Regional Marathi Text Bulletin, Chhatrapati Sambhajinagar
Date: 01 October
2026
Time: 7.10
to 7.20 AM
Language
Marathi
आकाशवाणी छत्रपती संभाजीनगर
प्रादेशिक बातम्या
दिनांक: ०१ सप्टेंबर २०२६ सकाळी ७.१० मि.
****
·
रबी
हंगामासाठी पिकांच्या किमान आधारभूत किमतीत वाढीला केंद्रीय मंत्रिमंडळाची मंजुरी
·
पाण्याच्या
काटेकोर नियोजनाचे पाणीपुरवठा मंत्र्यांचे निर्देश-जलसंपदा मंत्र्यांचीही आढावा
बैठक
·
राज्य
लोकसेवा आयोगाच्या उमेदवार विद्यार्थ्यांचं उद्याचं प्रस्तावित आंदोलन स्थगित
·
४६
वं मराठवाडा साहित्य संमेलन बीड जिल्ह्यात बनसारोळा इथं जाहीर
·
आशियाई
क्रीडा स्पर्धेत आणखी चार सुवर्णपदकांसह भारताची आठव्या क्रमांकावर झेप
आणि
·
वेस्ट
इंडिजवर आठ गडी राखून मात करत भारताची एकदिवसीय क्रिकेट मालिकेत विजयी आघाडी
****
केंद्रीय मंत्रिमंडळाच्या आर्थिक व्यवहारविषयक समितीने रबी
हंगामासाठी पिकांच्या किमान आधारभूत किमतीत वाढ करण्यास मंजुरी दिली आहे. या
निर्णयामुळे देशभरातल्या लाखो शेतकऱ्यांना त्यांच्या उत्पादनाचा योग्य भाव मिळेल, असं
पंतप्रधान नरेंद्र मोदी यांनी म्हटलं आहे. करडईच्या किमान आधारभूत मूल्यात प्रति
क्विंटल ६७५ रुपयांची सर्वाधिक वाढ करण्यात आली आहे. मोहरी आणि खसखशीच्या किमान
आधारभूत मूल्यात प्रति क्विंटल ४१३ रुपये, मसूरसाठी प्रतिक्विंटल ३९०
रुपये, बार्ली १३६ रुपये,
हरभरा ८३ रुपये आणि गव्हासाठी प्रतिक्विंटल २५ रुपये इतकी
किमान आधारभूत मूल्यातील वाढ करण्यात आल्याचं माहिती आणि प्रसारण मंत्री अश्विनी
वैष्णव यांनी सांगितलं. काल मंत्रिमंडळ बैठकीनंतर पत्रकार परिषदेत बोलतांना वैष्णव
म्हणाले...
बाईट
- माहिती
आणि प्रसारण मंत्री अश्विनी वैष्णव
केंद्रीय मंत्रिमंडळाने कालच्या बैठकीत 'ग्रीन
एनर्जी कॉरिडॉर'
हरित ऊर्जा मार्गिकेच्या तिसऱ्या टप्प्यालाही मंजुरी दिली.
यामुळे आंतरराज्य पारेषण यंत्रणा बळकट होईल आणि विविध राज्ये तसंच केंद्रशासित
प्रदेशांदरम्यान १३५ गिगावॅटपर्यंतच्या अक्षय ऊर्जेचे पारेषण करणं शक्य होणार
असल्याचं याबाबतच्या वृत्तात म्हटलं आहे.
****
केंद्र सरकारने प्रवासी वाहनांसाठी नवीन कॉर्पोरेट ऍव्हरेज
फ्युएल इकॉनॉमी म्हणजेच CAFE
मानकांची अधिसूचना जारी केली आहे. या मानकांनुसार हलक्या
वजनी वाहनांपेक्षा अवजड वाहनांना इंधन कार्यक्षमतेच्या अधिक काटेकोर अटी लागू
होतील. ही नवी मानकं एप्रिल-२०२७ पासून ३१ मार्च २०३२ पर्यंत लागू असतील.
****
संभाव्य पाणीटंचाईचा सामना करण्यासाठी उपलब्ध पाणीसाठ्याचं
काटेकोर नियोजन करण्याचे निर्देश पाणीपुरवठा मंत्री गुलाबराव पाटील यांनी दिले
आहेत. छत्रपती संभाजीनगर,
नाशिक आणि पुणे विभागात संभाव्य पाणीटंचाईच्या अनुषंगाने
काल मुंबईत झालेल्या आढावा बैठकीत ते बोलत होते.
सर्व जिल्ह्यांचे टंचाई आराखडे १५ ऑक्टोबरपर्यंत पूर्ण करून अनधिकृत पाणी
उपसा तातडीने रोखण्याचे निर्देशही त्यांनी दिले.
