Text-आकाशवाणी छत्रपती संभाजीनगर - दिनांक 13.08.2025 रोजीचे सायंकाळी 06.10 वाजेचे मराठी बातमीपत्र

 Regional Marathi Text Bulletin, Chhatrapati Sambhajinagar

Date – 13 August 2025

Time 18.10 to 18.20

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक – १३ ऑगस्ट २०२५ सायंकाळी ६.१०

****

·      हर घर तिरंगा अभियानाअंतर्गत आजपासून स्वातंत्र्यदिनापर्यंत आपापल्या घरावर तिरंगा ध्वज फडकवावा-केंद्र सरकारचं नागरिकांना आवाहन

·      नवी दिल्लीत स्वातंत्र्यदिन सोहळ्यासाठी देशभरातल्या २१० पंचायत प्रतिनिधींना निमंत्रण

·      सार्वजनिक गणेशोत्सव मंडळाप्रमाणे मूर्तीकरांनाही सलग पाच वर्ष परवानगी देण्याचे मुख्यमंत्र्यांचे निर्देश

·      आदिवासी विकास मंत्री डॉ.अशोक उईके यांच्याकडून छत्रपती संभाजीनगर इथं विविध योजनांचा आढावा

आणि

·      खाशाबा जाधव पारंपरिक क्रीडा महाकुंभाला प्रारंभ-विविध १८ क्रीडा प्रकारात वीस हजार खेळाडूंचा सहभाग

****

हर घर तिरंगा अभियानाअंतर्गत आजपासून स्वातंत्र्यदिनापर्यंत आपापल्या घरावर तिरंगा ध्वज फडकावण्याचं आवाहन केंद्र सरकारकडून करण्यात आलं आहे. केंद्रीय गृहमंत्री अमित शहा यांनी त्यांच्या निवासस्थानी तिरंगा फडकावून या अभियानात सहभाग घेतला. हे अभियान आता लोकचळवळ झाली असून, ज्यामुळे देशात एकतेचा संदेश प्रसारित होत असल्याचं शहा यांनी समाज माध्यमावरच्या संदेशात नमूद केलं.

या अभियानांतर्गत अनेक केंद्रीय मंत्री आणि राजकीय नेते आपल्या निवासस्थानी राष्ट्रध्वज फडकवून या देशभक्ती मोहिमेत सहभागी झाले. क्रीडा राज्यमंत्री रक्षा खडसे यांनीही दिल्लीत शासकीय निवासस्थानी तिरंगा फडकवून स्वातंत्र्य सैनिकांना आदरांजली अर्पण केली.

बहुजन कल्याण मंत्री अतुल सावे यांच्या हस्ते छत्रपती संभाजीनगर मधे या अभियानाला प्रारंभ झाला. सिद्धार्थ उद्यानात मराठवाडा मुक्ती संग्राम स्मारकाला अभिवादन करून सावे यांनी तिरंगा फडकावला. शहर भाजपातर्फे तिरंगा फेरीही काढण्यात आली. शहरातल्या विविध महाविद्यालयीन तसंच शालेय विद्यार्थ्यांनी तिरंगा फेरी काढून या अभियानाच्या जनजागृतीत सहभाग घेतला.

परभणी इथं जिल्हा प्रशासन, शालेय शिक्षण आणि क्रीडा विभाग यांच्या संयुक्त विद्यमाने सायकल फेरी काढण्यात आली. शाळा महाविद्यालयांमधले विद्यार्थी त्यात सहभागी झाले.

जालना जिल्ह्यातल्या बदनापुर तालुक्यात वाकुळणी इथल्या छत्रपती संभाजी विद्यालय आणि कनिष्ठ महाविद्यालयातर्फे हर घर तिरंगा तसंच एक पेड मा के नाम अभियानाअंतर्गत वृक्षारोपण करण्यात आलं. यावेळी झालेल्या कार्यक्रमात रांगोळी, वादविवाद स्पर्धा, प्रश्नमंजुषा स्पर्धा घेण्यात आल्या तसंच विद्यार्थ्यांनी लेझीम आणि कवायतींचे सादरीकरण केले.

