Regional Urdu Text Bulletin, Chatrapati Sambhajinagar
Date: 31 May-2025
Time: 09:00-09:10 am
آکاشوانی چھترپتی سمبھاجی نگر
علاقائی خبریں
تاریخ: ۳۱؍ مئی ۲۰۲۵ء
وقت: ۱۰:۹-۰۰:۹
***** ***** *****
::::: سرخیاں::::::
پیش ہے خاص خبروں کی سرخیاں:
٭ دفاعی شعبہ نہ صرف معیشت بلکہ ملک کی عزت نفس کیلئے بھی ضروری ہے - وزیراعظم نریندر مودی کا بیان۔
٭ پنیہ شلوک اہلیا دیوی ہولکر کے 300ویں یوم پیدائش کے موقع پر آج مختلف تقاریب کا انعقاد۔
٭ پونے کےنیشنل ڈیفنس اکیڈمی کے تقسیمِ اسناد تقریب میں 17 خواتین کیڈیٹس کے پہلے دستےکی پاسنگ آؤٹ پریڈ میں شرکت۔
٭ عثمان آباد ریلوے اسٹیشن کا نام تبدیل کرکے دھاراشیو ریلوے اسٹیشن کرنے کا ریلوے محکمے کا فیصلہ۔
٭ ترقی یافتہ زرعی سنکلپ ابھیان کے تحت پربھنی ضلعے میں ماہرین کی جانب سے کسانوں کی رہنمائی۔
اور۔۔۔٭ ایشین ایتھلیٹکس چیمپئن شپ مقابلوں میں بھارتی ایتھلیٹس نے کل جیتے تین گولڈ میڈل ۔
***** ***** *****
اب خبریں تفصیل سے:
وزیر اعظم نریندر مودی نے کہا ہے کہ دفاعی شعبہ نہ صرف معیشت بلکہ ملک کی عزتِ نفس کیلئے بھی ضروری ہے۔ وہ کل اتر پردیش کے کانپور میں ایک جلسۂ عام سے خطاب کررہے تھے۔ وزیر اعظم نے کہا کہ بھارت دہشت گردی کے خلاف لڑائی میں تین اصولوں پر عمل کرے گا۔ انھوں نے کہا:
Byte: PM Narendra Modi
وزیراعظم نے مزید کہا کہ آپریشن سندور ابھی ختم نہیں ہوا، اور اس آپریشن کے ذریعے دنیا نے ہمارے ملک کی خواتین کے غصے اور درد کودیکھاہے، وزیرِ اعظم نے بتایا کہ اس آپریشن میں بھارت نے دیسی اسلحہ جات اور میک ان انڈیا کی طاقت کا مظاہرہ دنیا کے سامنے کیا۔
اس موقعے پر وزیر اعظم نے 47ہزار 573 کروڑ روپے سے زیادہ کے 15 بڑے ترقیاتی منصوبوں کا افتتاح اور سنگ بنیاد رکھا۔ انہوں نے چُنیّ گنج اور نیا گنج کے درمیان کانپور میٹرو کے نئے کوریڈور کو ہری جھنڈی دکھائی۔
اس سے پہلے وزیر اعظم نے بہار کے کاراکٹ میں 48 ہزار 500 کروڑ روپے کے بنیادی ڈھانچے اور فلاحی منصوبوں کا افتتاح اور سنگ بنیاد بھی رکھا۔
***** ***** *****
آج‘ پنیہ شلوک اہلیا بائی ہولکر کا یوم پیدائش منایا جا رہا ہے۔ اس سال اہلیا دیوی کے تین سو ویں یومِ پیدائش کی مناسبت سے مختلف پروگرام منعقد کیے جارہے ہیں۔ اس سلسلے کی ایک اہم تقریب آج ریاستی حکومت کی جانب سے وزیر اعلیٰ دیویندر پھڑنویس کی موجودگی میں اہلیا نگر ضلعے کے چونڈی میں اہلیا بائی کے آبائی گائوں میں منعقد کی جائے گی۔
دریں اثنا، اہلیا بائی ہولکر کے تین سو سالہ یومِ پیدائش کے موقعے پر پونے میں نوجوانوں سے منسوب ایک پروگرام میں، وزیر اعلیٰ پھڑنویس نے ریاستی حکومت کے کام کاج‘ اہلیا بائی ہولکر کے طرزِحکمرانی کے مطابق چلانے کی بات کہی۔ انہوں نے بتایا کہ ریاستی حکومت نے خواتین کی ترقی اور بہتری کیلئے متعدد اسکیمیں شروع کی ہیں، جو خواتین کو بااختیار اور مستحکم بنانے کیلئے اہم ثابت ہوں گی۔
