Regional Marathi Text Bulletin, Aurangabad Date – 04 March 2021 Time 18.10 to 18.20 Language Marathi

 

Regional Marathi Text Bulletin, Aurangabad

Date – 04 March 2021

Time 18.10 to 18.20

Language Marathi

आकाशवाणी औरंगाबाद

प्रादेशिक बातम्या

दिनांक ४ मार्च २०२१ सायंकाळी ६.१०

****

** कोवीड केंद्रांमध्ये महिलांची सुरक्षितता सुनिश्चित करणार - उपमुख्यमंत्र्यांची घोषणा

** श्रीराम जन्मभूमीसाठी निधी संकलन मोहीमेवरून विधानसभेत गोंधळ

** औरंगाबादमध्ये कोरोना विषाणू संसर्गाचे २६ नवे रुग्ण

आणि

** चौथ्या कसोटी क्रिकेट सामन्यात इंग्लंडच्या २०५ धावांच्या उत्तरात भारताच्या एक बाद २४ धावा 

****

राज्यातल्या कोविड केंद्रांमध्ये महिलांची सुरक्षितता सुनिश्चित करण्यासाठी ३१ मार्चपर्यंत मानक कार्यप्रणाली तयार करुन लागू करण्यात येणार असून ही कार्यप्रणाली राज्यातल्या सर्व कोविड केंद्रांसाठी बंधनकारक असेल, अशी घोषणा उपमुख्यमंत्री अजित पवारांनी आज विधानसभेत केली. औरंगाबाद इथल्या कोविड केंद्रामध्ये झालेल्या विनयभंग प्रकरणी संबंधित डॉक्टरला चौकशीत तथ्य आढळल्यानं तात्काळ बडतर्फ केल्याचंही उपमुख्यमंत्र्यांनी सांगितलं. सभागृह सुरू होताच भारतीय जनता पक्षाच्या मनीषा चौधरी यांनी याकडे सरकारचं लक्ष वेधलं होतं. ही घटना दुर्दैवी असून झालेलं कृत्य वाईट आहे, त्यामुळे गांभीर्य लक्षात घेत प्राथमिक चौकशी महिला वैद्यकीय अधिकाऱ्यांमार्फत करण्यात आली. सखोल चौकशी अहवाल आल्यावर पुढील कारवाई केली जाईल असंही पवार म्हणाले.

****

श्रीराम जन्मभूमीसाठी निधी संकलन मोहीम कोणत्या आधारे सुरू आहे, कायद्यानं पैसे गोळा करता येतात का, असा मुद्दा काँगेस पक्षाच्या नाना पटोले यांनी उपस्थित केल्यानंतर झालेल्या गोंधळामुळे विधानसभा उपाध्यक्ष नरहरी झिरवळ यांनी दहा मिनिटांसाठी कामकाज तहकूब केलं होतं. दरम्यान, विधानसभा अध्यक्षपदाची निवडणूक कधी घेणार असा प्रश्न सुधीर मुनगंटीवार यांनी उपस्थित केला. राष्ट्रपती राजवट लागली तर रडू नका तसंच घटनेची पायमल्ली करु नका, असंही मुनगंटीवार यावेळी म्हणाले. जळगाव शहरातील शासकीय आशादीप महिला वसतीगृहात मुलींना कपडे काढून नृत्य करायला भाग पाडल्याची घटना पूर्णपणे असत्य असल्याची माहिती गृहमंत्री अनिल देशमुख यांनी आज विधानसभेत दिली. या प्रकरणी चौकशी करणाऱ्या महिला अधिकाऱ्यांच्या समितीचा अहवाल त्यांनी सभागृहात ठेवला. पूर्ण माहिती न घेता याबाबत वृत्त प्रसारीत केल्या गेल्याचं त्यांनी सांगितलं.

