Text: आकाशवाणी औरंगाबाद – दिनांक 27.07.2022 रोजीचे सकाळी 07.10 वाजेचे मराठी बातमीपत्र

 Regional Marathi Text Bulletin, Aurangabad

Date – 27 July 2022

Time 7.10 AM to 7.25 AM

Language Marathi

आकाशवाणी औरंगाबाद

प्रादेशिक बातम्या

दिनांक २७ जुलै २०२२ सकाळी ७.१० मि.

****

ठळक बातम्या

·      प्लास्टिक आवरण आणि प्लास्टिकचा थर चिकटवलेल्या उत्पादनांवर बंदी घालण्याचा राज्य शासनाचा निर्णय

·      राज्यसभेत गदारोळ करणारे १९ खासदार चालू आठवड्याच्या उर्वरित काळासाठी निलंबित 

·      शिवसेना आणि धनुष्यबाण यावर ठाकरे तसंच शिंदे गटाच्या दाव्यावर सर्वोच्च न्यायालयात येत्या एक ऑगस्ट रोजी सुनावणी

·      राज्यात कोविड संसर्गाचे नवे २ हजार १३५ रुग्ण, मराठवाड्यात ९३ बाधित तर औरंगाबाद जिल्ह्यात एका रुग्णाचा मृत्यू

·      औरंगाबाद, लातूर, परभणी, आणि नांदेड-वाघाळा महानगरपालिकेसह, राज्यातल्या नऊ महानगरपालिकांच्या निवडणुकांसाठी, येत्या पाच ऑगस्टला आरक्षण सोडत

·      पैठणच्या जायकवाडी धरणातून गोदावरी नदीत सोडण्यात येणाऱ्या पाण्यात कपात, मराठवाड्याच्या अनेक भागात पाऊस 

आणि

·      भारत आणि वेस्ट इंडीज यांच्यात आज तिसरा एक दिवसीय क्रिकेट सामना

****

सविस्तर बातम्या

प्लास्टिक आवरण आणि प्लास्टिकचा थर चिकटवलेल्या उत्पादनांवर बंदी घालण्याचा महत्त्वपूर्ण निर्णय राज्य शासनानं घेतला आहे. मुख्यमंत्री एकनाथ शिंदे यांनी प्लॅस्टिक बंदी नियमामध्ये सुधारणा करण्याचे निर्देश दिले होते, त्यानुसार हा निर्णय घेण्यात आला. केंद्र शासनानं एक जुलै २०२२ पासून एकल वापराच्या प्लॅस्टिक वस्तूंवर बंदी घातली आहे. प्रतिबंधित वस्तूंमध्ये, कागदी किंवा अॅल्युमिनियमपासून बनवलेल्या प्लास्टिक कोटेड किंवा प्लास्टिक लॅमिनेटेड डिश, कप, ग्लासेस, काटे, वाडगा, कंटेनर इत्यादीच्या वापरावर तसंच उत्पादनावर, आता राज्यात बंदी असणार आहे. विघटनास घातक ठरणाऱ्या निकृष्ट दर्जाच्या प्लास्टिकचे आक्रमण रोखण्यासाठी हे बंदीचे पाऊलं उचलण्यात आलं आहे.

****

राज्यसभेतल्या १९ खासदारांना चालू आठवड्याच्या उर्वरित काळासाठी निलंबित करण्यात आलं आहे. यामध्ये तृणमूल काँग्रेसचे सात, द्रमुकचे सहा, टीआरएसचे तीन, कम्युनिस्ट पक्षाचे तीन, यांच्यासह १९ जणांचा समावेश आहे. महागाई तसंच वस्तू आणि सेवा कर - जीएसटीच्या मुद्यावरून विरोधी बाकांवरच्या सदस्यांनी काल आक्रमक होत हौद्यात उतरून गदारोळ केल्यानं, सदनाचं काम काल वारंवार बाधित झालं. उपसभापतींनी कठोरपणे इशारा देऊनही विरोधकांनी गदारोळ सुरूच ठेवल्यानं, ही कारवाई करण्यात आली.

