आकाशवाणी छत्रपती संभाजीनगर – दिनांक 25.01.2024 रोजीचे सायंकाळी 06.10 वाजताचे मराठी बातमीपत्र

 Regional Marathi Text Bulletin, Chhatrapati Sambhajinagar

Date – 25 January 2024

Time 18.10 to 18.20

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक – २५ जानेवारी २०२४ सायंकाळी ६.१०

****

·      प्रजासत्ताक दिनानिमित्त राष्ट्रपती द्रौपदी मुर्मू आज राष्ट्राला संबोधित करणार

·      एक हजार १३२ जवानांना शौर्य आणि सेवा पदकं जाहीर

·      राज्यात मतदार दिवस विविध उपक्रमांनी साजरा

आणि

·      भारत आणि इंग्लंडदरम्यान पहिल्या कसोटी क्रिकेट सामन्याला सुरुवात, भारताच्या दिवसअखेर एक बाद ११९ धावा

****

प्रजासत्ताक दिनानिमित्त राष्ट्रपती द्रौपदी मुर्मू आज राष्ट्राला संबोधित करणार आहेत. सायंकाळी सात वाजता आकाशवाणीच्या सर्व केंद्रांवरून प्रथम हिंदीत आणि त्यानंतर इंग्रजीत राष्ट्रपतींचं भाषण प्रसारित होईल. रात्री साडे नऊ वाजता राष्ट्रपतींच्या भाषणाचा मराठी अनुवाद प्रसारित केला जाणार आहे.

****

प्रजासत्ताक दिनानिमित्त पोलीस, अग्निशमन सेवा, गृहरक्षक आणि नागरी संरक्षण आणि सुधार सेवेतल्या एक हजार १३२ जवानांना शौर्य आणि सेवा पदकं जाहीर झाली आहेत.

विशिष्ट सेवेसाठी राष्ट्रपती पदक एकूण १०२ जणांना जाहीर झाले असून, त्यात महाराष्ट्रातल्या चार जणांचा समावेश आहे. अतिरिक्त पोलीस महासंचालक निकेत कौशिक, मीरा भाईंदर वसई विरारचे पोलीस आयुक्त मधुकर पांडे, विशेष पोलीस महानिरीक्षक दिलीप सावंत आणि पोलीस निरीक्षक मधुकर कड यांना हे पदक जाहीर झालं आहे.

महाराष्ट्रातल्या १८ पोलिस जवानांना शौर्य पदक जाहीर झालं आहे. यात नक्षलप्रभावीत जिल्ह्यात उल्लेखनीय कामगिरी केलेले अतिरिक्त पोलीस अधीक्षक सोमय मुंडे यांच्यासह, उपविभागीय पोलीस अधिकारी संकेत गोसावी यांचा समावेश आहे.

राज्यातल्या ४० पोलीस जवानांना उल्लेखनीय सेवेसाठी पदक जाहीर झालं आहे. यात कायदा आणि सुव्यवस्था विभागाचे सह पोलीस आयुक्त सत्यनारायण चौधरी, तसंच नांदेड इथले दहशतवाद विरोधी पथकाचे प्रमुख वरिष्ठ पोलीस निरीक्षक माणिक बेदरे यांचा समावेश आहे.

जीवन रक्षा पदक राज्यातल्या तीन जणांना जाहीर झालं असून, यामध्ये आदीका पाटील, प्रियंका काळे, आणि सोनाली बालोडे यांचा समावेश आहे.

****

प्रजासत्ताक दिनाचा मुख्य सोहळा उद्या नवी दिल्लीत कर्तव्यपथावर होणार असून, देशाच्या विविधतेचं दर्शन याठिकाणी होणार आहे.

दरम्यान, या पथसंचलनात छत्रपती संभाजीनगर जिल्ह्यातले, मध्यम प्रकल्प सहकारी संस्थेद्वारे मासेमारी करणारे तुकाराम आणि सीताबाई वानखेडे तसंच राधिका आणि रामकिसन वानखेडे या दोन दांपत्यास आमंत्रित करण्यात आलं आहे.

या सोहळ्यासाठी जालना जिल्ह्याच्या बदनापूर तालुक्यातल्या सोमठाना इथले मच्छिमार व्यवसाय करणाऱ्या मेंढरे दाम्पत्य, तसंच मानेगावच्या सरपंच अश्विनी ढेंगळे यांना देखील विशेष निमंत्रण मिळालं आहे. याबद्दल त्यांनी आपली प्रतिक्रिया व्यक्त केली.