**
जलसंपदा मंत्री राधाकृष्ण विखे पाटील यांनी काल छत्रपती
संभाजीनगर इथं गोदावरी मराठवाडा पाटबंधारे विकास महामंडळाची आढावा बैठक घेतली.
विविध सिंचन प्रकल्पांच्या कामांचा आढावा घेऊन, कामातले अडथळे तातडीने दूर
करून प्रकल्पांच्या कामांना गती देण्याच्या सूचना त्यांनी दिल्या. ज्या-ज्या धरणात
पिण्याचं मुबलक पाणी असेल अशा धरणातल्या पाण्याच्या नियोजनाचा निर्णय घेणार
असल्याचं, विखे पाटील यांनी पत्रकार परिषदेत सांगितलं.
****
सर्व प्रकारच्या दस्त नोंदणीसाठी आधार ओळखपत्र महसूल
विभागाने अनिवार्य केलं आहे. महसूलमंत्री चंद्रशेखर बावनकुळे यांनी ही माहिती
दिली. मालमत्ता खरेदी विक्रीतली फसवणूक टाळण्यासाठी हा निर्णय घेण्यात आला असून, आजपासून
याची अंमलबजावणी होणार आहे.
****
तरुणांचं संशोधन राज्याला जगाचं 'इनोव्हेशन
हब' करेल, असा विश्वास मुख्यमंत्री देवेंद्र फडणवीस यांनी व्यक्त केला आहे. मुंबईत ‘द
गव्हर्नन्स चॅलेंज’ स्पर्धेच्या विजेत्यांना काल पारितोषिकं प्रदान करण्यात आली, त्यावेळी
ते बोलत होते. ही स्पर्धा म्हणजे देशाच्या भावी प्रशासकीय रचनेला आकार देणाऱ्या
प्रतिभा आणि कल्पना शोधण्याचा उपक्रम असल्याचं मुख्यमंत्र्यांनी नमूद केलं.
****
राज्य लोकसेवा आयोगाच्या उमेदवार विद्यार्थ्यांनी उद्याचं
प्रस्तावित आंदोलन स्थगित केलं आहे. काल मुख्यमंत्र्यांसोबत झालेल्या चर्चेनंतर
विद्यार्थ्यांनी हा निर्णय जाहीर केला. आयोगाच्या अध्यक्षांना हटवण्याचा अधिकार
राज्य सरकार किंवा राज्यपालांना नाही, याबाबत तीन महिन्यात
न्यायालयीन चौकशी करून त्या निष्कर्षाच्या आधारावर कारवाईचं आश्वासन
मुख्यमंत्र्यांनी दिलं. याशिवाय आयोगाच्या सचिवांची बदली करण्याचं, तसंच
परीक्षा पद्धतीत विद्यार्थी घटकांशी चर्चा केल्याशिवाय निर्णय न घेण्याचं
आश्वासनही देत,
आयोगामार्फत विक्रमी पदभरतीची ग्वाही देखील मुख्यमंत्र्यांनी
यावेळी दिली.
****
मराठवाडा साहित्य परिषदेचं ४६ वं मराठवाडा साहित्य संमेलन
बीड जिल्ह्याच्या केज तालुक्यात बनसारोळा इथं श्री बनेश्वर शिक्षण संस्थेत होणार
आहे. तर दुसऱ्या बालकुमार साहित्य संमेलनासाठी गेवराई इथल्या बालग्राम परिवाराच्या
निमंत्रणाचा कार्यकारिणीने स्वीकार केला आहे. परिषदेचे अध्यक्ष कौतिकराव ठाले
पाटील यांनी काल ही घोषणा केली. दोन्ही संमेलनाच्या तारखा लवकरच निश्चित करण्यात
येणार आहेत.
****
सेवा संकल्प अभियानांतर्गत काल जालना इथं जिल्हाधिकारी
कार्यालयात योग आणि ध्यान शिबिर घेण्यात आलं. योगसाधक प्रल्हाद हरबक यांनी योग, प्राणायाम
आणि ध्यानाचं शारीरिक आणि मानसिक आरोग्यासाठी असलेलं महत्त्व सांगितलं. यावेळी
अधिकारी आणि कर्मचाऱ्यांनी विविध योगासने, प्राणायाम
आणि ध्यानाचं प्रात्यक्षिक केलं.
**
सेवा संकल्प अभियानाअंतर्गत छत्रपती संभाजीनगर
महानगरपालिकेच्या भीमनगर आरोग्य केंद्रात काल रक्तदान शिबीर घेण्यात आलं. यात २२
जणांनी रक्तदान केलं.
****
३३ वर्षांपूर्वी झालेल्या किल्लारी भूकंपात दगावलेल्या
नागरिकांना काल लातूर जिल्हा प्रशासनाच्या वतीने अभिवादन करण्यात आलं. किल्लारी
इथं स्मृतीवनातल्या स्मृतीस्तंभाला जिल्हाधिकारी डॉ. भारत बास्टेवाड, जिल्हा
परिषदेचे मुख्य कार्यकारी अधिकारी राहुल कुमार मीना यांनी पुष्पचक्र अर्पण केलं.
