आकाशवाणी छत्रपती संभाजीनगर प्रादेशिक बातम्या दिनांक: २५ फेब्रुवारी २०२४ सकाळी ७.१० मि.

 

Regional Marathi Text Bulletin, Chhatrapati Sambhajinagar

Date: 25 February 2024

Time: 7.10 AM to 7.20 AM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक: २५ फेब्रुवारी २०२४ सकाळी ७.१० मि.

****

 

·      देशभरातील पायाभूत आरोग्य सुविधा विकास प्रकल्पांचं आज पंतप्रधानांच्या हस्ते भूमिपूजन;बीड इथल्या अतिदक्षता विभागाचा समावेश

·      म्हाडाचे प्रकल्प वेळेत पूर्ण न करणाऱ्या विकासकांवर दंडात्मक कारवाईचे मुख्यमंत्र्यांचे निर्देश

·      मराठा आरक्षणासंदर्भात सगेसोयरें कलमाच्या अंमलबजावणीसाठी ठिकठिकाणी रास्तारोको

·      हिंगोली जिल्ह्यात पायी चालणाऱ्या पाच भाविकांचा अपघाती मृत्यू

      आणि    

·      विभागीय नमो महारोजगार मेळाव्यातून साडे चार हजारावर उमेदवारांना रोजगार;सात हजारावर उमेदवारांची निवड प्रक्रिया पुढील टप्प्यात

****

देशभरातील विविध आरोग्य संस्थांच्या पायाभूत सुविधा विकास प्रकल्पांचं भूमिपूजन पंतप्रधान नरेंद्र मोदी यांच्या हस्ते आज होणार आहे. गुजरातच्या राजकोट इथून दूरदृष्य प्रणालीव्दारे होणाऱ्या या कार्यक्रमात राज्यातील पाच जिल्हा रुग्णालयांच्या एकशे ३५ कोटी पाच लाख रुपयांच्या कामांचं भूमिपूजन तसच राज्यातील ८८ कोटी १८ लाख रुपयांच्या १० कामांचं लोकापर्णही यावेळी करण्यात येणार आहे. यामध्ये बीड तसंच अहमदनगर इथल्या ५० खाटांच्या अतिदक्षता विभागाचा समावेश आहे. बीडचे जिल्हा शल्यचिकीत्सक डॉ. अशोक बडे यांनी ही माहिती दिली.

 

दरम्यान, आकाशवाणीच्या मन की बात या कार्यक्रम मालिकेतून पंतप्रधान नरेंद्र मोदी आज देशवासियांशी संवाद साधणार आहेत. या कार्यक्रम मालिकेचा हा एकशे दहावा भाग आहे. आकाशवाणी आणि दूरदर्शनच्या सर्व वाहिन्यांवरून सकाळी अकरा वाजता या कार्यक्रमाचं प्रसारण केलं जाईल.

****

नव्या फौजदारी कायद्यांची येत्या एक जुलैपासून देशभरात अंमलबजावणी केली जाणार आहे. केंद्रीय गृह मंत्रालयाने याबाबतची अधिसूचना जारी केली आहे.

****

लोकसभा निवडणुकीसंदर्भात अद्याप कोणताही कार्यक्रम जाहीर केलेला नसल्याचं केंद्रीय निवडणूक विभागाने स्पष्ट केलं आहे. सध्या निवडणुक यंत्रणेचा आढावा घेण्याचं काम सुरू असून, मार्च महिन्याच्या दुसऱ्या आठवड्यापर्यंत हे काम पूर्ण होईल, तसंच निवडणूक कार्यक्रमाबाबत पत्रकार परिषद घेऊन माहिती दिली जाईल, असं आयोगाकडून स्पष्ट करण्यात आलं आहे.

****

म्हाडाचे प्रकल्प वेळेत पूर्ण न करणाऱ्या विकासकांवर दंडात्मक कारवाई करण्याचे निर्देश मुख्यमंत्री एकनाथ शिंदे यांनी दिले आहेत. ते काल ठाणे इथं कोकण मंडळाच्या म्हाडा सोडत कार्यक्रमात  बोलत होते. म्हाडाने गृहनिर्माण प्रकल्प वेळेत पूर्ण करून घ्यावेत, अन्यथा प्रकल्प रेंगाळून दुरुस्तीची वेळ येते. जे बिल्डर वेळेत प्रकल्प पूर्ण करतील, त्यांना बक्षीस देण्याची सूचनाही मुख्यमंत्र्यांनी केली.

सातारा जिल्ह्यात महाबळेश्वर इथं अखिल भारतीय मराठी नाट्य परिषदेच्या शंभराव्या विभागीय नाट्य संमेलनाचं उद्‌घाटनही मुख्यमंत्र्यांच्या हस्ते काल झालं, नाट्यसंस्कृती अधिक बळकट करण्यासाठी राज्यात ७५ पैकी ५२ नाट्यगृहांचं अद्ययावतीकरण तर उर्वरित नाट्यगृहं नव्याने उभारण्यात येणार असल्याचं त्यांनी सांगितलं.