दरम्यान, लोकसभेत महागाई आणि जीएसटीच्या मुद्यावरून विरोधकांनी काल दोन वेळा सभात्याग केला.

****

काँग्रेस अध्यक्षा सोनिया गांधी यांची सक्तवसुली संचालनालय - ईडी कडून केल्या जात असलेल्या चौकशीच्या विरोधात, दिल्लीत विजय चौक परिसरात आंदोलन करणारे खासदार राहुल गांधी आणि काँग्रेसच्या इतर नेत्यांना, पोलिसांनी काल ताब्यात घेतलं. काळा पैसा वैध केल्या प्रकरणी ईडीनं काल दुसऱ्यांदा सोनिया गांधी यांची चौकशी केली. या निषेधार्थ काँग्रेस नेत्यांनी संसद भवन परिसर ते विजय चौकापर्यंत मोर्चा काढला.

मुंबईतही मंत्रालय परिसरात कॉंग्रेस प्रदेशाध्यक्ष नाना पटोले, आमदार भाई जगताप यांच्या नेतृत्वात सत्याग्रह आंदोलन करण्यात आलं. औरंगाबाद इथं क्रांती चौकात माजी आमदार डॉ. कल्याण काळे यांच्यासह पदाधिकारी आणि कार्यकर्त्यांनी केंद्र सरकार विरोधात जोरदार घोषणाबाजी केली.

****

शिवसेना आणि धनुष्यबाण यावर ठाकरे तसंच शिंदे गटाच्या दाव्यावर आता सर्वोच्च न्यायालयात येत्या एक ऑगस्ट रोजी सुनावणी होणार आहे. शिवसेना आणि धनुष्यबाण चिन्ह नेमकं कोणाचं, यासाठी केंद्रीय निवडणूक आयोगानं दोन्ही गटांना आठ ऑगस्टपर्यंत आपल्याकडे असलेल्या बहुमताच्या दाव्यासंदर्भात कागदपत्रे सादर करण्याचे निर्देश दिले आहेत. शिवसेनेच्या ठाकरे गटानं न्यायालयात धाव घेत, अशाप्रकारे कागदपत्रांची मागणी करणं, हा न्यायालयाच्या ‘जैसे थे आदेशाचा भंग होत असल्याचं म्हटलं आहे. त्यावर न्यायालयानं एक ऑगस्टला अन्य प्रकरणांवरील सुनावणींसोबत या विषयावरही सुनावणी घेण्यास अनुकूलता दर्शवली आहे.

****

केंद्र सरकारनं १५ जुलैपासून १८ ते ५९ वयोगटातल्या लाभार्थ्यांना कोरोना प्रतिबंधक लसीची खबरदारीची मात्रा मोफत द्यायला सुरुवात केली आहे. मराठवाड्यातल्या हिंगोली, जालना, लातूर, नांदेड, उस्मानाबाद, परभणीसह राज्यात अनेक जिल्ह्यांत नागरिकांचा या योजनेला चांगला प्रतिसाद मिळत असल्याचं याबाबतच्या वृत्तात म्हटलं आहे.

औरंगाबाद इथले तरुण अभियंते गोविंद काळे यांनी नागरिकांना मोफत बूस्टर डोस योजनेचा लाभ घेण्याचं आवाहन केलं.

Byte

नमस्कार, माझं नाव गोविंद काळे. कोरोना प्रतिबंधक लसीचे दोन डोस माझे आधी झालेले आहेत. आता तिसरा बुस्टर डोस घेतलेला आहे. सरकारने आपल्यासाठी फ्री बुस्टर डोस उपलब्ध करुन दीलेला आहे, तुम्ही तो घ्यावा अशी माझी विनंती.  

