Regional Urdu Text Bulletin, Chatrapati Sambhajinagar
Date: 30 January-2025
Time: 09:00-09:10 am
آکاشوانی چھترپتی سمبھاجی نگر
علاقائی خبریں
تاریخ: ۰۳/ جنوری ۵۲۰۲ء
وقت: ۰۱:۹-۰۰:۹
***** ***** *****
::::: سرخیاں::::::
پیش ہے خاص خبروں کی سرخیاں:
٭ پارلیمنٹ کے بجٹ اجلاس کے ضمن میں آج کُل جماعتی اجلاس کا انعقاد۔
٭ وقف ترمیمی بل اور ترمیمی مسودے کو پارلیمانی کمیٹی کی منظوری۔
٭ پریاگ راج کے مہاکمبھ میں مونی اَماوس کے موقعے پر سات کروڑ سے زائد عقیدت مندوں کا غسل‘ بھگدڑ میں 30 افراد کی موت۔
٭ عوامی فنون اور عوامی موسیقی تعلیم کیلئے ریاستی حکومت کی جانب سے خصوصی اسکالر شپ کا اعلان۔
٭ طلبہ اِسکرین ٹائم کم کرکے اپنی صلاحیتوں کو نکھاریں: گورنر کی اپیل۔
اور۔۔۔٭ تمام سرکاری عمارتوں کو مقررہ مدت میں شمسی توانائی منصوبے سے لیس کرنے کے نائب وزیرِ اعلیٰ اجیت پوار کے احکامات۔
***** ***** *****
اب خبریں تفصیل سے:
پارلیمنٹ کے بجٹ اجلاس کے پیشِ نظر مرکزی حکومت نے کل‘کُل جماعت میٹنگ بلائی ہے۔ بجٹ اجلاس کل 31 جنوری سے شروع ہوگا۔ ہفتہ یکم فروری کو مرکزی وزیرِ خزانہ نرملا سیتا رمن پارلیمنٹ میں مالی سال 2025-26 کا بجٹ پیش کریں گی۔ بجٹ اجلاس کا پہلا مرحلہ 13 فروری تک چلے گا، جبکہ دوسرا مرحلہ 10 مارچ سے 4 اپریل تک چلے گا۔
***** ***** *****
مشترکہ پارلیمانی کمیٹی نے وقف ترمیمی بل کے مسودے اور ترمیم شدہ بل کو کثرتِ رائے سے منظوری دے دی ہے۔ کمیٹی کے صدر جگدمپیکا پال نے کل نئی دہلی میں یہ اطلاع دی۔ یہ رپورٹ آج لوک سبھا اسپیکر اوم برلا کو سونپی جائے گی۔
دریں اثناء‘ اپوزیشن کے ارکان نے اس رپورٹ پر سوال اٹھائے ہیں۔ڈی ایم کے لیڈر ڈی راجہ نے اپنی رائے ظاہر کی ہے کہ اس رپورٹ کو جلد بازی میں قبول کیا گیا۔ ترنمول کانگریس کے کلیان بینرجی اور شیوسینا اُدّھو بالا صاحب ٹھاکرے گروپ کے اروند ساونت نے اس رپورٹ کے خلاف ووٹ دیا۔
***** ***** *****
اُترپردیش کے پریاگ راج میں مہاکمبھ میں مونی اَماوس کے دِن کل شام تک سات کروڑ سے زائد عقیدت مندوں نے غسل کیا۔ دنیا کی اس بڑی مذہبی تقریب میں 13 جنوری سے اب تک 27 کروڑ سے زائد عقیدت مند غسل کرچکے ہیں۔ کل‘ مونی اماوس پر امرت غسل کے دوران بھگدڑ مچنے سے 30 عقیدت مند ہلاک اور 60 زخمی ہوگئے۔ مہاکمبھ کے ڈپٹی انسپکٹر جنرل آف پولس ویبھو کرشنا نے ایک پریس کانفرنس میں یہ اطلاع دی۔ کرشنا نے بتایا کہ رکاوٹیں ٹوٹنے کی وجہ سے اکھاڑے کے راستے پر سوئے ہوئے عقیدت مند دوسرے عقیدت مندوں کے پیروں کے نیچے دب کر زخمی ہوگئے۔
