Regional Marathi Text Bulletin, Aurangabad Date – 03 October 2021 Time 1.00 to 1.05pm Language Marathi

 

Regional Marathi Text Bulletin, Aurangabad

Date – 03 October 2021

Time 1.00 to 1.05pm

Language Marathi

आकाशवाणी औरंगाबाद

प्रादेशिक बातम्या

दिनांक – ०३ ऑक्टोबर २०२१ दुपारी १.०० वा.

****

पश्चिम बंगाल विधान सभा पोटनिवडणुकीत भवानीपूर मतदार संघातून तृणमूल काँग्रेसच्या उमेदवार मुख्यमंत्री ममता बॅनर्जी अकराव्या फेरी अखेर ३८ हजार मतांनी आघाडीवर आहेत. त्यांच्याविरूद्ध भारतीय जनता पक्षाच्या प्रियांका टिब्रेवाल आणि मार्क्सवादी कम्युनिस्ट पक्षाचे श्रीजीब बिस्वास निवडणूक लढवत आहेत. समशेरगंज आणि जांगीपूर मतदारसंघातही सध्या मतमोजणी सुरु आहे.

ओडिसात पिपिली मतदार संघात बिजू जनता दलाचा उमेदवार रूद्र प्रताप महारथी ५१४० मतांनी आघाडीवर आहे. आज सकाळी या पोटनिवडणुकीतील मतदान मोजणीला प्रारंभ झाला.

****

भारतीय जनता पक्षानं नांदेड जिल्ह्यातील देगलूर विधानसभा मतदारसंघातून सुभाष साबणे यांना उमेदवारी जाहीर केली आहे. काँग्रेसचे आमदार रावसाहेब अंतापूरकर यांचं निधन झाल्यामुळे या मतदारसंघात पोटनिवडणूक होत आहे. साबणे यापूर्वी शिवसेनेकडून तीन वेळा आमदार म्हणून निवडून आले होते. भारतीय जनता पक्षाच्या मध्यवर्ती निवडणूक समितीनं पोटनिवडणुकीसाठी आज तीन उमेदवारांची घोषणा केली. यामध्ये तेलंगणातील हुजुराबाद मतदारसंघातून माजी मंत्री इटेला राजींदर यांना तर मिझोराममधील तूईरीयाल मतदारसंघातून के. लालडिरथारा यांना उमेदवारी देण्यात आली आहे.

****

मुंबई नजिक समुद्रात खासगी जहाजावर काल रात्री उशीरा सुरु असलेल्या रेव्ह पार्टीत अमली पदार्थ सेवन प्रकरणी जवळपास दहा जणांना ताब्यात घेण्यात आलं आहे. अमली पदार्थ नियंत्रण विभाग -एन.सी.बी. मुंबईच्या पथकानं छापे टाकून ही कारवाई केल्याचं कक्षाचे विभागीय संचालक समीर वानखेडे यांनी सांगितलं. ताब्यात घेतलेल्यांमध्ये प्रसिद्ध हिंदी चित्रपट अभिनेत्याच्या मुलासह अतिरिक्त पोलिस आयुक्त दर्जाचा अधिकारी तसंच तीन मुलींचाही समावेश आहे. अंमली पदार्थांचा मोठा साठा यावेळी जप्त करण्यात आला असून पुढील तपास सुरु आहे.

****

राष्ट्रीय तपास संस्थेनं दहशतवाद्यांना आर्थिक मदत करत असल्याच्या संशयावरुन जम्मू काश्मीरमधील पूंछ जिल्ह्यात नऊ ठिकाणी आज छापे घातले. याकामी त्यांनी जम्मू आणि काश्मीर पोलिस दल, केंद्रीय राखीव पोलिस दल, इंडो तिबेटीयन सीमा सुरक्षा दलाच्या मदतीनं हे छापे घालण्यात आले आहेत.