****

राज्यात काल कोविड संसर्ग झालेले नवे २ हजार १३५ रुग्ण आढळले. त्यामुळे राज्यभरातल्या कोविड बाधितांची एकूण संख्या, ८० लाख ३७ हजार १८१ झाली आहे. काल या संसर्गानं १२ रुग्णांचा मृत्यू झाला. राज्यात आतापर्यंत या संसर्गानं दगावलेल्या रुग्णांची एकूण संख्या, एक लाख ४८ हजार ०८० एवढी असून, मृत्यूदर एक पूर्णांक ८४ शतांश टक्के आहे. काल २ हजार ५६५ रुग्ण बरे झाले. राज्यात आतापर्यंत, ७८ लाख ७५ हजार नऊ रुग्ण या संसर्गातून मुक्त झाले असून, कोविड मुक्तीचा दर ९७ पूर्णांक ९८ शतांश टक्के झाला आहे. राज्यात सध्या १४ हजार ९२ रुग्णांवर उपचार सुरु आहेत.

****

मराठवाड्यात काल ९३ कोरोना विषाणू बाधित रुग्ण आढळले, तर औरंगाबाद जिल्ह्यातल्या एका रुग्णाचा उपचारादरम्यान मृत्यू झाला. औरंगाबाद जिल्ह्यात ३२ रुग्ण आढळले. लातूर १९, बीड १८, जालना १७, तर नांदेड जिल्ह्यात सात नव्या रुग्णांची नोंद झाली.

****

औरंगाबाद, लातूर, परभणी, आणि नांदेड-वाघाळा महानगरपालिकेसह, राज्यातल्या नऊ महानगरपालिकांच्या सार्वत्रिक निवडणुकांसाठी, येत्या पाच ऑगस्टला आरक्षण सोडत काढण्याचे आदेश, राज्य निवडणूक आयोगानं काल दिले आहे. यानुसार अनुसूचित जाती-महिला, अनुसूचित जमाती-महिला, नागरिकांचा मागास प्रवर्ग आणि नागरिकांचा मागास प्रवर्ग-महिला यांच्या आरक्षित जागांसाठी, ही सोडत काढली जाईल. त्यावर सहा ते १२ ऑगस्ट या कालावधीत हरकती आणि सूचना दाखल करता येतील. प्रभागनिहाय अंतिम आरक्षण २० ऑगस्ट रोजी प्रसिद्ध केलं जाणार आहे.

नांदेड जिल्ह्यातल्या दहा नगरपरिषदेच्या आरक्षण सोडतीचा सुधारित कार्यक्रम राज्य निवडणूक आयोगानं काल जाहीर केला. देगलूर, मुखेड, बिलोली, कुंडलवाडी, धर्माबाद, भोक़र, मुदखेड, हदगाव, कंधार, उमरी या सर्व नगर परिषदांच्या आरक्षण सोडत परवा गुरुवारी काढल्या जाणार आहेत.

****

स्वातंत्र्याच्या अमृत महोत्सवानिमित्त १३ ते १५ ऑगस्ट या कालावधीत "घरोघरी तिरंगा" हा उपक्रम राबवण्यात येणार आहे. जालना जिल्ह्यातल्या नागरिकांनी आपल्या घरावर तसंच प्रत्येक शासकीय, निमशासकीय, खासगी आस्थापना, सहकारी संस्था, तसंच शैक्षणिक संस्थांनी कार्यालयाच्या इमारतीवर तिरंगा फडकवून या महोत्सवात उत्स्फुर्तपणे सहभाग नोंदवण्याचं आवाहन, जालन्याचे जिल्हाधिकारी डॉ. विजय राठोड यांनी केलं आहे.

****

गर्भलिंग निदान आणि गर्भपात प्रकरणी बीड जिल्ह्यात परळी इथं चार जणांविरोधात गुन्हा दाखल करून, दोन जणांना अटक करण्यात आली आहे. सरस्वती वाघमोडे असं पीडित महिलेचं नाव असून, तिने दिलेल्या तक्रारीवरून, पती नारायण वाघमोडे, सासू छाया वाघमोडे, गर्भपात करणारा डॉ. स्वामी आणि प्रज्ञा कावळे या चौघांविरोधात गुन्हा नोंदवून कारवाई केल्याची माहिती, परळीचे पोलिस उपअधीक्षक सुनील जायभाये यांनी दिली. ते म्हणाले...