****

नैसर्गिक आपत्तीत सापडलेल्या कुटुंबांना मदत करण्याला सरकारचं प्राधान्य असल्याचं प्रतिपादन विधान परिषद उपसभापती डॉक्टर निलम गोऱ्हे यांनी केलं आहे. छत्रपती संभाजीनगर इथं रोजगार हमी योजना, शैक्षणिक सवलती, जल व्यवस्थापन आदी महत्त्वपूर्ण विषयावर काल घेतलेल्या आढावा बैठकीनंतर त्या बोलत होत्या. पाण्याअभावी स्थलांतर करत असलेल्या कुटुंबासाठी धोरणात्मक निर्णय घेण्यात येईल, असं सांगतानाच, या बैठकीत झालेल्या चर्चेबाबत त्यांनी माहिती दिली. त्या म्हणाल्या...

‘‘दृष्काळाच्या प्रश्नांवर सरकारने ज्या वेगवेगळ्या सवलती जाहीर केल्या आहेत त्यांची अंमलबजावणी  व्हावी म्हणून मी विभागीय आयुक्तां बरोबर बैठक घेतली होती . सारा माफी झाली आहे . पण शिक्षण शुल्क घेऊ नये या दृष्टीकोनोतून आमलबंजावणी , रोजगोर हमी योजनेतल्या कामाचं वाढवणं , पाण्याची जी काही गरज आहे ती पुर्ण करणे , एकल महिलांना त्या मध्ये धान्य पुरवठा करून देणं या विषयावर अश्या मुद्दांवर  आज चांगली चर्चा झाली.’’

****

मराठा आरक्षणासंदर्भात राज्य सरकारनं काढलेल्या अधिसूचनेतल्या सगेसोयरेंची अंमलबजावणी करण्यात यावी या मागणीसाठी काल जालना जिल्ह्यात ठिकठिकाणी रास्तारोको आंदोलन करण्यात आलं. भोकरदन, अंबड, बदनापूर तालुक्यातल्या मुख्य रस्त्यांवर मराठा आंदोलकांनी रास्तारोको करत प्रशासनाला निवेदन सादर केलं. दरम्यान, बदनापूर तालुक्यातल्या धोपटेश्वर आणि बाजार गेवराई इथं आंदोलक आणि पोलिसांमध्ये शाब्दिक चमकम झाल्यामुळे पोलिसांना सौम्य बळाचा वापर करावा लागला. काही आंदोलकांना पोलिसांनी ताब्यात घेतल्यामुळे काही वेळ तणाव निर्माण झाला होता.  

छत्रपती संभाजीनगर इथंही मुकूंदवाडी भागात मराठा समाज बांधवांच्या वतीनं रास्ता रोको आंदोलन करण्यात आलं.

नांदेड शहरासह जिल्ह्यातही मराठा समाजाच्या वतीने ठिकठिकाणी रास्ता रोको आंदोलन करण्यात आलं. तुळजापूर- नागपूर या राष्ट्रीय महामार्गावरील सोनखेड इथं दोन तास आंदोलन झालं.

****

राष्ट्रवादी काँग्रेस शरदचंद्र पवार गटाच्या तुतारी वाजवणारा माणूस या निवडणूक चिन्हाचं अनावरण काल किल्ले रायगड इथं पक्षाचे प्रमुख शरद पवार यांच्या प्रमुख उपस्थितीत करण्यात आलं. सध्याचा काळ हा संघर्षाचा असल्याने काम करत राहणार असल्याचं पवार यांनी सांगितलं.

****

देशातील सर्वात मोठ्या आणि महाराष्ट्रातील पहिल्या ‘महाराष्ट्र एमएसएमई डिफेन्स एक्स्पो’चं पुणे जवळच्या मोशी इथं राज्याचे उपमुख्यमंत्री देवेंद्र फडणवीस यांच्या हस्ते काल उद्घाटन झाला. महाराष्ट्रात संरक्षण उद्योगाला चालना देण्यासाठी नवे धोरण तयार करण्यात येईल आणि या क्षेत्रातील सूक्ष्म, लघू आणि मध्यम उद्योगांच्या विकासासाठी प्रयत्न करण्यात येतील, असं फडणवीस यांनी यावेळी सांगितलं.

****

 

हिंगोली जिल्ह्यात काल पाच भाविकांचा अपघाती मृत्यू झाला. माळहिवरा फाट्यावरील हनुमान मंदिरात दर्शन घेण्यासाठी पायी जाणाऱ्या या भाविकांना पाठीमागून येणाऱ्या मालवाहू वाहनाने धडक दिली. हिंगोली - वाशिम मार्गावर कनेरगाव नाका परिसरात ही घटना घडली. संबंधित वाहन चालकाला पोलिसांनी ताब्यात घेतलं आहे.