****

देशात २४ तासात २२ हजार ८४२ नवे कोरोना विषाणू संसर्ग बाधित रुग्ण आढळले असून २४४ नागरिकांचा मृत्य झाला आहे. सध्या देशात दोन लाख, ७० हजार, ५५७  सक्रीय रूग्ण आहेत. देशात कोरोना विषाणू संसर्गामुळे मृत झालेल्यांची एकूण संख्या चार लाख ४८ हजार, ८१७ इतकी झाली आहे.

आतापर्यंत देशात ९० कोटी ५१ लाख ७५ हजार ३४८ नागरिकांना कोरोना विषाणू प्रतिबंधात्मक लस देण्यात आली आहे. काल दिवसभरात ६५ लाख २७ हजारांहून अधिक लसीच्या मात्रा देण्यात आल्या.

****

सोलापूर इथं काल महात्मा गांधी जयंतीचं औचित्य साधत रस्त्यांवर थुंकणं थांबवण्यासाठी नो स्पिटींग अभियान सुरु झालं. भारतीय वैद्यकिय संघटना - आय.एम.ए.च्या सोलापूर शाखेतर्फे हे अभियान राबवलं जात आहे. परिसर स्वच्छतेसह सर्वांच्या  आरोग्यासाठी  हे अभियान राबवण्यात येत आहे. शहरवासियांना  फलक, भित्ती चित्रांच्या माध्यमातून तसंच शाळांमध्ये जाऊन विद्यार्थ्यांना मार्गदर्शन करून याद्वारे जनजागृती करण्यात येणार आहे.

****

मराठवाडा मुक्तीसंग्राम चळवळीतील अग्रणी स्वामी रामानंद तीर्थ यांना त्यांच्या जयंतीनिमित्त सर्वत्र आदरांजली वाहण्यात येत आहे.

****

उत्तराखंडमधील बागेश्वर जिल्ह्यात त्रिशुल पर्वतावरच्या नौदलाच्या गिर्यारोहण मोहिमेदरम्यान शुक्रवारी पहाटे झालेल्या हिमस्खलनात  बेपत्ता झालेल्यांपैकी चार जणांचे मृतदेह सापडले आहेत. चामोली इथं सापडलेल्या या मृतदेहांमध्ये लेफ्टनंट कमांडर अनंत कुकरेती आणि रजनीकांत यादव या मुंबईच्या दोन कर्मचाऱ्यांचा समावेश आहे. याशिवाय लेफ्टनंट कमांडर योगेश तिवारी आणि जवान हरि ओम यांचे मृतदेह सापडले आहेत. नौदलाचा अन्य एक जवान आणि एक शेरपा अजूनही बेपत्ता असून त्यांचा शोध सुरु आहे. संरक्षणमंत्री राजनाथ सिंह यांनी या घटनेवर शोक व्यक्त केला आहे.

नौदलाचा २० सदस्यीय संघ १५ दिवसांपूर्वी त्रिशुल पर्वत सर करण्यासाठी रवाना झाला. यापैकी १० गिर्यारोहक शुक्रवारी चढाई करत होते त्यावेळी अचानक हिमस्खलन झालं. सध्या खराब हवामानामुळे बचाव मोहीमेत अडचणी येत आहेत.

****

भारत - यजमान  ऑस्ट्रेलिया महिला क्रिकेट संघात सुरु असलेल्या दिवस-रात्र स्वरुपातल्या कसोटी सामन्यात काल तिसऱ्या दिवशी भारतानं आपला पहिला डाव ८ बाद ३७७ धावांवर घोषित केला. कालचा खेळ संपला, तेंव्हा ऑस्ट्रेलियाच्या  पहिल्या डावात ४ गडी गमावून १४३ धावा झाल्या होत्या. आस्ट्रेलिया संघ अजूनही २३४ धावांनी पिछाडीवर असून पहिल्या दोन दिवसात पावसामुळे व्यत्यय आलेला हा कसोटी सामना अनिर्णित राहण्याची शक्यता आहे.

//********//