 

सदरच्या प्रकरणांमध्ये सदर पिडीत महिलेचे सासरचे लोक व तो डॉक्टर यांच्याविरुद्ध गुन्हा नोंदवून त्यांना अटक करण्यात आलेली आहेत. चार आरोपी आहेत. त्यातील दोन आरोपी ताब्यात आहेत. आणि पुढील तपास पोलीस निरीक्षक चाटे साहेब करत आहेत.

****

औरंगाबादच्या पैठण इथल्या जायकवाडी धरणातून होणाऱ्या पाण्याच्या विसर्गात काल कपात करण्यात आली. धरणाच्या अठरा दरवाजातून आता २२ हजार ४०५ घनफूट प्रतिसेकंद वेगानं पाणी नदी पात्रात सोडण्यात येत आहे. जलविद्युत केंद्रातून एक हजार ५८९, तर उजव्या कालव्यातून आता ५५० घनफूट प्रतिसेकंद वेगानं पाणी सोडण्यात येत आहे. धरणात ३० हजार ४३५ घनफूट प्रतिसेकंद वेगानं पाण्याची आवक सुरू आहे. धरणाचा पाणीसाठा ९२ टक्क्याच्यावर पोहोचला आहे.

****

मराठवाड्यातल्या अनेक भागात काल पाऊस झाला. औरंगाबाद शहर आणि परिसरात दिवसभर पवसाची संततधार सुरु होती. खुलताबाद तालुक्यातल्या कसाबखेडा परीसरात कालजोरदार पाऊस झाला. या गावाजवळील पुल वाहून गेल्यानं सहा गावांचा संपर्क तुटला आहे.

नांदेड जिल्ह्यात किनवट तालुक्यात सोमवारी रात्रीपासून पावसाची संततधार सुरू असल्यानं, नदीनाले ओसंडून वाहत आहेत. इस्लापुर, जलधारा, शिवणी, आप्पारावपेठ या भागात ढगफुटी सदृश्य पाऊस झाला, त्यामुळे अनेक गावांचा संपर्क तुटला आहे. रेल्वे पुलाखाली पाणी साचल्यामुळे इस्लापुर ते किनवट रस्ता वाहतुकीसाठी बंद झाला आहे.

नांदेड शहरालगतच्या विष्णुपुरी प्रकल्पात पाण्याची आवक वाढल्यामुळे काल प्रकल्पाचे दोन दरवाजे उघडून विसर्ग सुरु करण्यात आला.

लातूर जिल्ह्याच्या उदगीर तालुक्यातला तिरु मध्यम प्रकल्पाचे सहा दरवाजे उघडून पाणी नदीपात्रात सोडलं जात आहे.

जालना, हिंगोली, बीड जिल्ह्यातही काल दिवसभर पावसाची संततधार सुरु होती.

****

भारत आणि वेस्ट इंडीज यांच्यात तीन एक दिवसीय क्रिकेट सामन्यांच्या मालिकेतला तिसरा सामना आज खेळला जाणार आहे. भारतीय वेळेनुसार संध्याकाळी सात वाजता सामन्याला सुरुवात होईल. मालिकेत पहिले दोन सामने जिंकून भारतानं दोन - शून्य अशी विजयी आघाडी घेतली आहे.

****

उस्मानाबाद जिल्ह्याच्या तेर इथल्या संत गोरोबाकाका संस्थानच्या विश्वस्त मंडळात वाद निर्माण झाल्यामुळे उस्मानाबाद इथल्या सहधर्मादाय आयुक्तांनी संस्थानवर प्रशासकाची केलेली नियुक्ती मुंबई उच्च न्यायालयाच्या औरंगाबाद खंडपीठानं रद्द केली आहे. काही विश्वस्तांनी याविरोधात न्यायालयात याचिका दाखल केली होती. निवडून आलेली कार्यकारिणी संस्थानचा कारभार पाहण्यास पात्र राहील, असं न्यायालयानं सांगितलं आहे.

****