Text-AIR News Bulletin, Aurangabad 31.08.2017 13.00

Regional Marathi Text Bulletin, Aurangabad

Date – 31 AUG. 2017

Time 1.00 to 1.05pm

Language Marathi

आकाशवाणी औरंगाबाद

प्रादेशिक बातम्या

दिनांक ३१ ऑगस्ट २०१७ दुपारी १.००वा.

****

मुंबईतील जेजे मार्गावरील भेंडीबाजार भागात आज सकाळी एक चार मजली रहिवासी इमारत कोसळली. या दुर्घटनेत ८ जण ठार तर अनेक जण जखमी झाले. जखमींना जेजे रूग्णालयात दाखल करण्यात आलं आहे. राष्ट्रीय आपत्ती आणि बचाव दलाद्वारे या ठिकाणी बचावकार्य सुरू असून अग्निशमन दलाच्या दहा गाड्या घटनास्थळी पोहोचल्या आहेत. आणखी ३० ते ३५ जण ढिगाऱ्याखाली अडकले असल्याची भीती व्यक्त केली जात आहे. या इमारतीत जवळपास १० कुटुंब राहत असल्याचं सांगण्यात येत आहे. या घटनेनंतर शेजारच्या इमारतीही खाली करण्यात येत आहेत.

दरम्यान, या इमारत दुर्घटना प्रकरणाची सखोल चौकशी करून दोषींवर कडक कारवाई करण्याचे संकेत राज्यमंत्री तथा मुंबईचे पालकमंत्री सुभाष देसाई यांनी दिले आहेत. ते आज मुंबईत पत्रकारांशी बोलत होते. सध्या बचावकार्यावर लक्ष केंद्रीत केलं असल्याचं देसाई यांनी सांगितलं.

*****

कर्करोगावर उपचारासाठी राज्यात ठिकठिकाणी अत्याधुनिक उपचार केंद्रं उभी राहणं आवश्यक असल्याचं, मुख्यमंत्री देवेंद्र फडणवीस यांनी म्हटलं आहे. नवी मुंबईतल्या सानपाडा इथं महात्मा फुले चॅरिटेबल ट्रस्टच्या रुग्णालयाचं उद्घाटन काल मुख्यमंत्र्यांच्या हस्ते झालं, त्यावेळी ते बोलत होते. या रुग्णालयात आधुनिक तंत्रज्ञानाद्वारे सर्वसामान्यांना परवडेल अशा किंमतीत उपचार केले जाणार असून दररोज एक, याप्रमाणे दरमहा तीस मुलांवर इथं मोफत उपचार होणार आहेत, ही महत्त्वाची बाब असल्याचं मुख्यमंत्री म्हणाले.

*****

ज्येष्ठ समाजसेवक अण्णा हजारे यांनी पंतप्रधान नरेंद्र मोदी यांना पत्र लिहून लोकपाल तसंच लोकायुक्त यांची नियुक्ती करणं, तसंच स्वामीनाथन आयोगाची अंमलबजावणी करण्याची मागणी केली आहे. मागण्या मान्य न झाल्यास दिल्ली इथं आंदोलन करण्याचा इशारा त्यांनी दिला असल्याचं आमच्या वार्ताहरानं सांगितलं आहे.

****

आधारसाठी पुरवण्यात आलेली नागरिकांची माहिती पुर्णपणे सुरक्षित आणि संरक्षित असल्याचं भारतीय विशिष्ट ओळख प्राधिकरणाणं म्हटलं आहे. याच्या सुरक्षेबाबत कुठलीही तडजोड केली जाणार नसल्याचं प्राधिकरणाचे मुख्य कार्यकारी अधिकारी अजय भूषण पांडेय यांनी आकाशवाणी बोलताना सांगितलं.

