Regional Urdu Text Bulletin, Chatrapati Sambhajinagar
Date: 27 December-2023
Time: 09:00-09:10 am
آکاشوانی چھترپتی سمبھاجی نگر
علاقائی خبریں
تاریخ: ۲۷؍دسمبر ۲۰۲۳ء
وقت: ۱۰:۹-۰۰:۹
***** ***** *****
::::: سرخیاں::::::
پیش ہے خاص خبروں کی سرخیاں:
٭ ترقی یافتہ بھارت سنکلپ یاترا کے مستفیدین سے آج وزیرِ اعظم نریندر مودی کی بذریعۂ ویڈیو کانفرنسنگ گفت و شنید۔
٭ جدید ترین تکنالوجی سے مزین ’’امپھال وِناشِکا‘‘ فوج کے بحری بیڑے میں شامل۔
٭ ریاست میں کورونا کی صورتحال کے پیشِ نظر ماہر ڈاکٹرس کی خصوصی ٹاسک فورس کا قیام۔
اور ٭ اَدیتی سوامی اور مانَو جادھو کو ریاستی سطح کے تیر اندازی مقابلوں میں گولڈ میڈل۔
***** ***** *****
اب خبریں تفصیل سے:
وزیر اعظم نریندر مودی آج ترقی یافتہ بھارت سنکلپ یاترا کے مستفیدین سے ٹیلی کانفرنسنگ نظام کے ذریعے رابطہ کریں گے۔ اس ٹیلی کانفرنسنگ گفت و شنید میں ملک بھر کے ترقی یافتہ بھارت یاترا کے دوران سرکاری فلاحی اسکیمات سے استفادہ کرنے والے ہزاروں مستفیدین شامل ہوں گے۔ ساتھ ہی کچھ مرکزی وزرا، ارکانِ پارلیمان اور اراکینِ اسمبلی سمیت مقامی عوامی نمائندے بھی ان آن لائن پروگرام میں شریک ہوں گے۔
چھترپتی سمبھاجی نگر کے سوت گرنی چوک علاقے میں مرکزی مملکتی وزیرِمالیات ڈاکٹر بھاگوت کراڑ کی موجودگی میں یہ رابطہ پروگرام منعقد ہوگا۔
***** ***** *****
دریں اثناء مرکزی وزیر ڈاکٹر بھاگوت کراڑ بتایاکہ ترقی یافتہ بھارت یاترا کی معرفت شہریوں کو فائدہ پہنچانے والی اسکیمیں مستحقین تک پہنچائی جارہی ہیں۔ کراڑ کل پربھنی میں ایک اطلاعی کانفرنس سے خطاب کررہے تھے۔
ناندیڑ ضلع میں رابطہ وزیر گریش مہاجن نے کل اس یاترا کی معلوماتی تصویری گاڑی کا افتتاح کیا۔ اس موقعے پر مہاجن نے کہا سرکاری اسکیموں کو سماج کے محروم طبقات تک پہنچانے کیلئے بھارت سنکلپ یاترا کارگر ثابت ہورہی ہے۔ چھترپتی سمبھاجی نگر کے چکل تھانہ اور پنڈلک نگر علاقوں میںبھی کل ترقی یافتہ بھارت سنکلپ یاترا کی آمد ہوئی۔ اس موقعے پر شہریوں نے جوش وخروش سے اس یاترا کا خیر مقدم کیا اور مرکزی حکومت کی مختلف اسکیموں کی معلومات حاصل کیں۔
***** ***** *****
لاتور ضلعےکی مختلف گرام پنچایتوں میں کل ترقی یافتہ بھارت یاترا کے ذریعے عو ام کو سرکاری اسکیمات کی جانکاری دی گئی۔ اس دوران مستحق شہریوں میں مختلف فلاحی اسکیمات کے فوائد تقسیم کیے گئے اور مختلف اسکیموں سے استفادے کیلئے شہریوں کے ناموں کا اندراج کیا گیا۔