दरम्यान, हर घर तिरंगा अभियानाअंतर्गत इतरही अनेक उपक्रम राबवले जात आहेत. ठिकठिकाणी निघालेल्या तिरंगा फेऱ्यांमध्ये नागरिक उत्स्फुर्त सहभाग नोंदवत आहेत.

****

भारतीय स्वातंत्र्याचा ७८ वा वर्धापन दिन परवा साजरा होत आहे. देशाला स्वातंत्र्य मिळालं, त्यावेळी हैदराबाद प्रांतात निझामाच्या राजवटीत असलेला मराठवाडा हा दिवस साजरा करू शकला नव्हता. अधिकृतपणे स्वातंत्र्यदिन साजरा करण्यासाठी मराठवाड्याला १५ ऑगस्ट १९४९ पर्यंत वाट पहावी लागली. या संदर्भात छत्रपती संभाजीनगर इथं वास्तव्यास असलेले ज्येष्ठ विधीज्ञ अनंत उमरीकर आणि ज्येष्ठ इतिहास तज्ज्ञ डॉ प्रभाकर देव यांनी आपलं मनोगत या शब्दांत व्यक्त केलं –

बाईट - ज्येष्ठ विधीज्ञ अनंत उमरीकर आणि ज्येष्ठ इतिहास तज्ज्ञ डॉ प्रभाकर देव

 

या दोन्ही मान्यवरांनी यासंदर्भात केलेलं विस्तृत विवेचन आमच्या विशेष प्रासंगिक या सदरात आपण ऐकू शकाल. हा कार्यक्रम आमच्या केंद्रावरून उद्या सकाळी दहा वाजून ४५ मिनिटांनी प्रसारित केला जाणार आहे.

****

नवी दिल्लीत यंदाच्या स्वातंत्र्यदिन सोहळ्यात देशभरातल्या २१० पंचायत प्रतिनिधींना सहभागी होण्याची संधी मिळणार आहे. यामध्ये महाराष्ट्रातल्या १५ जणांचा समावेश आहे.

आपापल्या गावात पायाभूत सुविधा, सार्वजनिक सेवा, आणि सामूहिक उपक्रम राबवून सुधारणा घडवणाऱ्या सरपंचांना विशेष पाहुणे म्हणून आमंत्रण देण्यात आलं आहे. यात महिला प्रतिनिधींची संख्या लक्षणीय आहे.

या प्रतिनिधींचा उद्या एका विशेष कार्यक्रमात सत्कार करण्यात येणार असून “आत्मनिर्भर भारत, विकसित भारत की पहचान” अशी यंदाची संकल्पना आहे. कृत्रिम बुद्धिमत्तेवर आधारित सभा सार या ॲप्लिकेशनचं उद्घाटनही यावेळी होईल.

****

निवृत्तीवेतन धारकांच्या हयातीच्या दाखल्यांसाठी चौथी देशव्यापी डिजिटल मोहीम यंदा नोव्हेंबर महिन्यात आयोजित केली जाणार आहे. फेस ऑथेंटिकेशन म्हणजे चेहऱ्यावरुन ओळख पटवण्याच्या तंत्रज्ञानाचा वापर करून आयोजित केली जाणारी ही आतापर्यंतची सर्वात मोठी मोहीम असल्याचं याबाबतच्या वृत्तात म्हटलं आहे.

****

ऑपरेशन सिंदूरद्वारे भारताने जगाला दाखवून दिलेली शक्ती आणि स्वदेशी वस्तुंच्या वापराबाबत सार्वजनिक गणेशोत्सव मंडळांनी जनजागृती करावी, असं आवाहन मुख्यमंत्री देवेंद्र फडणवीस यांनी केलं आहे. आगामी गणेशोत्सवाच्या पार्श्वभूमीवर आज मुंबईत झालेल्या बैठकीत मुख्यमंत्री बोलत होते. सार्वजनिक गणेशोत्सव मंडळाप्रमाणे मूर्तीकरांनाही सलग पाच वर्ष परवानगी देण्याचे निर्देश मुख्यमंत्र्यांनी यावेळी दिले. ईद ए मिलाद सणही गणेशोत्सवादरम्यान येत असल्याने धार्मिक सौहार्द कायम ठेवत उत्सव साजरा करण्याचं आवाहन मुख्यमंत्र्यांनी केलं. ध्वनिक्षेपक परवानगीचे दिवस वाढवण्यासाठी न्यायालयाच्या अधीन राहून सकारात्मक कार्यवाही करण्यात येईल, असंही मुख्यमंत्र्यांनी यावेळी सांगितलं. 

