Text-आकाशवाणी छत्रपती संभाजीनगर, दिनांक: 02.05.2024, रोजीचे दुपारी: 01.00, वाजताचे मराठी बातमीपत्र

 

Regional Marathi Text Bulletin, Chatrapati Sambhajinagar

Date: 03 May 2024

Time 01.00 to 01.05 PM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ०३ मे २०२४ दुपारी १.०० वा.

****

लोकसभा निवडणुकीच्या पाचव्या टप्प्यात अर्ज भरण्याची मुदत आज संपत आहे. यामध्ये राज्यातल्या धुळे, दिंडोरी, नाशिक, पालघर, भिवंडी, कल्याण, ठाणे आणि मुंबईतल्या सहा मतदारसंघांचा समावेश आहे. उद्या अर्जांची छाननी होणार असून, सहा मे पर्यंत अर्ज मागे घेता येणार आहेत. पाचव्या टप्प्यात २५ मे रोजी मतदान होणार आहे.

****

काँग्रेसनं उत्तरप्रदेशमधल्या बहुप्रतिक्षित रायबरेली मतदार संघातून राहुल गांधी यांना उमेदवारी जाहीर केली असून, आज ते आपला उमेदवारी अर्ज दाखल करतील. तर अमेठीतून काँग्रेसचे किशोरी लाल शर्मा निवडणूक लढवणार आहेत.

****

धुळे लोकसभा मतदारसंघाचे वंचित बहुजन आघाडीचे उमेदवार अब्दुर रहमान यांनी आज नामांकन पत्र दाखल केलं.

पश्चिम मुंबई लोकसभा मतदारसंघाचे महायुतीचे उमेदवार ॲड. उज्ज्वल निकम, ठाणे लोकसभा मतदारसंघातले शिवसेना महायुतीचे उमेदवार नरेश म्हस्के, तर भिवंडीतून महायुतीचे कपिल पाटील आज उमेदवारी अर्ज दाखल करणार आहेत.

****

निवडणुकीच्या तिसऱ्या आणि चौथ्या टप्प्यात प्रचाराला वेग आला आहे. तिसऱ्या टप्प्यासाठी सात मे, तर चौथ्या टप्प्यात १३ मे रोजी मतदान होणार आहे.

भाजपचे ज्येष्ठ नेते केंद्रीय गृहमंत्री अमित शहा आज रत्नागिरी इथं रत्नागिरी-सिंधुदुर्ग लोकसभा मतदारसंघाचे महायुतीचे उमेदवार नारायण राणे, तसंच सांगली जिल्ह्यातल्या विटा इथं संजय पाटील यांच्या प्रचारासाठी सभा घेणार आहेत.

भाजप नेते केंद्रीय मंत्री नितीन गडकरी आजपासून दोन दिवस कोल्हापूर दौऱ्यावर असून, आज संध्याकाळी हातकणंगले इथं ते जाहीर सभा घेणार आहेत. गडकरी यांच्या उपस्थितीत उद्या महायुतीचा मेळावा होणार आहे.

दरम्यान, भाजपचे ज्येष्ठ नेते तथा पंतप्रधान नरेंद्र मोदी येत्या सात तारखेला अहमदनगर आणि नंदुरबार इथं सभा घेणार आहेत.

****

काँग्रेस नेते राहुल गांधी आज पुण्यात महाविकास आघाडीचे उमेदवार रविंद्र धंगेकर यांच्या प्रचारासाठी सभा घेणार आहेत. तर शिवसेना उद्धव बाळासाहेब ठाकरे पक्षाचे प्रमुख उद्धव ठाकरे आज सिंधुदुर्ग जिल्ह्यात कणकवली इथं प्रचारसभा घेणार आहेत.

विरोधी पक्षनेते विजय वडेट्टीवार यांनी आज लातूर इथं महाविकास आघाडीचे उमेदवार शिवाजी काळगे यांच्या प्रचारात सहभाग घेतला. यावेळी वार्ताहतांशी बोलताना त्यांनी पंतप्रधान नरेंद्र मोदी यांच्यासह भाजप सरकारवर टीका केली.