جالنہ ضلعے کے لاوَنی، آرڈا تولاجی، جھرپی، مال کھیڑا کے ساکنان نے اس یاترا کا پُرجوش انداز میںاستقبال کیا۔ مستفیدین نے بتایا کہ وزیرِ اعظم کسان سمان اسکیم اور فصل بیمہ اسکیم سے مستحق کاشتکاروں کو فائدہ پہنچ رہا ہے۔
***** ***** *****
جدید ترین میزائلوں سے لیس بحری جہاز ’’امپھال وِناشِکا‘‘ کو کل بھارتی فوج کے بحری بیڑے شامل کرلیا گیا۔ ممبئی کے بحری پورٹ وزیرِ دفاع راج ناتھ سنگھ کی موجودگی میں یہ تقریب منعقد ہوئی۔ وزیرِ اعلیٰ ایکناتھ شندے، بحریہ کے سربراہ ایڈمرل آر ہری کمار سمیت متعدد معزز شخصیات اس تقریب میں موجود تھیں۔ 163 میٹر لمبائی اور سات ہزار چار سو ٹن وزنی اس بحری جہاز کا 75 فیصد مواد ملک میںہی تیار کیا گیا ہے۔
***** ***** *****
عام شہریوں میں موسمیاتی تبدیلیوں سے متعلق بیداری پیدا کرنے کے مقصد سے جلد ہی پنچایت سمیتی سطح پر موسمیاتی معلومات فراہمی کی سہولیات شروع کی جائیں گی۔ یہ اعلان مرکزی وزیر برائے ارضیاتی سائنس کرن رِجیجو نے کیا۔ رِجیجو کل نئی دہلی میں محکمہ موسمیات کے 150 سال مکمل ہونے کے موقع پر ایک علامتی نشان کی رُونمائی کی تقریب سے خطاب کر رہے تھے۔
***** ***** *****
سائنس کی معلوماتی نمائشوں کے ذریعے سائنسی نقطہ نظر ہر گھر تک پہنچے گا۔ ریاستی گورنر رمیش بئیس نے اس یقین کا اظہار کیا ہے ۔ گورنر رمیش بئیس کل پونے میں بچوں کی 50ویں قومی سائنس نمائش کی افتتاحی تقریب سے خطاب کررہے تھے۔ نائب وزیر اعلیٰ اجیت پوار سمیت کئی معززشخصیات اس سائنسی نمائش کی افتتاحی تقریب میں شریک تھے۔ اس موقعے پر گورنر رمیش بئیس نے طلباء کے سائنسی تصورات کو فروغ دینے کیلئےاسکولوں میں اس طرح کی سائنسی نمائشوں کے انعقاد پر زور دیا۔
***** ***** *****
جلگائوں ضلعے کے املنیر میں آئندہ دو تا چار فروری کے درمیان منعقدہونے والے 97 ویں کُل ہند بھارتی مراٹھی ساہتیہ سمّیلن کیلئے حکومت کی جانب سے دو کروڑ روپئے کی امداد منظور کی گئی ہے۔ مرکزی پارلیمانی اُمور محکمے کے مملکتی وزیر وی مرلی دھر نے 40 لاکھ رو پئے‘ جلگائوں کے رابطہ وزیر گلاب رائوپاٹل نے خصوصی طور پر نگروتھان اسکیم میں سے ایک کروڑ 20لاکھ روپئے جبکہ رُکنِ پارلیمان رَکشا کھڑسے کی جانب سے 20 لاکھ روپئے کی امداد منظور کی گئی ہے۔