****

राज्यातल्या सार्वजनिक आरोग्य विभागाच्या अखत्यारिमधल्या ५६७  रुग्णालयांपैकी ३२३ आरोग्य संस्थांची अग्नीशामक तपासणी करण्यात आली आहे. १७० संस्थांचे अंदाज आराखडे तयार करण्यासाठी सार्वजनिक बांधकाम विभागाकडे कार्यवाही सुरु असून त्यातल्या ७४ संस्थांचे अंदाज आराखडे तयार करण्यात आले असल्याची माहिती आरोग्य मंत्री राजेश टोपे यांनी विधानसभेच्या लेखी प्रश्नाच्या लेखी उत्तरात आज दिली आहे.

****

राज्यात कोरोना विषाणू संसर्गाची परिस्थिती असल्यानं अंगणवाडीतल्या बालकं आणि गर्भवतींना पोषण आहार पुरवण्याचं कंत्राट महाराष्ट्र कोऑपरेटिव्ह स्टेट फाऊंडेशन संस्थेला दिलं असून संसर्ग स्थिती नियंत्रणात आल्यानंतर स्थानिक महिला मंडळ आणि बचत गटांमार्फत अंगणवाडी केंद्रात गरम ताजा आहार सुरु करण्यात येईल, असं महिला आणि बाल विकास मंत्री यशोमती ठाकुर यांनी विधानसभेत प्रश्नोत्तराच्या तासात आज सांगितलं. सदस्य धर्मराव आत्राम यांनी याबाबतचा प्रश्न उपस्थित केला होता. राज्यात गेल्या वर्षापासून संसर्गाची साथ असल्यानं अंगणवाडीस्तरावर दिला जाणाऱ्या गरम ताज्या आहाराऐवजी घरपोच आहार पुरवठ्याचा निर्णय घेण्यात आला आहे. हा प्रादुर्भाव संपुष्टात आल्यानंतर अंगणवाडी केंद्र सुरु करण्यात येतील असंही ठाकुर यांनी सांगितलं.

****

ग्रामीण भागातल्या पायाभूत सुविधांच्या विकासाला चालना देण्यासाठी पंधराव्या केंद्रीय वित्त आयोगा अंतर्गत निधीचा चौथा हप्ता दोन महिन्यांत देण्यात येईल, असं ग्रामविकास मंत्री हसन मुश्रीफ यांनी आज विधानसभेत प्रश्नोत्तराच्या तासात सांगितलं.

****

राज्यातल्या कुष्ठरुग्णांसाठी स्वतंत्र वसाहत बांधण्याच्या योजनेबाबत राज्य शासन सकारात्मक निर्णय घेईल असं वैद्यकीय शिक्षण मंत्री अमित देशमुख यांनी आज विधानसभेत प्रश्नोत्तराच्या तासात सांगितलं. सदस्य आशिष शेलार यांनी यासंदर्भात प्रश्न उपस्थित केला होता. दरम्यान,कुष्ठरोग शोध अभियानामध्ये डिसेंबर २०२० अखेर राज्यात ५२८१ नवे रुग्ण आढळले असून त्यापैकी ४५० लहान मुलं आढळली असल्याचं एका उप प्रश्नाला उत्तर देताना आरोग्य राज्यमंत्री राजेंद्र यड्रावकर यांनी सांगितलं. राज्यात गेल्या आठ फेब्रुवारीपासून सक्रिय कुष्ठरोग शोध अभियान नियमित सनियंत्रण कार्यक्रम सुरु करण्यात आल्याचंही राज्यमंत्री यावेळी म्हणाले.

****

औरंगाबादमध्ये कोरोना विषाणू संसर्गाचे २६ नवे रुग्ण शासकीय वैद्यकीय महाविद्यालय, रुग्णालयात दाखल झाले आहेत. रुग्णालयात सध्या २२३ रुग्णांवर या संसर्गासाठी उपचार सुरू आहेत. आज सकाळी आठ वाजेपर्यंतच्या चोवीस तासांमध्ये दोन रुग्णांचा या संसर्गामुळे मृत्यू झाल्याची माहिती रुग्णालय प्रशासनानं दिली आहे.