صدرِ جمہوریہ دروپدی مُرمو اور وزیرِ اعظم نریندر مودی نے اس واقعے پر غم کا اظہار کیا ہے۔ اُترپردیش حکومت نے اس سانحے میں مرنے والوں کے لواحقین کو 25 لاکھ روپئے کی مدد کا اعلان کیا ہے۔ وزیرِ اعلیٰ یوگی آدتیہ ناتھ نے اس معاملے میں تین رُکنی عدالتی تحقیقات کا اعلان کیا ہے۔
***** ***** *****
مرکزی کابینہ نے کل اہم معدنیات کی قومی مہم کو منظوری دی۔ مرکزی اطلاعات و نشریات کے وزیر اشونی ویشنو نے ایک پریس کانفرنس میں یہ اطلاع دی۔ اس مہم کیلئے 24 معدنیات کی نشاندی ہی کی گئی ہے، جس میں لیتھیم‘ کوبالٹ اور نکل جیسی معدنیات کی کانکنی اور دیگر پروسیسنگ پر توجہ دی گئی ہے۔ مرکزی کابینہ نے کل گنے اور گنے کی کشید سے پیدا ہونے والے ایتھینال کے نرخوں کو بھی منظوری دی۔ ویشنو نے بتایا کہ ایندھن میں ایتھینال کی آمیزش کی وجہ سے ایک لاکھ تیرہ ہزار کروڑ روپئے کی غیر ملکی کرنسی کی بچت ہوئی ہے اور کسانوں کو چالیس ہزار کروڑ روپئے سے زیادہ کی آمدنی ہوئی ہے۔
***** ***** *****
یومِ جمہوریہ کی تقاریب کا اختتام کل Beating the Retreat پروگرام سے ہوا۔ نئی دہلی کے وجئے چوک میں منعقدہ تقریب میں صدرِ جمہوریہ دروپدی مُرمو‘ نائب صدر جگدیپ دھنکڑ‘ وزیرِ اعظم نریندر مودی‘ وزیرِ دفاع راجناتھ سنگھ اور دیگر مرکزی وزراء موجود تھے۔ اس تقریب میں آرمی‘ بحریہ‘ فضائیہ اور مرکزی مسلح پولس دستوں کے بینڈ کے ذریعے 30 مختلف کردار پیش کیے گئے۔
دریں اثناء‘ اُترپردیش کے تصویری رتھ نے یومِ جمہوریہ کے پریڈ میں بہترین تصویری رتھ کا ایوارڈ حاصل کیا ہے۔ یہ رتھ مہاکمبھ کے موضوع پر مبنی تھا۔ تریپورہ کے تصویری رتھ نے دوسرا اور آندھرا پردیش کے رتھ نے تیسرا انعام حاصل کیا ہے۔
***** ***** *****
ریاستی حکومت نے عوامی فنون اور عوامی موسیقی کی تعلیم کیلئے خصوصی اسکالر شپ اسکیم کا اعلان کیا ہے۔ ثقافتی اُمور کے وزیر آشیش شیلار نے کل چھترپتی سمبھاجی نگر میں یہ اطلاع دی۔ انھوں نے کہا کہ وہ لوگ جو مہاراشٹر میں عوامی فن اور عوامی موسیقی سیکھنا چاہتے ہیں بدقسمتی سے انھیں مالی کمی کی وجہ سے اس موقع کو نہیں کھونا چاہیے۔ پہلی بار ہم ہر سال 24 طلبہ کیلئے ایک اسکالر شپ کا اعلان کررہے ہیں۔ اس میں ہر ماہ پانچ ہزار روپئے بطورِ اسکالر شپ ملیں گے۔ شیلار نے کہا کہ 50 ایکڑ اراضی جلد ہی آئی ٹی کمپنیوں کو آرک سٹی چھترپتی سمبھاجی نگر میں فراہم کی جائیگی۔ انھوں نے کہا کہ اس سے ہرسال دس ہزار سے زائد ملازمتیں پیدا ہوں گی۔ اس کے علاوہ ڈرون صنعت کیلئے بھی کوششیں کی جائیں گی۔
***** ***** *****
یہ خبریں آکاشوانی چھترپتی سمبھاجی نگر سے نشر کی جارہی ہیں۔