***** ***** *****
صدرِ جمہو ریہ دروپدی مُرمو کے ہا تھوں کل راشٹرپتی بھون میں منعقدہ ایک تقریب میں 15 نرسوں کو نیشنل فلورنس نائٹِنگیل ایوارڈ 2025 سے نوازا گیا۔ نرسنگ کے شعبے میں نمایاں خدمات کے عوض یہ ایوارڈ دیا جاتا ہے۔ اس موقعے پر جلگاؤں کی نرس سجاتا باگُل کو بھی اس اعزاز سے نوازا گیا۔ سماج کی نچلی سطح تک سرکاری طبّی اسکیموں کے فوائد پہنچانے میں ان کے تعاون کے عوض انہیں اس ایوارڈ سے نوازا گیا۔
***** ***** *****
پونے کے نیشنل ڈیفنس اکیڈمی (این ڈی اے) کی 148 ویں تقسیمِ اسناد تقریب کل جوش و خروش کے ساتھ منعقد ہوئی۔ اس تاریخی دن پر پہلی بار 17 خواتین کیڈٹس نے تین سال کی سخت تربیت کے بعد پاسنگ آؤٹ پریڈ میں حصہ لیا۔ پریڈ میں شرکت کے بعد خواتین کیڈٹس نے پش اَپس کرکے اپنی کامیابی کا جشن منایا۔ 2021 میں عدالت ِ عظمیٰ کے حکم پر خواتین کو این ڈی اے میں شامل کیے جانے کے بعد خو اتین کیڈیٹس کا یہ پہلا دستہ ہے۔ میزورم کے گورنر اور سابق فوجی سربراہ جنرل وی کے سنگھ، جنوبی ہیڈ کوارٹر کے سربراہ لیفٹیننٹ جنرل دھیرج سیٹھ اور این ڈی اے کے سربر اہ وائس ایڈمرل گروچرن سنگھ سمیت دیگر معززشخصیات اس تقریب میں شریک تھیں۔
***** ***** *****
یہ خبریں آکاشوانی چھترپتی سمبھاجی نگر سے نشر کی جارہی ہیں۔
***** ***** *****
ریاستی وزیرِ زراعت مانک ر ائو کوکاٹے نے کہا ہے کہ محکمہ زراعت کے تمام فیصلوں کو کسانوں کیلئے مفید و مددگار بنانے کیلئے ریاستی حکومت کسانوں کے مشوروں اور تجاویز کو سن کر اس پر عمل درآمد کو ترجیح دے رہی ہے۔ وہ کل چھترپتی سمبھاجی نگر میں محکمہ زراعت کے زیر اہتمام کاشتکاروں کیلئے منعقدہ مذاکرے سے خطاب کر رہے تھے۔ انہوں نے کسانوں سے متعلق حکومت کے مختلف منصوبوں کے بارے میں جانکاری بھی دی‘ ساتھ ہی کاشتکاروں کے گروپوں کی جانب سے پیش کردہ تجاویز کو سن کر انھیں نوٹ کیا۔
***** ***** *****
ریلوے محکمے نے عثمان آباد ریلوے اسٹیشن کا نام تبدیل کر کےدھاراشیو ریلوے اسٹیشن کر دیا ہے۔ ریاستی حکومت کی جانب سے عثمان آباد کا قدیم نام تبدیل کرکے دھاراشیو کیے جانے کے بعد ریلوے محکمے نے ریلوے اسٹیشن کا نام تبدیل کر کے دھاراشیو کیا ہے۔ جس کے بعد انڈین ریلوے کانفرنس ایسوسی ایشن نے اسٹیشن کے نئے نام اور کوڈ کو منظوری بھی دے دی ہے۔ ماضی میں عثمان آباد نام سے منسوب اس اسٹیشن کا کوڈ UMD تھا، جسے اب نئے نام دھاراشیو اسٹیشن کی مناسبت سے DRSV کوڈ میں تبدیل کیا گیا ہے۔ لہٰذا ریلوے کے تمام اندراجات ا ور مطالبات سمیت دیگر تمام اُمور اس نئے نام سے ہی کیے جائیں گے۔ اس تبدیلی کو مکمل کرنے کیلئے، ممبئی پیسنجر ریزرویشن سسٹم، نامی ریزرویشن نظام آج رات پونے بارہ سے رات ڈیڑھ بجے تک عارضی طور پر بند رکھا جائےگا، مسافروں اور عوام سے اسےنوٹ کرنے کی اپیل وسطی ریلوے انتظامیہ نے ایک صحافتی بیان کے ذریعے کی ہے۔
***** ***** *****
ریاستی محکمہ زراعت کے پرنسپل سکریٹری وکاس چندر رستوگی کے ہاتھوں کل پربھنی ضلعے کے مانوت تعلقے کے تاڑ بورگاؤں میں ترقی یافتہ زرعی تصور مہم کا ضلعی سطح پر افتتاح عمل میں آیا۔ اس اسکیم کے تصاویری رتھ کو سبز جھنڈی دکھا کر روانہ کیا گیا۔ اس موقع پر زرعی سائنسدانوں نے بیج کی نئی تیار کردہ اقسام کے ساتھ ساتھ دادا لاڑ کپاس کی کاشت کی تکنیک سے متعلق جا نکاری دی۔
