AIR NEWS BULLETIN, AURANGABAD 06.01.2018 06.50AM

Regional Marathi Text Bulletin, Aurangabad

Date – 06 January 2018

Time 6.50 AM to 7.00 AM

Language Marathi

आकाशवाणी औरंगाबाद

प्रादेशिक बातम्या

दिनांक ०६ जानेवारी २०१८ सकाळी ६.५० मि.

****

Ø संसदेच्या हिवाळी अधिवेशनाचा समारोप

Ø अर्थसंकल्पीय अधिवेशन येत्या २९ जानेवारीपासून; एक फेब्रुवारीला अर्थसंकल्प

Ø बॅंकांनी कोणत्याही शेतकऱ्यांना कर्ज नाकारु नये - सहकार तसंच पणन मंत्री सुभाष देशमुख

Ø दुधाच्या उत्पादनासोबत गुणवत्ता वाढवण्याचं विधानसभा अध्यक्ष हरिभाऊ बागडे यांचं आवाहन; चौथ्या महाॲग्रो प्रदर्शनाला कालपासून औरंगाबाद इथं प्रारंभ

आणि

Ø  दर्पण दिनानिमित्त आज सर्वत्र विविध कार्यक्रमांचं आयोजन  

****

        संसदेच्या हिवाळी अधिवेशनाचा काल समारोप झाला. हे अधिवेशन यशस्वी झाल्याचं संसदीय कार्यमंत्री अनंत कुमार यांनी सांगितलं. या अधिवेशनात एकूण २२ विधेयकं संमत झाली. तिहेरी तलाक संदर्भातलं विधेयक दोन्ही सदनात संमत होण्याची अपेक्षा होती, काँग्रेसनं लोकसभेत या विधेयकाला पाठिंबा दिला, मात्र राज्यसभेत या विधेयकाला पाठींबा न देऊन काँग्रेस पक्ष मुस्लिम महिलांसोबत अन्याय करत असल्याचं अनंत कुमार म्हणाले.

        दरम्यान, संसदेचं अर्थसंकल्पीय अधिवेशन येत्या २९ जानेवारीपासून सुरु होणार असल्याची माहिती अनंत कुमार यांनी दिली. २०१८-१९ या वर्षाचा अर्थसंकल्प एक फेब्रुवारीला सादर होणार असल्याचं त्यांनी सांगितलं. या अधिवेशनाचा पहिला टप्पा नऊ फेब्रुवारीला संपणार आहे. तर दुसरा टप्पा पाच मार्च ते सहा एप्रिल पर्यंत चालणार आहे. 

        राज्यसभेचे खासदार डॉ कर्णसिंह, जनार्दन द्विवेदी, परवेझ हाश्मी, या तीन सदस्यांचा कार्यकाळ या महिन्यात पूर्ण होत असल्यानं त्यांना काल राज्यसभेनं निरोप दिला. सभापती व्यंकय्या नायडू, विरोधी पक्षनेते गुलाम नबी आझाद, कायदामंत्री रविशंकर प्रसाद यांनी या सदस्यांच्या कार्याचा गौरवपूर्ण उल्लेख केला.

****

       विधान परिषदेचे माजी उपसभापती वसंत डावखरे यांच्या पार्थिव देहावर काल मुंबईत शासकीय इतमामात अंत्यसंस्कार करण्यात आले. डावखरे यांचं गुरुवारी रात्री मूत्रपिंडाच्या आजारानं निधन झालं. ते ६८ वर्षांचे होते. राजकारणापलिकडे ऋणानुबंध जपणारा एक उमदा नेता आपण गमावला, या शब्दात मुख्यमंत्री देवेंद्र फडणवीस यांनी त्यांना श्रद्धांजली अर्पण केली.

****

         बॅंकांना कर्जवाटपासाठी ठरवून दिलेली उद्दिष्ट प्राप्ती मर्यादा ही कमीत कमी असल्यानं, कोणत्याही शेतकऱ्यांना बॅंकांनी कर्ज नाकारु नये, अशा स्पष्ट सूचना राज्याचे सहकार तसंच पणन मंत्री सुभाष देशमुख यांनी दिल्या आहेत.  अहमदनगर जिल्हाधिकारी कार्यालयात काल झालेल्या आढावा बैठकीत ते बोलत होते. सहकार आणि पणन विभागाच्या शेतमाल तारण योजनेचा लाभ अधिकाधिक शेतकऱ्यांना मिळेल, यादृष्टीने प्रयत्न करण्याचं आवाहन त्यांनी केलं.