***** ***** *****
ریاستی وزیرِ صحت ڈاکٹر تانا جی ساونت نے بتایا ہے کہ ریاست میں کووڈ کے مریضوں کی تعداد میں اضافہ اور کووِڈ کی نئی قسم جے این ون کے پس منظر میں ماہر ڈاکٹروں کی ایک خصوصی ٹاسک فورس تشکیل دی گئی ہے۔تاناجی ساونت کل ممبئی میں ایک اطلاعی کانفرنس میں بول رہے تھے۔ انڈین میڈیکل ریسرچ کونسل کے سابق صدر ڈاکٹر رمن گنگا کھیڑکر اس خصوصی ٹاسک فورس کے سربراہ ہیں۔ یہ خصوصی ٹاسک فورس علاج کے انتظامات کی منصوبہ بندی اور مریضوں کیلئے مناسب دوائیوں سے متعلق رہنما خطوط کی سفارش کرے گی۔
***** ***** *****
دریںاثنا ریاست میںکل تین ہزار پانچ سو سے زیادہ کووِڈ ٹسٹ میں 37 نئے مریضوں کا انکشاف ہوا‘ جبکہ ان نئے مریضوں میں سے گیارہ مریض صحت یاب ہوگئے۔ ناسک ضلعے میں کل کووِڈ کی نئی قسم جے این ون کے ایک مریض کا پتہ چلا ہے۔ متاثرہ خاتون کا تعلق ترمبکیشور سے ہے اور اسے ضلع اسپتال کے علیحدہ وارڈ میں رکھا گیا ہے۔
دریں اثنا شرڈی کے سائی مندر میں درشن کیلئے آنے والے عقیدت مندوں کو ماسک کا استعمال لازمی قرار دیا گیا ہے۔
***** ***** *****
ریاستی حکومت نے حفاظتی ٹیکوں سے محروم بچوں کی ٹیکہ اندازی کیلئے خصوصی مہم شروع کی ہے۔مزدوروں اور محنت کشوں کی نقل مکانی اور بعض مقامات پر ٹیکہ اندازی کی مخالفت اور ملازمین کی ہڑتال سبب ٹیکہ کاری کا ہدف حاصل نہیں ہو سکا تھا۔ لہٰذا مقررہ ہدف تک پہنچنے کیلئے ٹیکہ اندازی مہم کا آئندہ مرحلہ ماہ جنوری سے شروع کرنے کی اطلاع محکمۂ صحت کے اسسٹنٹ ڈائریکٹر ڈاکٹر پروین وید پاٹھک نے دی ہے۔
***** ***** *****
جالنہ میں کل خوردنی اجناس میلے کا انعقاد کیا جارہا ہے۔ جے ای ایس کالج علاقے میں منعقدہ دو روزہ میلے میں اجناس کی خرید و فروخت اور اناج سے تیار شدہ مختلف پکو انوں کے تقریباً 30 اسٹال لگائے جائیں گے۔ کل صبح آٹھ بجے جالنہ شہر کے چھترپتی شیواجی مہاراج کے مجسّمے سے طلبہ کی بیداری ریلی نکلے گی۔ منتظمین نے عوام سے اس میلے سے استفادہ کرنے کی اپیل کی ہے۔
***** ***** *****
دھارا شیو میں جاری 22 ویں ریاستی سب جونیئر تیر اندازی ٹورنامنٹ کے کمپائونڈ زمرے میں انفرادی خواتین زمرے میں ستارا کی اَدیتی سوامی نے9 69 نشان‘ مردوں کے زمرے میں بلڈانہ کے مانَو جادھو نے 702 نشان حاصل کرکے سونے کا تمغہ جیتا۔ کمپائونڈ زمرے میں اَدیتی سوامی اور اوم کدم نے سونے کا تمغہ حاصل کیا۔
***** ***** *****
مہاراشٹر امیچوئیر جمناسٹک تنظیم کی جانب سے رتنا گیری ضلعےکے ڈیروَن میں آرٹسٹک چمپئن شپ منعقدہوئی۔ اس مقابلے میں چھترپتی سمبھاجی نگر کی ہرشیکا بیوال نے دس سال سے کم عمر کے زمرے میں سونے کا تمغہ جبکہ بارہ سال سے کم عمر کے زمرے میں رُودرانی میٹھا والا نے چاندی کا تمغہ جیتا۔
