Sunday, 31 December 2023
TEXT - आकाशवाणी छत्रपती संभाजीनगर – दिनांक 31.12.2023 रोजीचे सायंकाळी 06.10 वाजताचे मराठी बातमीपत्र
Regional Marathi Text
Bulletin, Chhatrapati Sambhajinagar
Date – 31 December
2023
Time 18.10 to 18.20
Language Marathi
आकाशवाणी छत्रपती
संभाजीनगर
प्रादेशिक बातम्या
दिनांक – ३१ डिसेंबर २०२३ सायंकाळी ६.१०
****
· कृत्रिम बुद्धिमत्तेचं तंत्रज्ञान सखोल समजून घ्या - पंतप्रधान नरेंद्र मोदी
यांचं तरुणांना आवाहन.
· मराठा समाजाला आरक्षण देण्यासाठी एक वर्षाचा कालावधी लागू शकतो - राज्याचे
संसदीय कार्य मंत्री चंद्रकांत पाटील यांचे संकेत.
· वाळूजच्या आगीच्या दुर्घटनेतल्या मृतांच्या कुटुंबीयांना मुख्यमंत्री
साहाय्यता निधीतून प्रत्येकी ५ लाख रुपये मदत घोषित.
आणि
· नववर्ष स्वागताच्या पूर्वसंध्येला वणीचं सप्तशृंगी मंदिर आणि शिर्डी इथलं
साईबाबा मंदिर दर्शनासाठी रात्रभर राहणार खुलं.
****
कृत्रिम बुद्धिमत्तेचं तंत्रज्ञान
भविष्यात सभा,
चित्रपटगृहं, शाळा, रुग्णालयं
आणि न्यायालयांमध्ये व्यापक प्रमाणात वापरलं जाईल, फार मोठं परिवर्तन
घडून येणार आहे,
असं निरीक्षण पंतप्रधान नरेंद्र मोदी यांनी आज नोंदवलं.
आकाशवाणीवरच्या मन की बात या कार्यक्रमातून पंतप्रधानांनी आज देशवासीयांशी संवाद
साधला. तरुण पिढीनं रीअल टाइम ट्रान्सलेशनशी संबंधित कृत्रिम बुद्धिमत्ता साधने, अर्थात
एआय टूल्स सखोल समजून घ्यायला हवीत असं आवाहन करताना, जो
देश नावीन्याला महत्त्व देत नाही, त्याचा विकास थांबतो. भारत आता कधीच
थांबणार नाही, असंही ते म्हणाले.
जीवनशैलीशी निगडित आजार ही तरुणांसाठी
चिंतेची बाब आहे. त्यावर मात करण्यासाठी निरोगी राहा, तंदुरुस्त
राहा, असा नव्या वर्षाचा संकल्प मंत्रही पंतप्रधानांनी दिला. फिट इंडियाचं स्वप्न
साकार करण्याच्या दिशेनं नावीन्यपूर्ण आरोग्यसेवा प्रदान करणाऱ्या काही
स्टार्टअप्सचा त्यांनी गौरवपूर्ण उल्लेख केला. शारीरिक आणि मानसिक आरोग्याविषयी
बोलणारे सद्गुरु जग्गी वासुदेव, क्रिकेटपटू हरमनप्रीत कौर, ग्रँडमास्टर
विश्वनाथन आनंद आणि अभिनेता अक्षय कुमार यांचे अनुभवही मन की बात मध्ये शेअर
करण्यात आले.
****
विकसित भारत संकल्प यात्रेमुळे सर्व
स्तरातील नागरिकांना शासनाच्या योजनांचा लाभ मिळत आहे. या यात्रेचं काम इथंच संपत
नसून ही यात्रा पुढच्या पिढ्यांनाही विकासाचा महामार्ग दाखवते, असं
केंद्रीय मंत्री भूपेंद्र यादव यांनी म्हटलं आहे. हिंगोली जिल्ह्यातल्या औंढा
नागनाथ आणि कळमनुरी तालुक्यातल्या सेलसुरा या गावात विकसित भारत संकल्प यात्रा
पोहोचली, त्यावेळी यादव बोलत होते. ते म्हणाले...
योजनाएं जब सौ प्रतिशत जमीनपर पहुंचेगी, तो इसके बाद हमको विकसित
भारत का संकल्प भी साथ के साथ करना चाहिये. आज मै जितने भी लाभार्थियोंसे मिला हुं,
प्रधानमंत्री आवास योजना का पैसा, किसान सम्मान निधी का पैसा, वो आपके अकाऊंट मे, जो
हमारे दिव्यांग भाई है, उनका पैसा उनके अकाऊंट में, ये जो जन धन अकाउंट है, ये देश
के इकानॉमीका सबसे बडे माध्यम बना है. इन सब को देश की आर्थिक ताकत के साथ जोडनें का
काम, ये प्रधानमंत्रीजीने किया है.
यावेळी वेगवेगळ्या शासकीय योजनांच्या
१७० लाभार्थ्यांना मान्यवरांच्या हस्ते लाभांचं वाटप करण्यात आलं. खासदार हेमंत
पाटील, आमदार संतोष बांगर,
आमदार तानाजी मुटकुळे यावेळी उपस्थित होते. दरम्यान, मेरी
कहानी मेरी जुबानी अंतर्गत नागरिकांनी आपल्या लाभाची माहिती दिली...
