AIR NEWS BULLETIN, AURANGABAD 26.08.2019 13.00

Regional Marathi Text Bulletin, Aurangabad

Date – 26 August 2019

Time 1.00 to 1.05pm

Language Marathi

आकाशवाणी औरंगाबाद

प्रादेशिक बातम्या

दिनांक २६ ऑगस्ट २०१९ दुपारी १.०० वा.

****

 पंतप्रधान नरेंद्र मोदी आज फ्रान्समधे जी-7 परिषदेत सहभागी होणार आहेत. यावेळी पंतप्रधान पर्यावरण, हवामान बदल, महासागर आणि डिजिटल परिवर्तन अशा विविध सत्रांमधे आपले विचार मांडणार आहेत. भारत जी-7 राष्ट्रांच्या समुहाचा भाग नसला तरी पंतप्रधान नरेंद्र मोदी यांना फ्रान्सचे अध्यक्ष इम्यॅन्युअल मॅक्रॉन यांनी या परिषदेत विशेष अतिथी म्हणून आमंत्रित केलं आहे. पंतप्रधान नरेंद्र मोदी या दौऱ्यादरम्यान जर्मनीच्या चांसलर एंजेला मार्केल आणि अमेरिकेचे राष्ट्राध्यक्ष डोनाल्ड ट्रंप यांची भेट घेऊन द्विपक्षीय आणि परस्पर हिताच्या व्यापक मुद्दांवर चर्चा करणार आहेत.

****

 पंतप्रधान नरेंद्र मोदी यांचा बहरीन दौरा महत्त्वपूर्ण ठरला कारण कोणत्याही भारतीय पंतप्रधानांचा हा पहिला बहरीन दौरा होता. सरकारतर्फे या संदर्भात निवेदनात याची माहिती देण्यात आली आहे.

भारत आणि बहरीन दरम्यान विविध क्षेत्रांमध्ये परस्पर सहकार्याद्वारे संबंध दृढ करण्याचा संकल्प पंतप्रधानांच्या या दौऱ्यावेळी व्यक्त करण्यात आला आहे.

****

 मुख्यमंत्री देवेंद्र फडणवीस हे आज बीड जिल्हा दौऱ्यावर येत आहेत. पाथर्डी येथून ते बीडमधील आष्टी इथं येणार असून दुपारी अडीच वाजता त्यांची महाजनादेश यात्रा जाहीर सभा नियोजित आहे. तिथून ते जामखेड इथल्या सभेत सहभागी होणार आहेत. मुख्यमंत्री आज संध्याकाळी सात वाजता बीडमध्येही महाजनादेश यात्रा जाहीर सभा घेणार असून ते बीडला मुक्कामी थांबणार आहेत.

****

 पालघर जिल्ह्यातील बोईसर विधानसभेचे बहुजन विकास आघाडीचे आमदार विलास तरे यांनी काल आपल्या कार्यकर्त्यांसह शिवसेनेत प्रवेश केला. तरे यांनी उद्धव ठाकरे यांच्या निवस्थानी म्हणजेच मातोश्रीवर शिवबंधन बांधून घेतले. विधानसभा निवडणूका तोंडावर आल्या असताना, तरे यांनी शिवसेनेची वाट धरल्यानं, हितेंद्र ठाकूर यांच्या बहुजन विकास आघाडीला मोठा धक्का बसल्याचं मानलं जात आहे.

****

 सिने अभिनेता संजय दत्त राजकारणात पुनरागमन करत असून तो येत्या पंचवीस सप्टेंबर रोजी राष्ट्रीय समाज पक्ष- रासपमध्ये प्रवेश करणार आहे. पक्षाचे संस्धापक आणि राज्यातील पशूधन आणि दुग्धविकास मंत्री महादेव जानकर यांनी मुंबईत याची माहिती दिली. रासपला गेल्या विधानसभा निवडणुकीच्या तुलनेत या निवडणुकीत अधिक जागा देण्यात याव्यात, अशी मागणीही त्यांनी यावेळी केली. संजय दत्तनं सुमारे दशकभरापुर्वी समाजवादी पक्षातर्फे उत्तर प्रदेशमधून निवडणूक लढवली होती.

****

 नांदेड इथं काल एकदिवसीय साहित्यरत्न अण्णाभाऊ साठे जन्मोत्सव शताब्दी साहित्य संमेलनात अण्णाभाऊंचे साहित्य विचार आणि चळवळ या विषयावरील परिसंवादासह कथाकथन तसंच शाहिरी जलसा झाला. माजी मुख्यमंत्री अशोक चव्हाण यांच्या हस्ते संमेलनाचं उदघाटन झालं. संमेलनाचं अध्यक्षपद डॉक्टर मच्छिंद्र सकटे यांनी भूषवलं.

****

 नंदुरबार रेल्वे स्थानकावर काल रात्री झालेल्या दगडफेकीप्रकरणी तीन जणांना पोलिसांनी ताब्यात घेतलं आहे. सुरत – भुसावळ रेल्वेमध्ये महिलेची छेड काढल्याच्या प्रकार घडला होता. त्यानंतर संतप्त जमावानं रेल्वे स्थानक आणि परिसरात दगडफेक केली होती. 

****

 विना अनुदानित महाविद्यालयं आणि शाळांतल्या शिक्षकांना अनुदान सुरू करण्यात यावं, या मागणीसाठी औरंगाबाद जिल्ह्यातल्या शिक्षण संस्थाचालकांनी आज शाळा, कनिष्ठ महाविद्यालयं बंद ठेवण्याचा निर्णय घेतला आहे. औरंगाबाद जिल्हा शैक्षणिक व्यासपीठ संघटनेनं या आंदोलनाची माहिती दिली आहे. 

****

 भारतानं वेस्ट इंडीजविरुद्धच्या पहिल्या कसोटी क्रिकेट सामन्यात अँटीगुआ इथं ३१८ धावांनी दणदणित विजय मिळवला आहे. विजयासाठी ४१९ धावांचं लक्ष्य असलेला यजमान संघाचा डाव चौथ्या दिवशी केवळ शंभर धावांत गारद झाला.

दुसऱ्या डावात शतक झळकवणारा अजिंक्य रहाणे आणि पाच गडी बाद करणारा जसप्रित बुमराह या ऐतिहासिक विजयाचे शिल्पकार ठरले. दोन सामन्यांच्या या मालिकेतील पुढील कसोटी ३० ऑगस्ट रोजी सुरू होणार आहे.

****

 स्वित्झर्लंडमध्ये झालेल्या जागतिक बॅडमिंटन स्पर्धेचं विजेतपद मिळवलेल्या पी. व्ही. सिंधुवर अभिनंदनाचा वर्षाव होत आहे. राष्ट्रपती रामनाथ कोविंद यांनी संपूर्ण देशासाठी हा अभिमानाचा क्षण असल्याचं म्हटलं आहे. सिंधुचं यश भविष्यातल्या खेळाडूंनाही प्रेरणा देत राहील.  प्रधानमंत्री नरेंद्र मोदी यांनी आपल्या संदेशात म्हटलं आहे.

दरम्यान, स्वित्झर्लंडमधेच झालेल्या दिव्यांगांसाठीच्या पॅरा जागतिक बॅडमिंटन अजिंक्यपद स्पर्धेत भारताच्या प्रमोद भगतनं पुरुष एकेरीत सुवर्णपदक पटकावलं.

*****

***