Regional Marathi Text Bulletin, Aurangabad

Date - 02 February 2017

Time 1.00 to 1.05pm

Language Marathi

आकाशवाणी औरंगाबाद

प्रादेशिक बातम्या

दिनांक ०२ फेब्रुवारी २०१७ दुपारी १.००वा.

****

राजकीय पक्षांना आता दरवर्षी डिसेंबर महिन्यापर्यंत लेखा परीक्षित आयकर विवरणपत्र सादर करावं लागेल, असं महसूल सचिव हसमुख अधिया यांनी सांगितलं आहे. ठराविक वेळेत विवरणपत्र सादर न केल्यास आयकरातून सुट मिळणार नसल्याचं अधिया यांनी स्पष्ट केलं. राजकीय पक्षांना रोख्यांद्वारे मिळालेल्या देणगीबाबत सर्व माहिती गोपनीय ठेवण्यात येणार असून, देणगी देणाऱ्यांची माहितीही जाहीर करणार नसल्याचं अधिया यांनी स्पष्ट केलं. 

****

राज्यसभेत आज राष्ट्रपती प्रणव मुखर्जी यांच्या अभिभाषणाच्या अभिनंदन प्रस्तावावर चर्चा झाली. सत्ताधारी तसंच विरोधी बाकांवरच्या अनेक सदस्यांनी या चर्चेत भाग घेत प्रस्तावच्या समर्थनात तसंच विरोधात आपली मतं मांडली.

लोकसभेचं कामकाज आज दिवसभरासाठी स्थगित ठेवण्यात आलं आहे. माजी केंद्रीय मंत्री खासदार ई अहमद यांना परवा राष्ट्रपतींच्या अभिभाषणावेळी संसदेत हृदयविकाराचा तीव्र धक्का बसल्यानंतर काल सकाळी त्यांचं निधन झालं, त्यांच्या स्मरणात लोकसभेचं कामकाज आज स्थगित ठेवण्याचा निर्णय लोकसभाध्यक्ष सुमित्रा महाजन यांनी कालच जाहीर केला होता.

****

भ्रष्टाचार निर्मुलनासाठी केंद्र सरकार पूर्ण प्रयत्न करत असून, यासाठी रोखरहित व्यवहार महत्वाचं पाऊल ठरत असल्याचं केंद्रीय महिला आणि बालविकास मंत्री मेनका गांधी यांनी म्हटलं आहे. राजस्थानात अलवर इथं एका कार्यक्रमात त्या बोलत होत्या. नागरिकांनी रोखरहित व्यवहार आत्मसात करायला पाहिजे, असं आवाहन त्यांनी यावेळी केलं.

****

मध्य प्रदेशातल्या देवास न्यायालयानं साध्वी प्रज्ञा सिंह सह आठ आरोपींची निर्दोष सुटका केली आहे. साध्वी प्रज्ञा सिंहवर २९ डिसेंबर २००७ रोजी देवास इथं संघ प्रचारक सुनिल जोशी यांची हत्या केल्याचा आरोप होता. मात्र मालेगाव बॉम्बस्फोट प्रकरणात जामीन मिळालेला नसल्यामुळे साध्वी प्रज्ञा सिंहची अद्याप तुरुंगातून सुटका करण्यात आलेली नाही. 

****

डॉ. बाबासाहेब आंबेडकर यांचं लंडन इथलं नियोजित स्मारक येत्या जुलै महिन्यापर्यंत पूर्ण होण्याची शक्यता आहे. राज्याचे सामाजिक न्यायमंत्री राजकुमार बडोले यांनी ही माहिती दिली. या स्मारकाच्या कामाची देखरेख करण्यासाठी राज्य सरकारनं एक सल्लागार समिती स्थापन केली आहे. लंडन दौऱ्यावर असलेले बडोले यांनी या समितीची पहिली बैठक घेतली, त्यावेळी ही माहिती देण्यात आली. समितीनं स्मारकासंबंधी काही सूचना सुचवल्या असून, त्यावर विचार सुरु असल्याचं बडोले यांनी पीटीआयशी बोलताना सांगितलं. डॉ आंबेडकर लंडनमध्ये शिक्षण घेत असताना, ते ज्या इमारतीत वास्तव्यास होते, ती इमारत स्मारक स्वरुपात जतन करण्यासाठी राज्य सरकारनं ऑगस्ट २०१५ मध्ये खरेदी केली आहे. 

****

मुंबई महापालिकेचा कारभार सर्वांत पारदर्शक असल्याचं प्रमाणित केल्याबद्दल मुंबई महापालिकेनं केंद्रीय अर्थमंत्री अरूण जेटली यांच्या अभिनंदनाचा ठराव मंजूर केला आहे. महापालिकेच्या स्थायी समितीच्या बैठकीत सभापती यशोधर फणसे यांनी मांडलेल्या या ठरावाला तृष्णा राव यांनी अनुमोदन दिलं. मुंबईसह हैदराबाद महापालिकेनं सर्वात पारदर्शक कारभारात पहिलं स्थान मिळवल्याचं, यंदाच्या आर्थिक सर्वेक्षण अहवालात नमूद करण्यात आलं आहे.

****

कृषी आणि ग्रामीण क्षेत्र सरकारची प्राथमिकता असल्याचं अर्थमंत्री अरुण जेटली यांनी म्हटलं आहे. अर्थसंकल्प सादर केल्यानंतर आकाशवाणीला दिलेल्या मुलाखतीत ते बोलत होते. राजकीय देणग्यांमध्ये पारकर्शकता आणणं आणि काळा पैसा कमी करणं, हा अर्थसंकल्पाचं उद्देश असल्याचं त्यांनी सांगितलं. अर्थसंकल्पात पायाभूत सुविधा, शेतकरी, डिजिटल अर्थव्यवस्था, कर प्रशासनात सुधारणा, ऊर्जा आणि स्वच्छ भारतसह दहा महत्वाच्या क्षेत्रावर भर देण्यात आला असल्याचं ते म्हणाले. जलद आर्थिक विकासामुळे देशात रोजगाराच्या संधी उपलब्ध होत असल्याचं जेटली यांनी यावेळी सांगितलं.

****

राज्यात औरंगाबाद, नागपूर, आणि कोकणात विभागीय शिक्षक मतदारसंघाच्या तर अमरावती आणि नाशिक पदवीधर मतदार संघाच्या निवडणुकीसाठी उद्या मतदान होत आहे. या निवडणुकीसाठीचा प्रचार काल संपला. यासर्व ठिकाणी विविध पक्षांच्या बहुरंगी लढती होत असून, नागपूरमध्ये १६, अमरावती-१३, कोकणात-१० उमेदवार निवडणूक रिंगणात आहेत.

****

नांदेडहून अमृतसरला जाणारी सचखंड एक्सप्रेस काल रद्द केल्यामुळे उद्या अमृतसरहून निघून नांदेडला परवा पोहोचणारी सचखंड एक्सप्रेस रद्द करण्यात आली आहे. मात्र उद्या सकाळी नांदेडहून सचखंड एक्सप्रेस निर्धारित वेळेवर सुटणार असल्याचं, दक्षिण मध्य रेल्वेकडून सांगण्यात आलं आहे.

//********//