****

बारामती मतदारसंघात गृह मतदानाची प्रक्रिया सुरु झाली असून, काल बारामती तालुक्यातल्या खुटवड गाव इथल्या ८९ वर्षाच्या महिला मतदारानं प्रथमच घरून मतदान केलं. रत्नागिरी शहरातल्या आरोग्य मंदिर परिसरातल्या ८७ वर्षांच्या महिला मतदारांनीही घरून मतदान केलं आणि या सुविधेबद्दल आभार मानले. लातूर तसंच उस्मानाबाद मतदारसंघातही गृह मतदान सुरु आहे.

****

सोलापूर जिल्ह्यातल्या तीन हजार ६१७ मतदान केंद्रावरच्या स्वच्छता मोहीमेला काल सुरुवात झाली. सोलापूरचे जिल्हाधिकारी कुमार आशीर्वाद यांनी बोरामणी इथल्या मतदान केंद्र परिसरात स्वतः हातात झाडू घेऊन या स्वच्छता मोहिम सुरुवात केली. ग्रामीण भागातल्या २ हजार ३६१, तर शहरी भागातल्या १ हजार २५६ मतदान केंद्रावर ही स्वच्छता मोहिम राबवली जाणार आहे.

****

नांदेड जिल्ह्यात पुढील दीड महिना जलसंधारण कामांची मोहिम राबवण्याचे निर्देश जिल्हाधिकारी अभिजीत राऊत यांनी दिले आहेत. खरीप हंगाम पूर्व आढावा बैठकीत ते काल बोलत होते. यावर्षी सात जून पासून पेरणी न करता पंधरा दिवस उशीरा पेरणी करण्याच्या सूचना कृषी विभागानं दिल्या आहेत.

****

वैद्यकीय प्रवेशासाठीची राष्ट्रीय पात्रता प्रवेश परिक्षा - नीट येत्या पाच तारखेला होणार आहे. नांदेड जिल्ह्यातल्या एकूण ५६ परीक्षा केंद्रावर २२ हजार २७९ विद्यार्थी ही परिक्षा देणार आहेत. या परीक्षा केंद्राच्या शंभर मीटर परिसरात फौजदारी प्रक्रिया संहितेअन्वये प्रतिबंधात्मक आदेश जारी करण्यात आले आहे.

****

भंडारा वनविभागात अड्याळ वनपरिक्षेत्रात वन्य प्राण्यांच्या शिकारीच्या बेतात असलेल्या शिकाऱ्याला वनविभागाने काल अटक केली. या परिसरात वन कर्मचारी हे गस्तीवर असतांना ही कारवाई करण्यात आली. आरोपीच्या घरातून अस्वलाची दोन नखं जप्त करण्यात आली. आरोपीला  न्यायालयात हजर केलं असता, त्याला चार दिवसांची वनकोठडी सुनावण्यात आली आहे.

****

गेल्या ३० एप्रिलला छत्तीसगडमधल्या नारायपूर जिल्ह्यातल्या अबुझमाड जंगलात पोलिसांशी झालेल्या चकमकीत १० नक्षलवादी ठार झाले. यात गडचिरोली जिल्ह्यात कार्यरत वरिष्ठ नक्षल नेता जोगन्ना आणि पत्नी संगीता आत्राम यांच्यासह चार जणांचा समावेश आहे. जोगन्ना हा वरिष्ठ नक्षली असून, तो स्पेशल झोनल कमिटी मेंबर होता. त्याच्यावर १९६ गुन्हे दाखल होते. शासनाने त्याच्यावर २५ लाख रुपयांचं बक्षीस ठेवलं होतं.

****

इंडियन प्रिमियर लीग - आयपीएल क्रिकेट स्पर्धेत आज मुंबई इंडियन्स आणि कोलकाता नाईट रायडर्स संघांदरम्यान सामना होणार आहे. मुंबईत वानखेडे मैदानावर संध्याकाळी सात वाजता सामन्याला सुरुवात होईल.

****