आकाशवाणी
औरंगाबाद
संक्षिप्त
बातमीपत्र
०३ डिसेंबर २०१९ सकाळी
११.०० वाजता
****
आंतरराष्ट्रीय दिव्यांग दिवस आज पाळला जात आहे. सर्वच प्रवर्गातल्या
शारीरिक दुर्बल आणि दिव्यांग व्यक्तींचे अधिकार आणि त्यांची प्रकृती यासंदर्भात जनजागृती
करण्यासाठी हा दिवस पाळला जातो. २०३० संबंधित विकास कार्यात दिव्यांगांचा सहभाग आणि
त्यांच्या नेतृत्वगुणांचा विकास हा यंदाचा या दिवसाचा विषय आहे.
****
महिलांवरचे
लैंगिक अत्याचार आणि निर्भया निधीच्या वापरासंबंधी मानक संचालन प्रक्रियेवरील अहवाल
सादर करण्यासाठी राष्ट्रीय मानवाधिकार आयोगानं केंद्र, सर्व राज्यं आणि केंद्रशासित
प्रदेशांना नोटीस बजावली आहे. लैंगिक अत्याचारबाबत माध्यमांमधे आलेल्या वृत्ताची दखल
घेत आयोगाच्या समितीनं राज्य आणि केंद्रशासित प्रदेशांच्या मुख्य सचिवांना निर्भया
निधीबाबत सहा आठवड्यात अहवाल सादर करायला सांगितलं आहे. तसंच निर्भया निधीची उपलब्धतता
आणि गेल्या तीन वर्षात केलेल्या खर्चाचा तपशिल मागवला आहे. आयोगानं सर्व राज्य आणि
केंद्रशासित प्रदेशांच्या पोलिस महासंचालकाना नोटिस जारी करुन मानक संचालन प्रक्रिया
आणि महिलांवरील अत्याचार प्रकरणात ते अवलंबत असलेल्या सर्वोत्तम पद्धतीची माहिती मागितली
आहे.
****
हैद्राबादमधे
पशुवैद्यक महिलेवर सामुहिक लैगिंक अत्याचार आणि हत्या प्रकरणाचे पडसाद काल संसदेच्या
दोन्ही सभागृहात उमटले. राज्यसभेत विविध राजकीय पक्षाच्या सदस्यांनी महिलांविरुद्धचे
गुन्हे रोखण्यासाठी कायदा आणि पोलीस व्यवस्थेत बदल तसंच कठोर शिक्षेची मागणी केली.
लोकसभेतही
सर्वच सदस्यांनी या क्रूर घटनेचा निषेध केला. या विषयावर चर्चा करण्याची आणि दोषींना
शिक्षा व्हावी यासाठी अधिक कठोर कायदे करण्याची ग्वाही सरकारनं सभागृहाला दिली.
****
नेपाळमध्ये सुरू असलेल्या तेराव्या दक्षिण आशियाई क्रीडा स्पर्धेत
आज व्हॉलीबॉल स्पर्धेच्या अंतिम सामन्यात भारताची लढत पाकिस्तान संघाशी होणार आहे.
महिलांच्या व्हॉलिबॉल स्पर्धेचा अंतिम सामना भारत आणि नेपाळ संघात होणार आहे. बॅटमिंटन
स्पर्धेतही भारताचे महिला तसंच पुरुष संघ अंतिम सामन्यात पोहोचले आहेत. स्पर्धेच्या
पहिल्या दिवशी तीन सुवर्ण, आठ रौप्य आणि तीन कांस्य पदकं जिंकून भारत दुसऱ्या क्रमांकावर
आहे.
****
No comments:
Post a Comment