बाईट – मुंजा कदम आणि शांताबाई
चव्हाण, जि.हिंगोली
नांदेड इथं विकसित भारत संकल्प यात्रेअंतर्गत
महापालिका हद्दीत २४ डिसेंबर ते ३० डिसेंबर या कालावधीत १३ ठिकाणच्या ५ हजार ७४४
नागरिकांना शासकीय योजनांचा लाभ देण्यात आला. यामध्ये ३ हजार १७३ पुरुष आणि २ हजार
१७१ महिलांचा समावेश आहे. पीएम स्वनिधी अंतर्गत १ हजार ३१५ नागरिकांचे अर्ज भरले
गेले, तर १ हजार ८५५ नागरिकांना आरोग्य सेवांचा लाभ देण्यात आला. या यात्रेला चांगला
प्रतिसाद मिळाल्याचं नांदेड महापालिकेचे आयुक्त डॉ. महेशकुमार डोईफोडे यांनी
सांगितलं.
****
राज्यातल्या साडेबारा कोटी लोकसंख्येची
माहिती गोळा करायला वेळ लागेल. त्यामुळे मराठा समाजाला आरक्षण देण्यासाठी एक
वर्षांचा कालावधी लागू शकतो, असे संकेत राज्याचे संसदीय कार्य मंत्री
चंद्रकांत पाटील यांनी आज दिले. ते सोलापूर जिल्ह्यातल्या पंढरपूर इथं बोलत होते.
२०१४ ते २०१९ काळात मी हा प्रश्न जवळून हाताळला होता. त्यावेळी मागासवर्ग आयोगाला
अहवाल द्यायला एक वर्ष लागलं होतं, असं पाटील म्हणाले.
तत्कालीन मुख्यमंत्री देवेंद्र फडणवीस यांनी पुढाकार घेतल्यानं तो अहवाल उच्च
न्यायालयात टिकला. पण पुढच्या सरकारला सर्वोच्च न्यायालयात आपली बाजू प्रभावीपणे
मांडता न आल्यानं तिथं टिकू शकला नाही, अशी कबुलीही पाटील यांनी
दिली. मराठा समाज मागास असल्याचा अहवाल आल्याशिवाय सरकारला विशेष अधिवेशन बोलवता
येणार नाही,
असंही ते म्हणाले.
****
छत्रपती संभाजीनगरच्या वाळूज औद्योगिक
वसाहतीत झालेल्या दुर्घटनेतल्या मृतांच्या कुटुंबीयांना मुख्यमंत्री साहाय्यता
निधीतून प्रत्येकी ५ लाख रुपये देण्याचे निर्देश मुख्यमंत्री एकनाथ शिंदे यांनी
दिले आहेत. याशिवाय जखमी कामगारांना तातडीनं शासकीय खर्चानं सर्व वैद्यकीय उपचार
द्यावेत, अशाही सूचना त्यांनी प्रशासनाला दिल्या आहेत. दरम्यान, पोलिस
आयुक्त मनोज लोहिया यांनी सकाळी दुर्घटनास्थळाला भेट देऊन पंचनामा केला.
पालकमंत्री संदिपान भुमरे,
विधान परिषदेतले विरोधी पक्षनेते अंबादास दानवे यांनीही
घटनास्थळी भेट देत,
दुर्घटनेची माहिती घेतली.
****
नववर्ष स्वागताच्या पूर्वसंध्येला
भाविकांची संभाव्य गर्दी लक्षात घेऊन नाशिक जिल्ह्यातल्या वणीच्या श्री सप्तशृंगी
देवीचं मंदिर आणि शिर्डी इथलं साईबाबांचं मंदिर आज दर्शनासाठी रात्रभरही खुलं
ठेवण्यात येणार आहे. स्वामी मेळा मित्र मंडळाच्या वतीनं नाशिकच्या रामकुंडावर
रात्री १२ वाजता सहस्रदीप प्रज्वलन कार्यक्रम होणार असल्याचं आमच्या वार्ताहरानं
कळवलं आहे.
****
महाराष्ट्र शासनाच्या वतीनं देण्यात
येणाऱ्या यशवंतराव चव्हाण राज्य वाङ्मय पुरस्कारांसाठी महाराष्ट्र राज्य साहित्य
आणि संस्कृती मंडळाच्या कार्यालयानं प्रवेशिका मागवल्या आहेत. २०२३ या वर्षात
प्रकाशित झालेल्या पुस्तकांना हा पुरस्कार देण्यात येणार आहे. नवी दिल्लीसह
बृहन्महाराष्ट्रातील मराठी लेखक, तसंच प्रकाशकांना सरफोजीराजे भोसले
बृहन्महाराष्ट्र पुरस्कारासाठी महाराष्ट्र परिचय केंद्र, नवी
दिल्ली इथं प्रवेशिका पाठवता येतील, असं याबाबतच्या वृत्तात
म्हटलं आहे.