****

राज्यात काल ६ हजार ५५९ रुग्ण या संसर्गातून मुक्त झाले. राज्यात आतापर्यंत २० लाख ४३ हजार ३४९ रुग्ण कोरोनामुक्त झाले आहेत. राज्यातलं रुग्ण बरे होण्याचं प्रमाण ९३ पूर्णांक ७७ शतांश टक्के झालं आहे. काल ९ हजार ८५५ नव्या रुग्णांची नोंद झाली, त्यामुळे राज्यातल्या कोविड बाधितांची एकूण संख्या २१ लाख ७९ हजार १८५ झाली आहे. राज्यात आतापर्यंत १३ लाख ७२ हजार लाभार्थींचं कोविड प्रतिबंधक लसीकरण पूर्ण झालं आहे. ब्राझिल देशातून येणाऱ्या प्रवाशांना मुंबईत सात दिवसांसाठी विलगीकरणात ठेवलं जाणार आहे. ब्रिटन तसंच युरोप, पश्चिम आशिया आणि दक्षिण आफ्रिका या देशांतून येणाऱ्या नागरिकांनादेखील देखरेखीखाली ठेवण्यात येत असल्याचं प्रशासनानं म्हटलं आहे.

****

असंघटित क्षेत्रातल्या कामगारांच्या कल्याणासाठी नोंदणी प्रक्रिया जलदगतीनं सुरु करण्यासंदर्भात कार्यवाही करण्यात यावी, अशी सूचना विधान परिषदेच्या उपसभापती डॉ. नीलम गोऱ्हे यांनी केली आहे. त्यांच्या अध्यक्षतेखाली आणि कामगार मंत्री दिलीप वळसे- पाटील यांच्या उपस्थितीत आपत्कालीन परिस्थितीमध्ये मजुरांच्या स्थलांतराबाबत आणि असंघटित कामगारांच्या प्रश्नांबाबत मुंबई इथं बैठक आयोजित करण्यात आली त्यावेळी डॉ. गो-हे बोलत होत्या. राज्यात सुमारे २८ लाख ५५ हजार संघटित कामगार आहेत तर असंघटित कामगारांची संख्या तीन कोटी ६५ लाखांच्या जवळपास आहे.

****

भारतानं अहमदाबाद इथं आज सुरू झालेल्या चौथ्या कसोटी क्रिकेट सामन्यात इंग्लडंचा डाव २०५ धावांमध्ये गुंडाळल्यानंतर पहिल्या डावात एक बाद २४ धावा केल्या आहेत. पहिल्या दिवसाचा खेळ थांबला तेंव्हा रोहित शर्मा आठ तर चेतेश्र्वर पुजारा १५ धावा काढून खेळत होते. नाणेफेक जिंकून प्रथम फलंदाजी पत्करलेल्या इंग्लंड संघाचा डाव या सामन्यातही गडगडला. अक्षर पटेलनं ६८ धावांत चार, आर. अश्र्विननं ४७ धावांमध्ये तीन आणि मोहम्मद सिराजनं ३४ धावांमध्ये दोन गडी बाद केले. बेन स्टोक्सनं ५५ धावा केल्या. भारतानं चार कसोटी सामन्यांच्या या मालिकेत दोन- एक अशी आघाडी घेतलेली आहे.

****

सायना नेहवाल आणि पारुपल्ली कश्यप यांचं स्वीस खुल्या बॅडमिंटन स्पर्धेतलं आव्हान संपुष्टात आलं आहे. सायनाला थायलंडच्या पी. चायवानकडून तर कश्यपला स्पेनच्या पी. एबीयनकडून पराभूत व्हावं लागलं. प्रणित, सौरभ वर्मा, अजय जयराम दुसऱ्या फेरीत दाखल झाले आहेत. पी. व्ही. सिंधूनंही सहज विजय नोंदवत पुढली फेरी गाठली आहे.

