातल्या लोकांना आधुनिक तंत्रज्ञानाच्या मदतीनं गुणवत्तापूर्ण आरोग्यसेवा मिळाव्यात, यासाठीच्या सरकारच्या प्रयत्नांचा ई-संजीवनी एक भाग आहे. या सेवेमुळे देशाच्या ग्रामीण तसंच दुर्गम भागातल्या नागरिकांपर्यंत आरोग्यसेवा पोहचवणं शक्य झालं असल्याचं केंद्रीय आरोग्य आणि कुटुंब कल्याण मंत्रालयानं म्हटलं आहे.

****

सेवा संकल्प अभियानांतर्गत लातूर जिल्ह्यातल्या सर्व दहा तालुक्यांमधल्या दिव्यांग बांधवांना युनिक डिसॅबिलिटी आयडी अर्थात युडीआयडी प्रमाणपत्र मिळवून देण्यासाठी विशेष शिबिरं घेण्यात येणार आहेत. उदगीर, देवणी आणि जळकोट तालुक्यांसाठी उदगीर इथल्या सामान्य रुग्णालयात १४ ऑक्टोबर रोजी, तर अहमदपूर आणि चाकूर तालुक्यांसाठी अहमदपूर ग्रामीण रुग्णालयात १६ ऑक्टोबर रोजी हे शिबिरं होणार आहेत.

दरम्यान, शासकीय योजनांची माहिती सर्वसामान्यांपर्यंत पोहोचवून पात्र लाभार्थ्यांना त्याचा लाभ मिळवून देण्यासाठी लातूर इथं येत्या २४ ऑक्टोबर रोजी शासकीय योजनांचा महामेळावा आणि महा विधी सेवा शिबिर आयोजित करण्यात आलं आहे.

****

भारतीय महिला क्रिकेट संघाची कर्णधार हरमनप्रीत कौर हिने तिन्ही प्रकारांतल्या कर्णधारपदाचा राजीनामा दिला आहे. गुवाहाटी इथं झालेल्या बीसीसीआयच्या आढावा बैठकीनंतर हरमनप्रीतने हा निर्णय जाहीर केला. कर्णधारपद सोडलं असलं तरी, हरमनप्रीत यापुढेही खेळाडू म्हणून तिन्ही प्रकारांत देशाचं प्रतिनिधित्व करणार आहे.

****