****
छत्रपती संभाजीनगर इथं आज दुसऱ्या
फुले-शाहू- आंबेडकरी साहित्य संमेलनाला सुरुवात झाली. प्रसिद्ध कवी फ. मुं. शिंदे
यांच्या हस्ते या संमेलनाचं उदघाटन करण्यात आलं. ज्येष्ठ विचारवंत लक्ष्मण माने या
संमेलनाचे अध्यक्ष आहेत. दोन दिवस चालणाऱ्या या संमेलनात विविध विषयांवर परिसंवाद, कविसंमेलन
आणि प्रकट मुलाखती होणार आहेत.
****
'हे आंबेडकर आमचे नाहीत'
या प्रकाश त्रिभुवन लिखित पुस्तकाचं आज छत्रपती संभाजीनगर
इथं ज्येष्ठ साहित्यिक डॉ. प्रल्हाद लुलेकर यांच्या हस्ते प्रकाशन झालं. डॉ.
बाबासाहेब आंबेडकर विधी महाविद्यालयाच्या सभागृहात हा कार्यक्रम झाला.
अध्यक्षस्थानी माजी प्राचार्य प्रभाकर शिरोळे उपस्थित होते. प्रकाशनाच्या
कार्यक्रमानंतर नाट्यवाचन करण्यात आलं.
****
धाराशिव जिल्ह्यात तुळजापूर
तालुक्यातल्या अणदूर इथं पंतप्रधान नरेंद्र मोदी यांचा मन की बात हा कार्यक्रम
भारतीय जनता पक्षाच्या स्थानिक कार्यकर्त्यांनी थेट उसाच्या फडात जाऊन उसतोड
कामगारांबरोबर ऐकला.
****
अयोध्येतल्या राम मंदिर
लोकार्पणानिमित्त अयोध्येतून आलेल्या अक्षता कलशाची आज हिंगोली शहरातल्या संकट
मोचन हनुमान मंदिर परिसरातून भव्य शोभायात्रा काढण्यात आली.
****
आकाशवाणी छत्रपती संभाजीनगर प्रादेशिक बातम्या दिनांक : ३१ डिसेंबर २०२३ दुपारी १.०० वा.
Regional Marathi Text Bulletin, Chhatrapati Sambhajinagar
Date : 31 December 2023
Time : 01.00 to 01.05 PM
Language Marathi
आकाशवाणी छत्रपती संभाजीनगर
प्रादेशिक बातम्या
दिनांक : ३१ डिसेंबर २०२३ दुपारी १.०० वा.
****
भारताच्या विकासाचा सर्वाधिक फायदा तरुणांनाच होणार आहे; पण त्यासाठी देशातील तरुण सुदृढ असले पाहिजेत, अशी अपेक्षा व्यक्त करत पंतप्रधान नरेंद्र मोदी यांनी देशवासीयांना आगामी नववर्षाच्या शुभेच्छा दिल्या. आकाशवाणीवरच्या मन की बात या कार्यक्रमातून पंतप्रधानांनी आज देशवासीयांशी संवाद साधला. या मालिकेचा हा एकशे आठावा भाग होता. या भागात त्यांनी मावळत्या वर्षातील यशाचा मागोवा घेतला.
नारी शक्ती वंदन कायदा, जी ट्वेंटी परिषद आणि चांद्रयान मोहिमेचं यश, तसंच भारत जगातील सर्वात मोठी पाचवी अर्थव्यवस्था झाल्याबद्दल अनेक देशवासीयांनी पत्र लिहून आनंद व्यक्त केल्याचं पंतप्रधानांनी आवर्जून नमूद केलं. त्याबरोबरच नाटु-नाटु ला मिळालेला ऑस्कर पुरस्कार, 'द एलिफंट व्हिस्परर्स'ला मिळालेला सन्मान, आशियाई खेळ आणि पॅरा गेम्समध्ये खेळाडूंनी मिळवलेली पदकं, क्रिकेट विश्वचषकातील कामगिरी, १९ वर्षांखालील टी-ट्वेंटी विश्वचषक स्पर्धेतील विजय अशा अनेक महत्वपूर्ण घटनांचाही आपल्या भाषणात उल्लेख करत त्यांनी २०२४ मध्ये होणाऱ्या पॅरिस ऑलिम्पिकसाठी खेळाडूंना प्रोत्साहन दिलं. ‘आझादी का अमृत महोत्सव’ आणि ‘मेरी माटी मेरा देश’ या मोहिमा, ७० हजार अमृत तलावांचं निर्माण हेदेखील संपूर्ण देशाचं सामूहिक यश असल्याचं ते म्हणाले.
३ जानेवारी रोजी सावित्रीबाई फुले यांची जयंती आहे. त्यानिमित्तानं बोलताना, सावित्रीबाई आणि महात्मा जोतिराव फुले यांचं मानवतेला समर्पित जीवन आजही आपल्या सर्वांना प्रेरणा देतं, अशा शब्दांत पंतप्रधानांनी अभिवादन केलं.