        दरम्यान, काल मुंबईत पत्रकारांशी बोलताना देशमुख यांनी, शेतमाल तारण कर्ज योजनेत आतापर्यंत १०३ बाजार समित्या सहभागी झाल्या असल्याची माहिती दिली. या योजनेंतर्गत चालू वर्षी ८६ हजार १६६ क्विंटल शेतमाल बाजार समित्यांनी तारण ठेवला असून, शेतकऱ्यांना मागील फक्त चार महिन्यात सुमारे १६ कोटी रुपये तारण कर्ज वितरित करण्यात आल्याचं, त्यांनी सांगितलं.

****

        दुधाच्या उत्पादनासोबत गुणवत्ता वाढवण्याचं आवाहन विधानसभा अध्यक्ष हरिभाऊ बागडे यांनी केलं आहे. औरंगाबाद इथं काल चौथ्या महाॲग्रो २०१८ प्रदर्शनाचं उद्घाटन बागडे यांच्या हस्ते झालं, त्यावेळी ते बोलत होते. दुग्ध व्यवसाय शेतकऱ्यांसाठी वरदान असून, उत्पादकांनी विपणनाकडे लक्ष देण्याची गरज त्यांनी व्यक्त केली. ते म्हणाले...

           गुणवत्तेला मागे असल्यामुळे आपल्या दुधापासून होणाऱ्या बाय प्रोडक्टसला बाहेरच्या देशातून पाहिजे तेवढी मागणी नाही. आणि म्हणून बाहेरच्या देशातून मागणी वाढायची असेल तर आपल्याला गुणवत्तेकडेही लक्ष दिलं पाहिजे. आणि जो देश गुणवत्तेकडे लक्ष देतो, त्याचं मार्केटींग चांगलं चालतं. म्हणून नुसतं उत्पादनच वाढवून चालणार नाही, तर त्याचं मार्केटींग करता आलं पाहिजे, त्याची गुणवत्ता वाढवता आली पाहिजे.

       जालन्याचे खासदार भाजप प्रदेशाध्यक्ष रावसाहेब दानवे यांच्यासह अनेक मान्यवर यावेळी उपस्थित होते. शेतीमध्ये नवनवीन प्रयोग करणाऱ्या मराठवाडा तसंच विदर्भातल्या १६ शेतकऱ्यांचा यावेळी गौरव करण्यात आला. या प्रदर्शनात विविध विषयांवर कृषी तज्ञ शेतकऱ्यांना मार्गदर्शन करणार आहेत.

****

        पाचवा औरंगाबाद आंतरराष्ट्रीय चित्रपट महोत्सव येत्या १८ ते २१ जानेवारी दरम्यान होणार आहे. १८ तारखेला सायंकाळी सहा वाजता प्रोझोन मॉलमध्ये आयनॉक्स चित्रपट गृहात अतनु मुखर्जी दिग्दर्शित रुख या हिंदी सिनेमाच्या सादरीकरणानं या महोत्सवाचं उद्घाटनं होईल. प्रसिद्ध अभिनेते आणि दिग्दर्शक अमोल पालेकर या महोत्सवात जीवनगौरव पुरस्कारानं सन्मानित करण्यात येणार आहे. चार दिवस चालणाऱ्या या महोत्सवात नऊ भारतीय चित्रपटांसह २७ विदेशी चित्रपटांचं प्रदर्शन, चित्रपट तज्ज्ञांचा मास्टर क्लास, विशेष परिसंवादाचं आयोजन करण्यात आलं आहे. 

****

      हे बातमीपत्र आकाशवाणीच्या औरंगाबाद केंद्रावरून प्रसारित केलं जात आहे. आमचं हे बातमीपत्र न्यूज ऑन एआयआर डॉट कॉम या संकेतस्थळावरही उपलब्ध आहे.