****

लातूर इथं आयोजित राज्य शासनाच्या दोन दिवसीय संभाजीनगर महसूल विभागीय नमो महारोजगार मेळावा आणि करिअर मार्गदर्शन शिबिराचा काल समारोप झाला. मराठवाड्यातील आठही जिल्ह्यातील युवक-युवतींनी मोठ्या संख्येने यात सहभाग नोंदवला. उमेदवारांच्या मुलाखतीद्वारे उद्योजकांनी चार हजार, ५४८ उमेदवारांची जागेवरच निवड केली. तर सात हजार, ८९७ जणांच्या निवडीची प्रक्रिया पुढील टप्प्यात होणार आहे.

****

बीड इथं काल पाच दिवसीय महासंस्कृती महोत्सवाला प्रारंभ झाला. प्रसिध्द अभिनेते मकरंद अनासपुरे, विभागीय आयुक्त मधुकरराजे आर्दड, जिल्हाधिकारी दीपा मुधोळ मुंडे यांच्यासह अनेक मान्यवर यावेळी उपस्थित होते. या महोत्सवात गोरक्षक पद्मश्री शब्बीर मामू यांच्यासह धावपटू अविनाश साबळे, क्रिकेटपटू सचिन धस, तायक्वांदोपटू नयन बारगजे आणि अविनाश पांचाळ यांचा गौरव करण्यात आला. महिला बचत गटातर्फे निर्मित विविध वस्तूंचे तसंच  कृषी विभागातर्फे लावण्यात आलेल्या विविध दालनांना मान्यवरांनी भेट दिली.

****

नांदेड इथं आज तीन दिवसीय संगीत शंकर दरबार महोत्सवाला संध्याकाळी प्रारंभ होत आहे. विविध प्रतिथयश कलाकार या महोत्सवात आपली कला सादर करणार असून प्रसिद्ध गायक पंडित श्याम गुंजकर यांना जीवनगौरव पुरस्काराचंही वितरण केले जाणार आहे.

****

यंदाच्या राज्यस्तरीय शेतकरी सन्मान पुरस्कारांमधे धाराशिव जिल्ह्यातल्या नऊ शेतकऱ्यांचा समावेश आहे. तुळजापूर तालुक्यातील तीन, परंडा तालुक्यातील दोन, धाराशिव तालुक्यातील दोन आणि वाशी तालुक्यातील एका शेतकऱ्याचा यंदा सन्मान होणार आहे. धाराशिव तालुका कृषी अधिकारी कार्यालयातील वैभव प्रभाकर लेणेकर यांना कृषी सेवारत्न पुरस्कार जाहीर झाल्याचं आमच्या वार्ताहरानं कळवलं आहे.

****

राज्य परिवहन महामंडळाकडून बीड जिल्ह्यातल्या पाटोदा ते अयोध्या अशी बस सेवा सुरु करण्यात आली आहे. अयोध्येला जाण्यासाठी मराठवाड्यातून ही पहिली बस आहे. या प्रवासासाठी प्रतिव्यक्ती साडे सहा हजार रुपये प्रवासभाडे निर्धारित करण्यात आलं आहे. काल ही एसटी बस अयोध्येकडे मार्गस्थ झाली.

****

धाराशिव जिल्ह्यातल्या नळदुर्ग इथं उपजिल्हा रुग्णालयात ट्रॉमा केअर सेंटरला मंजुरी मिळाली आहे, आमदार राणाजगजितसिंह पाटील यांनी काल धाराशिव इथं ही माहिती दिली. राष्ट्रीय महामार्गावर संभाव्य अपघातातील रुग्णांवर वेळीच उपचार व्हावेत, यासाठी हे ट्रॉमा केअर सेंटर उभारण्यासाठी आपण सातत्याने पाठपुरावा केल्याचं पाटील यांनी सांगितलं.

****

लातूर शहरातील आगीच्या घटनेतील नुकसानीचे तातडीने पंचनामे करण्याच्या सूचना माजी मंत्री आमदार अमित देशमुख यांनी दिल्या आहेत. लातूर शहरातील साळे गल्ली परिसरात ६ दुकानांना शुक्रवारी रात्री आग लागून मोठं नुकसान झालं होतं. देशमुख यांनी काल घटनास्थळाला भेट देत नुकसानग्रसाचं सांत्वन केलं. नुकसानग्रस्तांना शासकीय मदत मिळण्याच्या दृष्टीने त्वरित पंचनामे करण्याच्या सूचनाही देशमुख यांनी दिल्या.

****

नांदेड महानगरपालिकेतल्या काँग्रेसच्या ५५ माजी नगरसेवकांनी काल भारतीय जनता पक्षात प्रवेश केला. माजी मुख्यमंत्री अशोक चव्हाण यांनी भारतीय जनता पक्षात प्रवेश केल्यानंतर काल हे पक्षांतर घडून आलं.

****