****
राज्यभरातील सुमारे ५३ हजार शिधा वाटप, म्हणजेच रेशन दुकानदारांनी विविध मागण्यांसाठी उद्या १ जानेवारीपासून बेमुदत बंद पुकारला आहे. या बंदमध्ये अखिल महाराष्ट्र राज्य स्वस्त धान्य दुकानदार आणि किरकोळ केरोसीन परवानाधारक महासंघ सहभागी होणार आहेत. रेशन दुकानदारांना किमान उत्पन्नाची हमी ५० हजार रुपये करावी, टू-जी ऐवजी फोर-जी मशीन द्यावं, कालबाह्य नियमात बदल करावेत, आनंदाचा शिधा कायमस्वरूपी राबवून कांदा, चणाडाळ, तूरडाळ, मूगडाळ या वस्तू रेशन दुकानात उपलब्ध करून द्याव्यात, आदी मागण्यांसाठी हा बंद असल्याचं कळवण्यात आलं आहे.
****
छत्रपती संभाजीनगरच्या वाळूज औद्योगिक वसाहतीतील हातमोजे तयार करणाऱ्या एका कारखान्याला मध्यरात्री भीषण आग लागली. या दुर्घटनेत सहा कामगारांचा मृत्यू झाला आहे. पोलिस आयुक्त मनोज लोहिया यांनी सकाळी दुर्घटनास्थळाला भेट देऊन पंचनामा केला. विधान परिषदेतले विरोधी पक्षनेते अंबादास दानवे यांनीही कारखान्याला भेट देऊन पाहणी केली. कारखान्यात मध्यरात्री एक वाजेच्या सुमारास मोठा स्फोट होऊन आग लागली होती. या आगीतून सुमारे १५ कामगारांना सुखरूप बाहेर काढण्यात आलं, तर होरपळलेल्या सहा कामगारांना घाटी रुग्णालयात नेण्यात आलं असता, डॉक्टरांनी तपासून त्यांना मृत घोषित केलं.
****
मुख्यमंत्री एकनाथ शिंदे यांच्या हस्ते मुंबईत आज महा स्वच्छता अभियानाला सुरुवात करण्यात आली. गेट वे ऑफ इंडिया इथल्या छत्रपती शिवाजी महाराज आणि स्वामी विवेकानंद यांच्या पूर्णाकृती पुतळ्यांना मुख्यमंत्र्यांनी पुष्पांजली अर्पण केली. त्यानंतर महाराष्ट्र गीतानं अभियानाची सुरुवात करण्यात आली. मुंबईत दहा ठिकाणी हे स्वच्छता अभियान राबवण्यात येत आहे. शिंदे यांनी दूरदृश्य प्रणालीद्वारे संवाद साधून अभियानाचा आढावा घेतला.
****
परभणी जिल्ह्यात रब्बी हंगामासाठीच्या प्रधानमंत्री पीक विमा संरक्षण योजनेसाठी जिल्ह्यातल्या सव्वा पाच लाखांहून अधिक शेतकऱ्यांनी ३ लाख ८९ हजार हेक्टरवरील ज्वारी, हरभरा, गहू आणि भुईमुगासाठी सुमारे दीड हजार कोटी रुपयांचा विमा उतरवला आहे. यात हरभरा पिकाचे सर्वाधिक २ लाख ८९ हजार हेक्टर क्षेत्र संरक्षित करण्यात आल्याची माहिती जिल्हा अधीक्षक कृषी अधिकारी कार्यालयाने दिली आहे.
****
बीड जिल्हा रुग्णालयात काल आयुष अभियान अंतर्गत विविध आजारांचं रोगनिदान आणि उपचार शिबीर घेण्यात आलं. एक हजार दोनशे ३५ रुग्णांनी या शिबीराचा लाभ घेतला.
****
लातूर शहरात पंतप्रधान आवास आणि रमाई आवास योजनेच्या माध्यमातून २०२३ या वर्षात एकूण २ हजार ८३६ घरकुलांना मंजुरी देण्यात आली. या वर्षभरात एक हजार सातशे ७६ कुटुंबांनी नव्या घरात प्रवेश केला, असं लातूर महानगरपालिकेने कळवलं आहे.
****
Saturday, 30 December 2023
TEXT - आकाशवाणी छत्रपती संभाजीनगर – दिनांक 30.12.2023 रोजीचे सायंकाळी 06.10 वाजताचे मराठी बातमीपत्र
Regional Marathi Text
Bulletin, Chhatrapati Sambhajinagar
Date – 30 December
2023
Time 18.10 to 18.20
Language Marathi
आकाशवाणी छत्रपती
संभाजीनगर
प्रादेशिक बातम्या
दिनांक – ३० डिसेंबर २०२३ सायंकाळी ६.१०
****
· जालना ते छत्रपती शिवाजी महाराज टर्मिनस मुंबई दरम्यान वंदे भारत एक्सप्रेसला
प्रारंभ.
· विकसित भारत संकल्प यात्रा सर्वसामान्यांसाठी लाभदायक-केंद्रीय मंत्री
भूपेंद्र यादव.
· डॉ.बाबासाहेब आंबेडकर मराठवाडा विद्यापीठाच्यावतीने अंबाजोगाईत कौशल्य विकास केंद्र.
आणि
· भारतीय महिला संघांच्या दुसऱ्या एकदिवसीय क्रिकेट सामन्यात ऑस्ट्रेलियाचं भारतासमोर
२५९ धावांचं आव्हान.