***** ***** *****
گورنر سی پی رادھا کرشنن نے طلبہ سے اپیل کی ہے کہ وہ اپنا اسکرین ٹائم کم کریں اور اپنی صلاحیتوں کو نکھاریں۔وہ کل ناندیڑ کی سوامی رامانند تیرتھ یونیورسٹی کے جلسہئ تقسیمِ اسناد سے خطاب کررہے تھے۔ یونیورسٹی میں سب سے زیادہ نشانات حاصل کرنے والے پربھنی کے بی رگھوناتھ آرٹس کامرس اور سائنس کالج کی طالبہ شردّھا ہرہرے کو گورنرکے ہاتھوں ناندیڑ چانسلر سونے کے تمغے سے سرفراز کیا گیا۔
دریں اثناء‘ سوامی رامانند تیرتھ مراٹھواڑہ یونیورسٹی کی جانب سے مراٹھواڑہ مکتی سنگرام دِن اور یونیورسٹی کے یومِ تاسیس کی مناسبت سے 2023-24 اس سال کے انعامات کی تقسیم آج ہوگی۔ اس سال کا لائف ٹائم اچیومنٹ ایوارڈ پربھنی ضلع کے جھری کے سوریہ کانت راؤ دیشمکھ کو ملا ہے۔
***** ***** *****
بابائے قومی مہاتما گاندھی کی برسی آج یومِ شہداء کے طور پر منائی جارہی ہے۔ ملک بھر میں صبح گیارہ بجکر گیارہ منٹ پر دو منٹ کی خاموشی اختیار کی جائے گی۔
***** ***** *****
نائب وزیرِ اعلیٰ اور وزیرِ خزانہ اجیت پوار نے ریاست کی تمام سرکاری عمارتوں کو مقررہ مدت میں شمسی توانائی کے ذریعے بجلی فراہم کرنے کی ہدایات دی ہیں۔ وہ کل اس سلسلے میں منعقدہ اجلاس سے خطاب کررہے تھے۔ انھوں نے کہا کہ اب تک ریاست میں ایک ہزار 157 سرکاری عمارتوں پر شمسی توانائی کے منصوبے لگائے گئے ہیں اور ان منصوبوں کو بقیہ 332 سرکاری عمارتوں پر فوری طور پر لگایاجائے گا۔
دریں اثناء‘ اجیت پوار آج بیڑ کا دورہ کررہے ہیں۔ ضلعی منصوبہ بندی کمیٹی کا اجلاس کلکٹر دفتر میں ان کی سربراہی میں منعقد ہوگا۔
***** ***** *****
پربھنی میں کل رابطہ وزیر میگھنا بورڈیکر نے پلاننگ کمیٹی کی میٹنگ منعقد کی۔ انھوں نے یقین کا اظہار کیا کہ جلد ہی ضلع میں مثبت تبدیلیاں دیکھنے کو ملیں گی اور انسانی ترقی کے اشاریہ میں اضافہ ہوگا۔ انھوں نے تمام افسران کو ہدایات دی ہیں کہ کام میں سستی نہ کریں۔ ہمارے انتظام سے عوام صحیح معنوں میں خوش ہوگی۔ انھوں نے انسانی ترقی کے انڈیکس کو بڑھانے کی کوشش کرنے‘ ساتھ ہی کسانوں کی آمدنی بڑھانے اور ضلع پریشد اسکول میں زیرِ تعلیم طلبہ کو بہتر تعلیم دلوانے کے عزم کا بھی اظہار کیا۔
***** ***** *****
اتراکھنڈ میں جاری قومی کھیل مقابلوں میں مردوں کے ٹرائیتھلون مقابلے میں مہاراشٹر کے پارتھ سچن مِیراج نے کانسے کا تمغہ جیتا، جبکہ ڈالی پاٹل نے خواتین کے انفرادی ٹرائیتھلون مقابلے میں سونے اور مانسی موہیتے نے چاندی کا تمغہ اپنے نام کیا۔ دو گولڈ میڈلز سمیت کُل چار تمغوں کے ساتھ مہاراشٹرمیڈل ٹیلی میں سرِفہرست مقام پر ہے۔