****

कमी खर्चात संपूर्ण गावाला समान दाबानं पाणीपुरवठा करण्याचं तंत्र मुंबई आयआयटीच्या शहरी विज्ञान आणि अभियांत्रिकी विभागाचे प्राध्यापक प्रदीप काळबर यांच्या मार्गदर्शनाखाली मुंबई आयआयटीच्या पीएचडीच्या विद्यार्थ्यानी विकसित केलं आहे. प्रा. काळबर यांचं पाणी पुरवठा याविषयावर संशोधन सुरु असून त्या संशोधना अंतर्गत हा प्रकल्प पालघर जिल्ह्यातल्या सफाळे मधल्या नंदाडे आणि चाफानगर या दोन पाड्यात प्रायोगिक तत्त्वावर नुकताच सुरु करण्यात आला आहे.

****

परभणी जिल्ह्यातल्या जिंतूर - औंढा रस्त्यावर भरधाव वाहनानं आज सकाळी दिलेल्या धडकेमध्ये एक दुचाकीस्वार मृत्यूमुखी पडला. जिंतूर शहरापासून पाच-सहा किलोमीटरच्या अंतरावर असलेल्या पुंगळा गावाजवळ पेट्रोलपंपासमोर हा अपघात झाला.

****

परभणी जिल्हा परिषदेचे मुख्य कार्यकारी अधिकारी शिवानंद टाकसाळे यांच्या नेतृत्वाखाली परभणी जिल्ह्यात `माझा गाव, सुंदर गाव` उपक्रमांतर्गत स्वच्छता आणि शोषखड्डे करण्याची मोहिम सुरू आहे. परभणी तालुक्यातील मांडाखळी या ग्रामपंचायतीमध्ये आज या उपक्रमाअंतर्गत लोकसहभागातून ग्राम स्वच्छता मोहिम राबवण्यात आली.

****

चंद्रपूर जिल्ह्यातल्या गोंडपीपरी तालुक्यामध्ये धानापूर इथं मुख्य मार्गावरच्या श्री.रासबिहारी कॉटन इंडस्ट्रीजला आज दुपारच्या सुमारास आग लागली. या आगीत मोठ्या प्रमाणावर साहित्य आणि कापूस खाक झाला. दूर्घटनेवेळी कारखान्यात असलेल्या कामगारांना सुरक्षित बाहेर काढण्यात आलं आहे.

****

धुळे जिल्हा परिषदेच्या १५ जागांचं नव्यानं आरक्षण काढून दोन आठवड्यात निवडणूक घेण्यात यावी, असे आदेश सर्वोच्च न्यायालयाने आज दिले. राष्ट्रवादी काँग्रेस पक्षाचे माजी जिल्हाध्यक्ष किरण पाटील यांनी या संदर्भात याचिका दाखल केली होती. ज्या गटांमध्ये संबंधित जाती अथवा जमातीची पुरेशी लोकसंख्या नाही तिथल्या जागा आरक्षित करण्यात आल्यानं ५० टक्क्यांच्या आरक्षण मर्यादेचं उल्लंघन झाल्यानं आरक्षण उठवण्याची त्यांची मागणी होती. सर्वोच्च न्यायालयाच्या आदेशांनंतर आता धुळे जिल्हा परिषदेत आरक्षित जागेवर निवडून आलेल्या सध्याच्या जिल्हा परिषद सदस्यांना पुन्हा निवडणुकीला सामोरं जावं लागणार आहे.

****

नवी मुंबईतल्या मुंबई कृषी उत्पन्न बाजार समितीच्या आवारातल्या कांदा बटाटा बाजारातल्या माथाडी कामगारांनी आज अचानक काम बंद आंदोलन सुरू केलं आहे. कांद्याच्या गोणींचं वजन ५० किलो पेक्षा जास्त असल्यानं या गोणी उचलणं नियमात बसत नसल्याचं कामगरांचं म्हणणं आहे. काही दिवसांपूर्वीही याच मागणीसाठी कामगारांनी काम बंद आंदोलन केलं होतं, त्यावेळी बाजार बाजार समिती आणि व्यापा-यांनी तोडगा काढण्याचं आश्वासन दिलं होतं मात्र अद्यापही कोणताही तोडगा न निघाल्यानं काम बंद आंदोलन करण्यात आलं.

//******//