****
जालना ते छत्रपती शिवाजी महाराज टर्मिनस
मुंबई दरम्यान वंदे भारत एक्सप्रेसला आजपासून प्रारंभ झाला. पंतप्रधान नरेंद्र
मोदी यांनी अयोध्या धाम रेल्वे स्थानकातून दूरदृष्य प्रणालीद्वारे हिरवा झेंडा
दाखवून पाच वंदे भारत रेल्वे आणि दोन अमृत भारत रेल्वेना रवाना केलं. दरम्यान, अयोध्या
इथं नूतनीकरण करण्यात आलेल्या अयोध्याधाम जंक्शन रेल्वे स्थानकाचं पंतप्रधानांच्या
हस्ते उद्घाटन झालं. नव्याने बांधण्यात आलेल्या अयोध्या विमानतळाच्या उद्घाटनासह, १५
हजार ७०० कोटी रुपयांच्या विविध विकास प्रकल्पांचं लोकार्पण देखील मोदी यांच्या
हस्ते आज करण्यात आलं.
जालना इथं रेल्वे राज्यमंत्री रावसाहेब
दानवे, उपमुख्यमंत्री देवेंद्र फडणवीस, विधान परिषदेतले विरोधी
पक्षनेते अंबादास दानवे यांच्यासह अनेक मान्यवर या कार्यक्रमाला उपस्थित होते.
रावसाहेब दानवे यांनी यावेळी रेल्वेसाठी होणाऱ्या तरतुदींचा आढावा घेत, देशात
२०२४ पर्यंत संपूर्ण रेल्वे मार्गाचं विद्युतीकरण होणार असल्याचं सांगितलं...
मनमाडपासून
संभाजीनगर पर्यंत एक हजार कोटी रुपयांच्या दुहेरीकरणाला मान्यता मिळाली. मार्चपर्यंत
काम सुरु होणार आहे. १४ ते २३ या काळामध्ये रेल्वेवरचे बजेट वाढलेलं आहे. रेल्वेला
या वर्षी बारा हजार कोटी रुपयाचे बजेट मोदीजींनी दिलेलं आहे. आपल्याला माहिती आहे की,
२००६ ते २०१४ पर्यंत दररोज फक्त चार किलोमीटरचा रस्ता पूर्ण होत होता. आता २०२३ ला
बारा किलोमीटर पर डे व्हायला लागला. आणि २०२४ नंतर पर डे सोळा किलोमीटरचा रस्ता केला
जाणार आहे.
राज्यातली ही सहावी वंदे भारत रेल्वे
जालन्यातून सुरु झाल्याबद्दल त्यांनी संपूर्ण मराठवाड्यातल्या जनतेचं अभिनंदन
केलं. यानंतर या रेल्वे लातूरच्या रेल्वे बोगी कारखान्यात बांधण्यात येतील, असं
फडणवीस यांनी सांगितलं...
महाराष्ट्रातील सहावी वंदे
भारत ट्रेन ही आता जालन्यातून सुरु झाली आहे. महाराष्ट्रामध्ये एक लाख सहा हजार कोटी
रुपयांची रेल्वेची कामं ही आज सुरु आहे. आणि या वर्षी तेरा हजार कोटी रुपये हे आपल्याला
त्याठिकाणी मिळालेले आहेत. हा अभुतपूर्व असा रेल्वेचा विस्तार जो यापुर्वी कधीच झाला
नव्हता तो आपण केला. ही संपूर्ण भारतीय बनावटीची ट्रेन आहे. आणि पुढच्या काळामध्ये
आपल्या लातूरच्या कोच फॅक्टरीमध्ये अशाच प्रकारची वंदे भारत ट्रेन ही मराठवाड्यात त्या
ठिकाणी बनणार आहे.
छत्रपती संभाजीनगर रेल्वे स्थानकावर या
रेल्वेचं उत्साहास स्वागत करण्यात आलं. शालेय विद्यार्थी या वेळी मोठ्या संख्येनं
उपस्थित होते.
दरम्यान, ही रेल्वे सध्या
मुंबईत पोहोचते आहे. मुख्यमंत्री एकनाथ शिंदे या रेल्वेच्या स्वागतासाठी छत्रपती
शिवाजी महाराज टर्मीनसवर उपस्थित राहणार आहेत.
****
विकसित भारत संकल्प यात्रा आज छत्रपती
संभाजीनगर शहरात मयूरबन कॉलनीत पोहोचली. केंद्रीय अर्थराज्यमंत्री डॉ भागवत कराड
यांच्यासह अनेक मान्यवरांनी यावेळी नागरिकांशी संवाद साधला. शासनाच्या विविध
योजनांची यावेळी माहिती देण्यात आली.
विकसित भारत संकल्प यात्रा
सर्वसामान्यांसाठी लाभदायक ठरत आहे, असं केंद्रीय मंत्री
भूपेंद्र यादव यांनी म्हटलं आहे. हिंगोली जिल्ह्यातील फाळेगाव इथं आज विकसित भारत
संकल्प यात्रा पोहोचली,
या यात्रेला यादव संबोधित करत होते. शालेय विद्यार्थ्यांना
यावेळी यादव यांच्या हस्ते सायकल वाटप करण्यात आल्या. विद्यार्थ्यांनी पॉलिथिनच्या
वापरावर निर्बंध घालावा,
प्लास्टिक मुक्तीची ही चळवळ भविष्यासाठी महत्वाची ठरेल, असं
यादव यांनी यावेळी सांगितलं. आमदार तानाजी मुटकुळे यांच्यासह अनेक मान्यवर यावेळी
उपस्थित होते.