अश्विनी ढेंगळे, सरपंच, मानेगाव, जि.जालना

शासनाने आम्हाला आमंत्रित केलेलं आहे दिल्लीला. परेड या कार्यक्रमासाठी बोलावलेलं आहे. हागणदारीमुक्त केलं. आणि पाण्याची सुविधा, पिण्याचे पाणी फिल्टर, धनवन प्रकल्प, अंडरग्राऊंड नाले झालेले आहेत आमच्या गावामध्ये. मी आणि माझे मिस्टर दोघं चाललेलं आहे.

रत्नाकर मेंढरे, सरपंच, मानेगाव, जि.जालना

प्रत्येक संस्थेमध्ये कमीत कमी ५०-६० सदस्य असे सभासद आहेत. त्यांच्या कुटुंबाचा जर विचार केला तर एक हजार परिवार याच्यात उपजिविका जगतात. आणि सर्व पारंपारिक मच्छिमार करणारे भोई समाज आणि विशेष म्हणजे जालना जिल्ह्यामध्ये एकूण ६७ मध्यम प्रकल्प आहेत. या ६७ मध्यम प्रकल्पात कमीत कमी दहा हजार कुटुंबांना रोजगार उपलब्ध होतो मत्स्य व्यवसायातून. आणि शासनाला मोठ्या प्रमाणात याचा महसूल जातो.

 

या पथसंचलनात जळगाव इथल्या मयूरी महाले या नववीच्या विद्यार्थीनीची सांस्कृतिक कार्यक्रमात नृत्य प्रकारात निवड झाली आहे.

छत्रपती संभाजीनगर इथं प्रजासत्ताक दिनाचं मुख्य शासकीय ध्वजारोहण पालकमंत्री संदिपान भुमरे यांच्या हस्ते होणार आहे.

****

इंडीया आघाडी ही मुळात आघाडी होऊ शकत नाही, अशी टीका भाजप नेते उपमुख्यमंत्री देवेंद्र फडणवीस यांनी केली आहे. ते आज मुंबईत वार्ताहरांशी बोलत होते. या आघाडीमधले नेते कधीच एकत्र राहू शकत नाहीत, कारण जितके प्रादेशिक पक्ष आहेत त्या सर्वांचा त्यांच्या त्यांच्या राज्यात विरोध हा कॉंग्रेस पक्षाला असून, त्यांची स्पर्धा कॉंग्रेस पक्षासोबत असल्याचं फडणवीस म्हणाले.

****

मराठा आरक्षण आंदोलनकर्ते मनोज जरांगे पाटील यांच्या मुंबईतल्या आझाद मैदानावरील आंदोलनासाठीची परवानगी मुंबई पोलिसांनी नाकारली आहे. आंदोलन करावं इतकी आझाद मैदानाची क्षमता नाही. त्याऐवजी जरांगे यांनी नवी मुंबईत खारघर इथल्या इंटरनॅशल कॉर्पोरेशन पार्क इथं आंदोलन करावं, असा पर्याय मुंबई पोलिसांनी नोटीसीद्वारे दिला आहे.

****

राज्यात आज मतदार दिवस विविध उपक्रमांनी साजरा करण्यात आला. हिंगोली जिल्हा निवडणूक अधिकारी कार्यालय आणि मतदार नोंदणी अधिकारी यांच्या संयुक्त विद्यमाने शहरातल्या शिवाजी महाविद्यालयात राष्ट्रीय मतदार दिवस साजरा करण्यात आला.

परभणी नोंदणी अधिकारी कार्यालयाच्यावतीनं राष्ट्रीय मतदार दिन परभणीतल्या प्रियदर्शनी इंदिरा गांधी क्रीडा संकुलात साजरा करण्यात आला. लोकसभा निवडणुकीत परभणीत ७० टक्के पेक्षा अधिक मतदान होईल असा संकल्प केला असून, नागरिकांनी मतदानाचा हक्क बजावण्याचं आवाहन जिल्हाधिकारी रघुनाथ गावडे यांनी यावेळी केलं.

धाराशिव इथं राष्ट्रीय मतदार दिनानिमित्त जिल्ह्यातल्या दिव्यांग, तृतीयपंथीय मतदार, तसचं भटके विमुक्त समाजातल्या नव मतदारांचा जिल्हाधिकारी डॉ. सचिन ओंबासे यांच्या हस्ते सन्मान करण्यात आला. यावेळी शहरातून मतदार जनजागृती रॅली काढण्यात आली. नव मतदारांनी मतदानाच्या हक्काप्रती जागरूक राहून भारताची लोकशाही मजबूत करण्यासाठी कोणत्याही आमिषाला बळी न पडता मतदान करण्याचं आवाहन जिल्हाधिकाऱ्यांनी यावेळी केलं.