***** ***** *****
دھاراشیو ضلع میں قومی تعلیمی پالیسی کے تحت مختلف اقدامات کے سبب سالانہ تعلیمی رپورٹ سروے میں، ضلعے نے چھترپتی سمبھاجی نگر ڈویژن میں سرِفہرست مقام حاصل کیا ہے۔ قومی تعلیمی پالیسی 2020 کے مقاصد کے مطابق، دھاراشیو ضلع میں ضلع پریشد کے محکمہ تعلیم نے جامع معیاری ترقی منصوبہ، ماڈل اسکول، پرس باگ، رِیڈ دھاراشیو، اور دیہی تعلیمی مراکز کے قیام جیسے اقدامات پر عمل درآمد کرکے تعلیمی سرگرمیوں کو فروغ دینے کی کوششیں کی ہیں۔ پانچویں تا آٹھویں جماعت کے طلباء کو زبان اور ریاضی کے مضامین کے مطالعے کی عادت ترغیب دئیے جانے کی وجہ سے دھاراشیو ضلع کو سالانہ تعلیمی رپورٹ سروے میں سرِ فہرست مقام حاصل ہوا ہے۔
***** ***** *****
دھاراشیو ضلع میں ہوئے ایک بس حادثے میں ایک خاتون کی موت اور دیگر 16 خواتین شدید زخمی ہو گئیں۔ کل تلجا پور میں درشن کرنے کے بعد ایک خانگی بس سے واپسی کے دوران شولاپور گھاٹ پر یہ حادثہ پیش آیا۔دھاراشیو کے اسپتال میں زخمیوں کاعلاج کیا جارہا ہے۔
***** ***** *****
چھترپتی سمبھاجی نگر میونسپل کارپوریشن کے املاک ٹیکس کے بقایہ جات کے سود پر کسی قسم کی رعایت نہ دئیے جانے کی وضاحت میونسپل کمشنر اور ایڈمنسٹریٹر جی شری کانت نے کی ہے۔ شہر میں اب تک سات کروڑ 53 لاکھ روپے املاک ٹیکس کی وصولی کی گئی ہے اور بقیہ جائیداد مالکان سے مقررہ وقت پر ٹیکس ادا کرنے کی اپیل میونسپل انتظامیہ نے کی ہے۔
***** ***** *****
بیڑ تعلقہ رسد شعبہ کی جانب سے ملازمت سے نکالے گئے مزدوروں کو خدمات پر دوبارہ رجوع کرنے کے مطالبہ پر بیڑ گودام مزدوروں نے حمال ماتھاڑی بورڈ کے سامنے احتجاجی دھرنا شروع کر دیا ہے۔ مظاہرین کا کہنا تھا کہ اس حوالے سے تحریری تیقن دینے کے باوجود اب تک کوئی کارروائی نہ کیے جانے پر انہوں نے یہ احتجاجی مظاہرہ شروع کیا ہے۔
***** ***** *****
::::: سرخیاں::::::
آخرمیں اس بلیٹن کی خاص خبریں ایک بار پھر:
٭ پارلیمنٹ کے بجٹ اجلاس کے ضمن میں آج کُل جماعتی اجلاس کا انعقاد۔
٭ وقف ترمیمی بل اور ترمیمی مسودے کو پارلیمانی کمیٹی کی منظوری۔
٭ پریاگ راج کے مہاکمبھ میں مونی اَماوس کے موقعے پر سات کروڑ سے زائد عقیدت مندوں کا غسل‘ بھگدڑ میں 30 افراد کی موت۔
٭ عوامی فنون اور عوامی موسیقی تعلیم کیلئے ریاستی حکومت کی جانب سے خصوصی اسکالر شپ کا اعلان۔
٭ طلبہ اِسکرین ٹائم کم کرکے اپنی صلاحیتوں کو نکھاریں: گورنر کی اپیل۔
اور۔۔۔٭ تمام سرکاری عمارتوں کو مقررہ مدت میں شمسی توانائی منصوبے سے لیس کرنے کے نائب وزیرِ اعلیٰ اجیت پوار کے احکامات۔
***** ***** *****
No comments:
Post a Comment