****
नांदेड इथल्या तरोडा खुर्द भागात आज
विकसित भारत संकल्प यात्रेचा महानगरपालिका हद्दीत समारोप करण्यात आला, यावेळी
खासदार प्रताप पाटील चिखलीकर उपस्थित होते. नांदेड महापालिका हद्दीत २४ डिसेंबर ते
३० डिसेंबर या कालावधीत ही यात्रा शहरातल्या १३ प्रभागांमध्ये नेण्यात आली.
जिल्ह्यातल्या १६ नगर परिषद आणि नगर पंचायत कार्यक्षेत्रात आजपासून विकसित भारत
संकल्प यात्रा सुरु होत आहे. अर्धापूर नगर पंचायतपासून या यात्रेला सुरुवात होत
असून, नागरिकांनी विविध योजनांसाठी अर्ज सादर करावेत, योजनांचा लाभ घ्यावा
असं आवाहन नगरपालिका प्रशासन विभागाचे जिल्हा सह आयुक्त गंगाधर इरलोड यांनी केलं
आहे.
दरम्यान मेरी कहानी मेरी जुबानी अंतर्गत
नागरिक आपल्याला झालेल्या लाभाची माहिती देत आहेत. सुशीलाबाई हराळे आणि सय्यद
युसूफ यांनी आपलं मनोगत या शब्दांत व्यक्त केलं...
बाईट – सुशीलाबाई हराळे आणि
सय्यद युसूफ, जि.नांदेड
****
अयोध्येत येत्या २२ जानेवारीला
नवनिर्मित श्रीराम जन्मभूमी मंदिरामध्ये प्रभू श्रीराम यांच्या बालमूर्तीची
प्रतिष्ठापना होणार आहे. या पार्श्वभूमीवर राष्ट्रीय स्वयंसेवक संघ तसंच विश्व
हिंदू परिषदेने विविध कार्यक्रमांचं आयोजन केलं आहे. प्रत्येक घराघरात मंगल अक्षता
देऊन निमंत्रण देण्यास एक जानेवारीपासून प्रत्यक्ष प्रारंभ होत आहे. आज छत्रपती
संभाजीनगर इथं पत्रकार परिषदेत ही माहिती देण्यात आली. या भव्य सोहळ्याला जाणाऱ्या
चार हजार संतांसाठी छत्रपती संभाजीनगरमधून भगवी वस्त्रे अयोध्येला पाठवली जाणार
आहेत. विभागात २० हजार मंदिरांमध्ये मोठ्या स्क्रीनवर अयोध्येतला सोहळा दाखवण्याची
व्यवस्था करण्यात आली आहे.
****
पंतप्रधान नरेंद्र मोदी उद्या सकाळी ११
वाजता आकाशवाणीवरच्या मन की बात या कार्यक्रमातून देशवासियांशी संवाद साधणार आहेत.
या कार्यक्रमाचा हा एकशे आठावा भाग असेल. आकाशवाणी आणि दूरदर्शनच्या सर्व
केंद्रावरुन या कार्यक्रमाचं थेट प्रसारण होईल.
****
डॉ.बाबासाहेब आंबेडकर मराठवाडा
विद्यापीठाच्यावतीने अंबाजोगाई शहरात कौशल्य विकास केंद्र स्थापन करण्यात येणार
आहे. या केंद्रासाठी राज्य शासनाने २५ एकर जमीन मंजूर केली असून कुलगुरु डॉ.प्रमोद
येवले यांच्या उपस्थितीत ही जागा ताब्यात घेऊन फलक लावण्यात आला. पठाण मांडवा
रस्त्यावर असलेल्या या जागेवर कौशल्य विकासाचे विविध अभ्यासक्रम सुरु केले जाणार
असून, त्यासाठी केंद्र राज्यशासनाकडे २५ कोटी रुपयांचा प्रस्ताव पाठवण्यात आला
असल्याची माहिती विद्यापीठाच्या जनसंपर्क विभागाकडून देण्यात आली.
****
कुस्तीपटू खाशाबा जाधव यांचा जन्मदिन
म्हणजेच १५ जानेवारी हा दरवर्षी राज्याचा क्रीडा दिन म्हणून साजरा करण्यास शासनाने
मान्यता दिली असून,
त्यानुसार क्रीडा सप्ताह आणि राष्ट्रीय क्रीडा दिनाच्या
अनुदानामध्ये वाढ करण्यात आल्याची माहिती, क्रीडा आणि युवक
कल्याणमंत्री संजय बनसोडे यांनी दिली आहे. ते मुंबई इथं बोलत होते.
****
भारत आणि ऑस्ट्रेलिया महिला क्रिकेट
संघांतला मुंबईतल्या वानखेडे मैदानावर सुरु असलेल्या दुसऱ्या सामन्यात प्रथम
फलंदाजी करत ऑस्ट्रेलिया संघाने निर्धारित ५० षटकात ८ बाद २५८ धावा केल्या आहेत.