****

जायकवाडी धरणाच्या पाणलोट क्षेत्रातल्या छोट्या धरणांमधून गोदावरी नदीपात्रात पाण्याचा विसर्ग केला जात असल्यानं जायकवाडी धरण आता जवळ जवळ ७५ टक्के भरत आलं आहे. गेल्या दोन दिवसात अहमदनगर आणि नाशिक जिल्ह्यात जोरदार पाऊस पडत असल्यानं गेल्या २४ तासात जायकवाडी धरणात २ पूर्णांक २७ टीएमसी पाण्याची आवक झाली आहे. नगर जिल्ह्यातली भंडारदरा, निळवंडे आणि मुळा ही धरणे भरली असून नाशिक जिल्ह्यातली सर्व आठ धरणे शंभर टक्के भरली आहेत.

****

बालकांच्या न्यायिक हक्क आणि विकासासाठी उस्मानाबाद जिल्ह्यातल्या स्वयंसेवी संस्थांना बाल हक्क संरक्षण आयोग वेळोवेळी आवश्यक ती मदत करेल, अशी ग्वाही बाल हक्क संरक्षण आयोगाचे अध्यक्ष प्रविण घुगे यांनी दिली आहे. उस्मानाबाद इथं स्वयंसेवी संस्थांच्या प्रतिनिधीं समवेत झालेल्या बैठकीत ते काल बोलत होते. ज्या संस्था चांगल्या काम करतील त्यांच्या पाठीशी राज्य शासन राहील असं घुगे यांनी सांगितलं. ज्या बालकांना खऱ्या अर्थाने काळजी व संरक्षणाची गरज आहे, अशाही बालकांना स्वयंसेवी संस्थांमध्ये प्रवेश दिला गेला पाहिजे, अशी मागणी संस्थाचालकाच्या वतीनं करण्यात आली.

****

ठाण्याजवळ आसनगाव ते वासिंद दरम्यान दुरांतो एक्सप्रेसच्या परवा झालेल्या अपघातानंतर या मार्गावरची रेल्वेवाहतुक अद्यापही सुरळीत झालेली नाही. त्यामुळे दक्षिण मध्य रेल्वेच्या नांदेड विभागीय कार्यालयानं काही रेल्वे गाड्या अंशत: तर काही गाड्या पूर्णपणे रद्द केल्या आहेत. आज मुंबईहून सुटणारी तपोवन एक्सप्रेस, तसंच नांदेडहून सुटणारी नांदेड लोकमान्य टिळक टर्मिनस एक्सप्रेस रद्द करण्यात आली आहे.

नांदेड - श्री गंगानगर एक्स्प्रेस आज रद्द करण्यात आली असल्याचं दक्षिण मध्य रेल्वेच्या नांदेड विभागीय कार्यालयाकडून कळवण्यात आलं आहे.

****

विश्व मुष्टीयुद्ध स्पर्धेत ५६ किलोग्रॅम वजनगटातील बँटमवेट प्रकाराच्या उपांत्य फेरीत भारताचा मुष्टीयोद्धा गौरव बिधूडीचा सामना अमेरिकेच्या ड्यूक रेगनशी होणार आहे. जर्मनीतील हॅम्बर्ग इथं उपांत्यपूर्व फेरीत गौरवनं कांस्य पदक निश्चित केलं आहे. गौरव उपांत्य फेरीत विजेता ठरल्यास तो या प्रतिष्ठीत स्पर्धेत रौप्य पदक पटकावणारा पहिला भारतीय मुष्टीयोद्धा ठरणार आहे.

****

भारत श्रीलंका एकदिवसीय क्रिकेट सामन्यांच्या मालिकेतला चौथा सामना आज कोलंबो इथं होणार आहे. महेंद्रसिंह धोनीचा हा ३०० वा एकदिवसीय क्रिकेट सामना असेल. मालिकेत भारतानं तीन शून्य अशी विजयी आघाडी घेतलेली आहे. या सामन्यात लसिथ मलिंगा श्रीलंका संघाचं नेतृत्व करणार आहे.

****