यावेळी पोलीस दलाच्या वतीने हवेत बंदुकीच्या तीन फैरी झाडून अभिवादन करण्यात आलं.
किल्लारीसह भूकंपग्रस्त गावांमध्ये काल काळा दिवस पाळण्यात आला.
****
जपानमध्ये सुरु असलेल्या आशियाई क्रीडा स्पर्धेत भारताने
काल चार सुवर्ण पदकांची कमाई केली. तीरंदाजीत ज्योती सुरेखा वेण्णम, चिकिता
तनिपार्थी आणि प्रथिका प्रदीप यांच्या संघाने सुवर्ण पदकाला गवसणी घातली. साहिल
जाधव-चिकिता तनिपार्थी यांच्या मिश्र कंपाउंड जोडीनेही सुवर्ण पदक पटकावलं.
तिरंदाजीत पुरुषांच्या कंपाउंड संघाने देखील सुवर्ण पदक पटकावलं. नेमबाजीत ट्रॅप
मिश्र प्रकारात नीरु धांडा आणि चिनान केनाई यांच्या जोडीने सुवर्ण पदक जिंकलं.
मुष्टियुद्धात प्रिया घंघास, नरेंद्र बेरवाल आणि
कपिल पोखरिया यांनी कांस्य पदकांची कमाई केली. कुस्तीमध्ये पुरुषांच्या ८७ किलो
वजनी गटात सुनिल कुमारने कांस्य पदक जिंकलं. स्क्वॅशमध्ये भारताच्या महिला आणि
पुरुष संघांनी उपान्त्य फेरीत प्रवेश केला आहे.
भारत आता या स्पर्धेत दहा सुवर्ण, २१
रौप्य आणि २९ कांस्य पदकांसह ६० पदकं जिंकून आठव्या स्थानावर पोहोचला आहे.
****
गुवाहाटी इथं झालेल्या दुसऱ्या एकदिवसीय क्रिकेट सामन्यात
भारताने वेस्ट इंडिजवर आठ गडी राखून विजय मिळवला. या विजयासोबतच भारताने तीन
सामन्यांच्या मालिकेत दोन - शून्य अशी विजयी आघाडी घेतली आहे. कालच्या सामन्यात
वेस्ट इंडिजच्या संघाने प्रथम फलंदाजी करत ४०६ धावांचं आव्हान दिलं. भारतीय संघाने
कर्णधार शुभमन गीलच्या द्विशतकी आणि रोहित शर्माच्या शतकी खेळीच्या बळावर ४४व्या
षटकात हे लक्ष्य साध्य केलं. १३३ चेंडूत नाबाद २२३ धावा करणारा शुभमन सामनावीर
ठरला. मालिकेत तिसरा आणि अखेरचा सामना शनिवारी चंदीगड इथं खेळवला जाणार आहे
****
आगामी काळात चाराटंचाईची शक्यता पाहता, छत्रपती
संभाजीनगर जिल्ह्यात पशुसंवर्धन विभागाने जनावरं आणि उपलब्ध चारा साठ्याचं
सर्वेक्षण सुरू केलं आहे. लातूर जिल्ह्यातही चारा वाहतुकीला जिल्हा प्रशासनाने
बंदी घातली आहे. इतर उपाययोजनांचंही सूक्ष्म नियोजन करण्याचे निर्देश जिल्हाधिकारी
डॉ. भारत बास्टेवाड यांनी दिले. जिल्हाधिकारी कार्यालयात दुष्काळ निवारण कक्ष
अर्थात ‘वॉर रूम’ स्थापन करण्यात आली आहे.
दरम्यान, लातूर शहरात आता सहा दिवसाआड पाणीपुरवठा
केला जाणार आहे. मांजरा प्रकल्पात पुरेसा पाणीसाठा नसल्याने, उपलब्ध
पाणी काटकसरीने वापरण्याचं आवाहन प्रशासनानं केलं आहे.
****
काँग्रेसच्या नॅशनल स्टूडेंट्स युनियन ऑफ इंडियाच्या वतीने
काल छत्रपती संभाजीनगर इथं कथित मतचोरी, तसंच निवडणूक
प्रक्रियेतल्या पारदर्शकतेच्या मुद्द्यांवर मोर्चा काढण्यात आला.
दरम्यान, मुख्य निवडणूक आयुक्त ज्ञानेश कुमार
यांच्यावर कारवाईसह विविध मागण्यांसाठी डाव्या आघाडीच्या वतीने काल छत्रपती
संभाजीनगर इथं निदर्शनं करण्यात आली.
****