भारताच्या दीप्ती शर्मा हीने ५ खेळाडू बाद करण्याची किमया केली आहे. शेवटचं वृत्त
हाती आलं तेंव्हा भारतीय संघाच्या ६ षटकात ३२ धावा झाल्या होत्या.
****
बीड इथं दिवंगत झुंबरलाल खटोड सामाजिक
प्रतिष्ठानच्यावतीने घेण्यात येणाऱ्या राज्यस्तरीय कीर्तन महोत्सवाला उद्यापासून
सुरुवात होत आहे. खटोड प्रतिष्ठानच्यावतीने गेल्या २० वर्षापासून मावळत्या वर्षाला
निरोप आणि नवीन वर्षाचं स्वागत अध्यात्मिक विचारांनी करण्यासाठी हा महोत्सव आयोजित
केला जातो.
****
गोंदिया जिल्ह्यातल्या अदासी गावात आज गोंदिया ग्रामीण पोलिसांनी ८० हजार रुपयांचा बेकायदेशीररित्या वाहून
नेण्यात येणार दारु साठा जप्त करण्यात आला. देशी-विदेशी दारूसह मोहफुलाची दारू
देखील वाहून नेण्यात होती अशी माहिती पोलिसांनी दिली.
****
धुळे महानगरपालिकेच्या पंचवार्षिक
कार्यकाळाची मुदत आज पूर्ण झाली. त्यामुळे राज्य शासनाने धुळे महापलिकेच्या
प्रशासक पदावर आयुक्त अमिता दगडे पाटील यांची नियुक्ती केली आहे. तसे आदेश
शासनाच्या उपसचिव प्रियंका कुलकर्णी-छापवाले यांनी जारी केले आहेत. अखेरच्या दिवशी
मावळत्या महापौर प्रतिभा चौधरी यांनी शहराच्या विकासासाठी काम केल्याची भावना
व्यक्त केली.
****
यवतमाळ पोलिसांनी प्रतिबंधित नॉयलॉन मांजा विक्रेत्यावर कारवाई करत आज साडे पाच
लाखाहून अधिक रुपयांचा मुद्देमाल जप्त केला. या प्रकरणी संबंधित आरोपीविरुद्ध गुन्हे
दाखल करण्यात आले.
****
Text - आकाशवाणी छत्रपती संभाजीनगर, दिनांक: 30.12.2023 रोजीचे दुपारी: 01.00 वाजेचे मराठी बातमीपत्र
Regional Marathi Text Bulletin, Chhatrapati Sambhajinagar
Date : 30 December 2023
Time : 01.00 to 01.05 PM
Language Marathi
आकाशवाणी छत्रपती संभाजीनगर
प्रादेशिक बातम्या
दिनांक : ३० डिसेंबर २०२३ दुपारी १.०० वा.
****
जालना ते छत्रपती शिवाजी महाराज टर्मिनस मुंबई दरम्यान वंदे भारत एक्सप्रेसला आजपासून प्रारंभ झाला. पंतप्रधान नरेंद्र मोदी यांनी अयोध्या रेल्वे स्थानकातून दूरदृष्य प्रणालीद्वारे हिरवा झेंडा दाखवून या रेल्वेला रवाना केलं. यासह इतर पाच वंदे भारत आणि दोन अमृत भारत रेल्वेला देखील यावेळी सुरुवात करण्यात आली.
जालना इथं केंद्रीय रेल्वे राज्यमंत्री रावसाहेब दानवे आणि उपमुख्यमंत्री देवेंद्र फडणवीस या कार्यक्रमाला उपस्थित आहेत. २०१४ पासून अर्थसंकल्पात रेल्वेसाठी विशेष तरतूद करण्यात येत असल्याचं दानवे यावेळी म्हणाले. देशात २०२४ पर्यंत संपूर्ण रेल्वे मार्गाचं विद्युतिकरण होणार असल्याचं त्यांनी सांगितलं. एखाद्या प्रगत राष्ट्रातली रेल्वे जशी असते, तशी वंदे भारत रेल्वे तयार करण्यात आल्याचं, फडणवीस यावेळी म्हणाले. राज्यातली ही सहावी वंदे भारत रेल्वे जालन्यातून सुरु झाल्याबद्दल त्यांनी संपूर्ण मराठवाड्यातल्या जनतेचं अभिनंदन केलं.
दरम्यान, अयोध्या इथं नूतनीकरण करण्यात आलेल्या अयोध्याधाम जंक्शन रेल्वे स्थानकाचं पंतप्रधानांच्या हस्ते उद्घाटन झालं. नव्याने बांधण्यात आलेल्या अयोध्या विमानतळाच्या उद्घाटनासह, १५ हजार ७०० कोटी रुपयांच्या विविध विकास प्रकल्पांचं लोकार्पण देखील पंतप्रधानांच्या हस्ते होणार आहे.
****
पंतप्रधान नरेंद्र मोदी उद्या आकाशवाणीवरच्या मन की बात या कार्यक्रमातून देशवासियांशी संवाद साधणार आहेत. या कार्यक्रमाचा हा एकशे आठावा भाग असेल. आकाशवाणी आणि दूरदर्शनच्या सर्व केंद्रावरुन सकाळी ११ वाजता या कार्यक्रमाचं थेट प्रसारण होईल.