***** ***** *****
آپریشن سندور کے اعزاز میں کل بیڑ شہر میں ریپبلکن پارٹی آٹھولے گروپ کی جانب سے ترنگا ریلی نکالی گئی۔ ڈاکٹر بابا صاحب امبیڈکر کے مجسّمے سے نکالی گئی اس ترنگا ریلی میں آر پی آئی کے کارکنان نے کثیر تعداد میں شرکت کی۔ قومی ترانے پر ریلی کا اختتام عمل میں آیا۔
***** ***** *****
ایشین ایتھلیٹکس چمپئن شپ مقابلوں میں بھارتی ایتھلیٹس نے کل تین طلائی تمغے اپنے نام کیے۔ مردوں کی پانچ ہزار میٹر دوڑ میں گل ویر نےطلائی تمغہ جیتا، جبکہ خواتین کی اونچی چھلانگ کے مقابلے میںپوجا نے طلائی تمغہ حاصل کیا، اسی طرح نندنی آگاسرا‘ نے خواتین کے ہیپٹاتھلون میں طلائی تمغہ اپنے نام کیا۔ پارُول چودھری نے خواتین کی تین ہزار میٹر اسٹیپل چیس میں نقرئی تمغہ جیتا۔ ان مقابلوں میں بھارت فی الحال کل 18 تمغوں کے ساتھ میڈل ٹیبل میں دوسرے مقام پر ہے جس میں آٹھ طلائی، سات نقرئی اور تین کانسے کے تمغے شامل ہیں۔
***** ***** *****
تلجاپور کے رکن اسمبلی اور مترا کے نائب صدر راناجگجیت سنگھ پاٹل نے دھاراشیو ضلعے کی مجموعی اور پائیدار ترقی کیلئے،افسران و عہدیداران کو باقاعدہ کام تک ہی محدود نہ رہتے ہوئے مثبت نقطہ نظر سے اختراعی تصورات کے ساتھ کام کرنے کی ترغیب دی ہے۔ کل اس سلسلے میں منعقدہ ایک اجلاس سے وہ خطاب کر رہے تھے۔ اس موقع پر انہوں نے ضلع میں جاری مختلف ترقیاتی کاموں کے بارے میں معلومات دی۔ ضلعے کے مختلف محکموں کے افسران اس اجلاس میں شر یک تھے۔
***** ***** *****
عالمی انسداد ِتمباکو نوشی دن آج منایا جا رہا ہے۔ اس مناسبت سے تمباکو کے استعمال سے ہونے والی خطرناک بیماریوں سے متعلق عوام میں بیداری پیدا کی جا رہی ہے۔ چھترپتی سمبھاجی نگر ضلع تمباکو کنٹرول کمیٹی کی جانب سے آج شہر میں ایک بائیک ریلی کا انعقاد کیا جا رہا ہے۔ تمباکو نوشی کے مضر اثرات پر کل لاتور ضلع کلکٹر دفتر میں ایک عوامی بیداری ورکشاپ کا انعقاد کیا گیا۔
***** ***** *****
بیڑ ضلعے میں گزشتہ آٹھ دنوں سے جاری بارش کے سبب ضلعے کے چھوٹےاور درمیانی آبی منصوبوں میں پانی کا ذخیرہ بڑھ رہا ہے۔ بیڑ شہر کے قریب بندوسرا آبی پشتہ پوری طرح بھر گیا ہے اور اسکی درمیانی باندھ سے پانی بہنے کے امکان کے پیشِ نظر ضلع کلکٹر ویویک جانسن نے بندوسرا ندی کے کناروں پر آبادساکنان سے محتاط رہنے کی اپیل کی ہے۔
***** ***** *****
::::: سرخیاں::::::
آخرمیں اس بلیٹن کی خاص خبریں ایک بار پھر:
٭ دفاعی شعبہ نہ صرف معیشت بلکہ ملک کی عزت نفس کیلئے بھی ضروری ہے - وزیراعظم نریندر مودی کا بیان۔
٭ پنیہ شلوک اہلیا دیوی ہولکر کے 300ویں یوم پیدائش کے موقع پر آج مختلف تقاریب کا انعقاد۔
٭ پونے کےنیشنل ڈیفنس اکیڈمی کے تقسیمِ اسناد تقریب میں 17 خواتین کیڈیٹس کے پہلے دستےکی پاسنگ آؤٹ پریڈ میں شرکت۔
٭ عثمان آباد ریلوے اسٹیشن کا نام تبدیل کرکے دھاراشیو ریلوے اسٹیشن کرنے کا ریلوے محکمے کا فیصلہ۔
٭ ترقی یافتہ زرعی سنکلپ ابھیان کے تحت پربھنی ضلعے میں ماہرین کی جانب سے کسانوں کی رہنمائی۔
اور۔۔۔٭ ایشین ایتھلیٹکس چیمپئن شپ مقابلوں میں بھارتی ایتھلیٹس نے کل جیتے تین گولڈ میڈل ۔
***** ***** *****
No comments:
Post a Comment