लातूर इथं दयानंद महाविद्यालयात जिल्हाधिकारी वर्षा ठाकुर-घुगे यांच्या उपस्थितीत कार्यक्रम घेण्यात आला. लोकशाही प्रक्रियेत मतदान ही सर्वात महत्वाची प्रक्रिया असून, त्यात युवकांचा सहभाग असणं गरजेचं आहे, असं त्या म्हणाल्या. यावेळी उत्कृष्ट कार्य करणाऱ्या मतदान केंद्र स्तरीय अधिकारी, तांत्रिक अधिकार्यांचा गौरव करण्यात आला. तत्पूर्वी, मतदार दिनानिमित्त लातूर शहरात युवकांची मतदार जागृती रॅली काढण्यात आली.

धुळे इथं जिल्हाधिकारी तथा जिल्हा निवडणूक अधिकारी अभिनव गोयल यांच्या उपस्थितीत मतदार दिनाचा विशेष कार्यक्रम घेण्यात आला. लोकशाहीच्या बळकटीकरणासाठी आणि देशाच्या उज्ज्वल भविष्यासाठी प्रत्येक मतदाराने आपला मतदानाचा हक्क बजावणं आवश्यक असल्याचं गोयल यांनी म्हटलं आहे.

****

भारत-इंग्लंड दरम्यानच्या पाच कसोटी क्रिकेट सामन्यांच्या मालिकेतल्या पहिल्या सामन्याला आज हैदराबाद इथं सुरुवात झाली. आजच्या पहिल्या दिवशी इंग्लंडनं नाणेफेक जिंकून प्रथम फलंदाजी करत सर्वबाद २४६ धावा केल्या. रविचंद्रन अश्विन आणि रविंद्र जडेजा यांनी प्रत्येकी तीन बळी टिपले. प्रत्युत्तरादाखल खेळताना भारताच्या पहिल्या दिवसअखेर एक बाद ११९ धावा झाल्या आहेत. भारत पहिल्या डावात अजूनही १२७ धावांनी पिछाडीवर आहे. यशस्वी जयस्वाल ७६ तर शुभमन गिल १४ धावांवर खेळत आहेत.

****

 

 

ऑस्ट्रेलियन खुल्या टेनिस स्पर्धेमध्ये पुरुष दुहेरीत भारताचा रोहन बोपण्णा आणि त्याचा ऑस्ट्रेलियन जोडीदार मॅथ्यू एब्डेन यांनी अंतिम फेरीत धडक मारली आहे. उपांत्य फेरीत या जोडीनं चीन आणि चेक प्रजासत्ताकच्या जोडीचा, ६-३, ३-६, ७-६ असा पराभव केला.

****

येत्या दोन ते चार फेब्रुवारी दरम्यान छत्रपती संभाजीनगर इथं होणाऱ्या वेरुळ - अजिंठा आंतरराष्ट्रीय महोत्सवात सोनेरी महल परिसरात सकाळी सहा ते रात्री १२ वाजेपर्यंत ध्वनिक्षेपक, ध्वनिवर्धक वापरास आवाजाची विहित मर्यादा राखून परवानगी देण्यात आली आहे. यासंबंधीचे आदेश प्रभारी जिल्हाधिकारी डॉ. अरविंद लोखंडे यांनी दिले आहेत.

दरम्यान, या महोत्सवानिमित्त छत्रपती संभाजीनगर या ऐतिहासिक शहराचं वैभव जाणून घेण्यासाठी इंटॅक संस्थेच्या सहकार्याने तीन हेरिटेज वॉक होणार आहेत. यातला दुसरा वॉक आज सकाळी पार पडला. इतिहास अभ्यासक संकेत कुलकर्णी यांनी उपस्थितांना शहराच्या विविध भागांची माहिती दिली.

****

मराठा समाजाचं सामाजिक आणि शैक्षणिक मागासलेपण तपासणी सर्वेक्षण मराठवाड्यात सर्वत्र सुरु आहे. छत्रपती संभाजीनगर शहरात आतापर्यंत चोवीस हजार २०८ कुटुंबांचं सर्वेक्षण करण्यात आल्याचं, महानगरपालिकेनं कळवलं आहे.

****

नांदेड जिल्ह्यातल्या सर्व ग्रामपंचायतींनी पाणी पुरवठा योजनेची वीज देयकं बंधित निधीतून देण्याचे निर्देश, जिल्हा परिषदेच्या मुख्य कार्यकारी अधिकारी मीनल करनवाल यांनी दिले आहेत.

****