***** ***** *****
قومی صارفین دِن کے موقعے پر کل پربھنی میں ضلع کلکٹر رگھو ناتھ گائوڑے کی موجودگی میں خصوصی میٹنگ منعقد کی گئی۔ دستوری حقوق کو سمجھنے اور حقوق کے تئیں بیدار رہنے کی اپیل کلکٹر گائوڑے نے کی۔
قومی صارفین دِن کے موقعے پر آج ناندیڑ میں ضلع کلکٹر دفتر میں خصوصی پروگرام منعقد ہوں گے۔
***** ***** *****
بچوں کا بہادری دن کل مختلف پروگراموں کے ذریعہ منایا گیا۔ ناندیڑ میں رابطہ وزیر گریش مہاجن کی موجودگی میں تمام مذاہب کے اجتماع کا انعقاد ہوا۔ چھترپتی سمبھاجی نگر میونسپل کارپوریشن میں بھی یومِ بہادریِ اطفال کے موقع پر سلامی دی گئی۔
***** ***** *****
دھاراشیو ضلعے کے قدیم ریکارڈ کی جانچ میں اب تک ایک ہزار 572 کُنبی‘ کُنبی مراٹھا‘ مراٹھا-کُنبی اندراج پائے گئے۔ ایک ہزار733 افراد کو مراٹھا کُنبی‘ کُنبی مراٹھا اور کُنبی ذات کے صداقت نامے دئیے جانے کی اطلاع ضلع انتظامیہ نے دی ہے۔
***** ***** *****
مرکزی انتخابی کمیشن کی ہدایت پر چھترپتی سمبھاجی نگر میں عوام کو الیکٹرانک ووٹنگ مشین (EVM)سے متعلق بنیادی معلومات فراہم کرنے کیلئے بیداری مہم چلائی جارہی ہے۔ کل شہر میں اس مہم کا حصہ بن کر شہریان نے الیکٹرانک ووٹنگ مشینوں کے بارے میں تفصیلی معلومات حاصل کی اور ذاتی طورپر رائے دہی مشین کو چلانے کا تجربہ کیا۔ مرکزی حکومت کی اس عوامی بیداری مہم کو شہریوں کی زبردست حمایت حاصل ہو رہی ہے۔
***** ***** *****
بھارت اور جنوبی افریقہ کے مابین سینچورین میں جاری پہلے ٹسٹ کرکٹ مقابلے میں کل پہلے دِن کے کھیل ختم ہونے تک بھارت نے پہلی اننگ میں آٹھ وِکٹ پر 208 رن بنائے ۔ محمد سراج بلّے بازی کیلئے آئے ہیں جبکہ لوکیش راہل 70 رن بناکر کریز پر موجود ہے۔
***** ***** *****
::::: سرخیاں::::::
آخرمیں اس بلیٹن کی خاص خبریں ایک بار پھر:
٭ ترقی یافتہ بھارت سنکلپ یاترا کے مستفیدین سے آج وزیرِ اعظم نریندر مودی کی بذریعۂ ویڈیو کانفرنسنگ گفت و شنید۔
٭ جدید ترین تکنالوجی سے مزین ’’امپھال وِناشِکا‘‘ فوج کے بحری بیڑے میں شامل۔
٭ ریاست میں کورونا کی صورتحال کے پیشِ نظر ماہر ڈاکٹرس کی خصوصی ٹاسک فورس کا قیام۔
اور ٭ اَدیتی سوامی اور مانَو جادھو کو ریاستی سطح کے تیر اندازی مقابلوں میں گولڈ میڈل۔
***** ***** *****
اس کے ساتھ ہی علاقائی خبریں ختم ہوئیں۔
اس خبرنامے کو آکاشوانی سماچار اورنگ آباد اور یوٹیوب چینل‘ اورنگ آباد NEWS AIR پر دوبارہ کسی بھی وقت سنا جا سکتا ہے۔
***** ***** *****
No comments:
Post a Comment