****

     दर्पण दिन आज सर्वत्र साजरा होत आहे. दर्पणकार आचार्य बाळशास्त्री जांभेकर यांना अभिवादन करण्यासाठी सर्वत्र विविध कार्यक्रमांचं आयोजन करण्यात आलं आहे. पत्रकारितेच्या क्षेत्रात दिलेल्या योगदानाबद्दल, विविध संस्था संघटनांच्या वतीनं पत्रकारांना पुरस्कार देऊन गौरवलं जाणार आहे. आकाशवाणीचे रत्नागिरीचे वार्ताहर निलेश जोशी यांना महाराष्ट्र पत्रकार कल्याण निधी संस्थेचा दर्पण पुरस्कार जाहीर झाला आहे. सिंधुदुर्ग जिल्ह्यात पोंभुर्ले या जांभेकर यांच्या जन्मगावी आज हा पुरस्कार वितरण समारंभ होणार आहे. बीड जिल्ह्यात परळी, अंबाजोगाई तालुका पत्रकार संघाचे उत्कृष्ट पत्रकारिता पुरस्कारही आज प्रदान करण्यात येणार आहेत

****

        औरंगाबाद महानगरपालिकेच्या सर्वसाधारण सभेत गोंधळ घातल्याप्रकरणी एमआयएम पक्षाच्या दोन नगरसेवकांना काल अटक करण्यात आली. गेल्या १६ ऑक्टोबरला झालेल्या सर्वधारण सभेत पाणी प्रश्नावर चर्चा सुरु असतांना शेख जफर शेख अख्तर आणि सय्यद मतीन सय्यद रशीद यांनी, राजदंड पळवण्यापासून अडवणाऱ्या सुरक्षा अधिकाऱ्याला खुर्ची फेकून मारल्यामुळे, या दोघांविरुद्ध पोलिसात तक्रार दाखल केली होती. त्यानुसार ही कारवाई करण्यात आली.

****

       जमिनीच्या नोंदीचा फेरफार करून, सातबारा उतारा देण्यासाठी २० हजार रुपये लाच मागणाऱ्या तलाठ्याला तुळजापूर इथं काल रंगेहाथ अटक करण्यात आली. प्रकाश पवार असं या तलाठ्याचं नाव असून, त्यानं लेखनिक शंकर सुतार याच्यामार्फत लाचेची मागणी केली होती. या दोघांनाही काल त्यांच्या कार्यालयात सापळा रचून अटक करण्यात आली.

****

      बीड इथल्या वनपरिक्षेत्र अधिकाऱ्याला दहा हजार रुपयांची लाच घेतांना काल रंगेहाथ पकडण्यात आलं. मानसिंग भागवत असं याचं नाव आहे. सॉ मिल विरोधात दोषारोपत्र दाखल न करण्यासाठी तसंच सॉ मिलचं नूतनीकरण करण्यासाठी त्यानं १५ हजार रुपयांची मागणी केली होती. त्यापैकी १० हजार रुपये स्वीकारतांना त्याला अटक करण्यात आली.

****

       लातूर जिल्ह्यातल्या रेणा सहकारी साखर कारखान्यानं प्रतिटन बावीसशे रुपये दराने ऊस उत्पादक शेतकऱ्यांना पहिली उचल देण्याचा निर्णय घेतला. यानुसार २० डिसेंबर २०१७ पर्यंत गाळपास आलेल्या उसाच्या देयकानुसार रक्कम ऊस उत्पादकांच्या बँक खात्यावर जमा करण्यात आली आहे. यंदा उसाचे उत्पादन अधिक होण्याचा अंदाज आहे. प्रति दिन जास्तीत जास्त गाळप करून, कार्यक्षेत्रातल्या संपूर्ण उसाचं गाळप केलं जाईल, असं आश्वासन संचालक मंडळाकडून करण्यात आलं आहे.

****

      जालना जिल्ह्यात बोंडअळीमुळे बाधित झालेल्या दोन लाख ७८ हजार हेक्टर कपाशी क्षेत्रापैकी एक लाख ५८ हजार ७४६ हेक्टरवरील पंचनामे पूर्ण झाले आहेत. उर्वरीत क्षेत्रावरच्या कपाशीचे पंचनामे सुरु असून, पंचनामे पूर्ण झाल्यानंतर शासनाला सविस्तर अहवाल पाठवला जाईल, अशी माहिती जिल्हा कृषी अधिकारी दशरथ तांभाळे यांनी दिली आहे.

****

        परभणी जिल्ह्यात सेलू इथं काल स्वच्छता संदेश फेरी काढण्यात आली. अभिनेत्री प्राजक्ता माळी यांच्या उपस्थितीत निघालेल्या या संदेश फेरीत स्वच्छता संदेश देणारे सजीव देखावे साकारण्यात आले होते. सर्वसामान्य नागरिकांचा या संदेश फेरीला चांगला प्रतिसाद मिळाला.

  

*****