****
राज्य शासनाच्या महासंकल्प रोजगार अभियानाअंतर्गत महानिर्मितीद्वारे सरळसेवा भरती प्रक्रियेतल्या उमेदवारांना काल मुंबईत उपमुख्यमंत्री देवेंद्र फडणवीस यांच्या हस्ते नियुक्तीपत्रांचं वाटप करण्यात आलं. राज्यात खात्रीशीर, दर्जेदार आणि अखंडित वीज पुरवठा करणं, हे राज्य वीज कंपनी समोर आव्हान असून, यासाठी पारंपरिक ऊर्जेसोबतच अपारंपरिक ऊर्जा निर्मिती वाढवण्यासाठी सरकार तिनही वीज कंपन्यांना आवश्यक ती सर्व मदत आणि संसाधने उपलब्ध करून देईल, अशी ग्वाही फडणवीस यांनी यावेळी दिली.
****
नांदेड जिल्ह्यातल्या १६ नगरपरिषद आणि नगरपंचायत कार्यक्षेत्रात आजपासून विकसित भारत संकल्प यात्रा सुरु होत आहे. अर्धापूर नगरपंचायतपासून या यात्रेला सुरुवता होत असून, नागरीकांना विविध योजनांची माहिती दिली जात आहे. नागरिकांनी केंद्र आणि राज्य शासनाच्या विविध योजनांसाठी अर्ज सादर करावेत, योजनांचा लाभ घ्यावा असं आवाहन नगरपालिका प्रशासन विभागाचे जिल्हा सह आयुक्त गंगाधर इरलोड यांनी केलं आहे.
****
लातूर जिल्ह्यातल्या औसा इथल्या तालुका क्रीडा संकुलासाठी क्रीडा विभागाला औसा शहरातील जलसंपदा विभागाची अडीच हेक्टर जागा कायमस्वरूपी हस्तांतरित करण्यास मान्यता देण्यात आली आहे. यासंदर्भात औसाचे आमदार अभिमन्यू पवार यांनी मुंबईत उपमुख्यमंत्री देवेंद्र फडणवीस आणि क्रीडा मंत्री संजय बनसोडे यांची भेट घेतली होती, त्यानंतर ही मान्यता देण्यात आली.
****
आगामी लोकसभा निवडणुकीच्या पार्श्वभूमीवर लातूर इथं आजपासून विशेष मतदार नोंदणी शिबीर आयोजित करण्यात आलं आहे. एक जानेवारीपर्यंत हे शिबिर सुरु राहणार असून, शहरातल्या सर्व नव मतदारांनी मतदार नोंदणी करण्याचं आवाहन उपविभागीय अधिकारी रोहीणी नऱ्हे यांनी केलं आहे.
****
राष्ट्रीय अन्न सुरक्षा अभियान कडधान्य आणि पौष्टीक तृणधान्य विकास कार्यक्रमाअंतर्गत घरगुती साठवणुकीची कोठी या घटकांचा लाभ घेण्यासाठी नांदेड जिल्ह्यात अर्ज मागवण्यात येत आहे. लाभार्थ्यांनी विहित नमुन्यातील अर्ज तालुका कृषी अधिकारी कार्यालयाकडे सादर करावेत, असं आवाहन जिल्हा अधिक्षक कृषी अधिकारी भाऊसाहेब बऱ्हाटे यांनी केलं आहे. अनुसूचित जाती, जमाती, महिला शेतकरी, अल्प आणि अत्यल्प भुधारक शेतकरी यासाठी अर्ज करू शकणार आहेत.
****
छत्रपती संभाजीनगर इथं विभागीय आयुक्त कार्यालयात आठ जानेवारीला लोकशाही दिनाचं तसंच विभागीय महिला लोकशाही दिनाचं आयोजन करण्यात आलं आहे. यासाठी तक्रारदारांनी आपले अर्ज विहित मुदतीत आवश्यक त्या कागदपत्रासह विभागीय आयुक्त कार्यालयात जमा करावेत, असं कार्यालयानं प्रसिध्दी पत्रकाद्वारे कळवलं आहे.
****
रायगड जिल्ह्यात ताम्हिणी घाटात कोंडेदर वळणा जवळ खाजगी बसला झालेल्या भीषण अपघातात दोन महिलांचा मृत्यू झाला, तर ५५ जण जखमी झाले. जखमींना माणगाव इथल्या उपजिल्हा रुग्णालयात उपचारासाठी दाखल करण्यात आलं आहे. आज सकाळी ही बस पुण्याहून माणगाव कडे जात असताना रस्त्याच्या खाली उतरुन पलटी झाल्याने हा अपघात झाला.
****
भारत आणि ऑस्ट्रेलिया महिला क्रिकेट संघांदरम्यान सुरु असलेल्या तीन एकदिवसीय सामन्यांच्या मालिकेतला दुसरा सामना आज मुंबईतल्या वानखेडे मैदानावर खेळला जाणार आहे. दुपारी दीड वाजता सामन्याला सुरुवात होईल.
****