****

पुण्यश्लोक अहिल्यादेवी होळकर यांच्या पुण्यतिथीनिमित्त मुख्यमंत्री देवेंद्र फडणवीस, उपमुख्यमंत्री अजित पवार तसंच उपमुख्यमंत्री एकनाथ शिंदे यांनी समाज माध्यमांवरच्या संदेशातून अभिवादन केलं आहे.

****

दरम्यान, अहिल्यादेवी होळकर यांच्या पुण्यतिथी निमित्त आज छत्रपती संभाजीनगर शहरालगतच्या सातारा गावातील नागरिकांनी होळकर यांच्या पुतळ्याला पुष्पहार अर्पण करून अभिवादन केलं. या परिसरात वृक्षारोपणही करण्यात आलं.

****

आदिवासी विकास मंत्री डॉ.अशोक उईके यांनी आज छत्रपती संभाजीनगर आयुक्त कार्यालयात बैठक घेऊन आदिवासी विकास विभागाच्या विविध योजनांचा आढावा घेतला. या योजनांची अंमलबजावणी अधिक प्रभावी आणि पारदर्शक पद्धतीनं करण्याचे निर्देश त्यांनी संबंधित विभागांना दिले. एकात्मिक आदिवासी विकास प्रकल्पाअंतर्गत वडनेर आणि सुरूडी इथल्या शासकीय आश्रमशाळांच्या नवीन इमारतींचं यावेळी आभासी पद्धतीनं लोकार्पण करण्यात आलं. याठिकाणी रानभाज्यांचं प्रदर्शनही भरवण्यात आलं, नागरिकांचा या प्रदर्शनाला उत्स्फुर्त प्रतिसाद मिळाला.

दरम्यान, कृषी विज्ञान केंद्रातही आज रानभाजी महोत्सव घेण्यात आला. जिल्ह्यातील सर्व तालुक्यातले शेतकरी यात सहभागी झाले.

****

महात्मा ज्योतिबा फुले संशोधन आणि प्रशिक्षण संस्था महाज्योती तर्फे इतर मागास वर्गातील विद्यार्थ्यांसाठी स्पर्धा परीक्षांचं प्रशिक्षण मोफत देण्यात येणार आहे. यासाठी संस्थेच्या संकेतस्थळावर २० ऑगस्ट पर्यंत ऑनलाइन अर्ज करण्याचं आवाहन करण्यात आलं आहे.

****

परिवहन मंत्री प्रताप सरनाईक यांच्या हस्ते आज एसटी महामंडळाच्या मुख्यालयात ७० उमेदवारांना अनुकंपा तत्वावर शासकीय सेवेचं नियुक्तीपत्र प्रदान करण्यात आलं. विभागीय स्तरावर आणखी ६६ उमेदवारांना ३१ ऑगस्टपर्यंत अनुकंपा तत्त्वावर नोकरीचे नियुक्तीपत्र दिलं जाणार आहे.

****

पारंपरिक खेळाडूंना शिवछत्रपती पुरस्कार, शासकीय लाभ आणि शासकीय सेवेतल्या नियुक्त्यांबाबत शासन स्तरावर प्रयत्न करणार असल्याचं आश्वासन क्रीडा आणि युवक कल्याण मंत्री माणिकराव कोकाटे यांनी दिलं आहे. आज मुंबईत कुर्ला इथं खाशाबा जाधव पारंपरिक क्रीडा महाकुंभाचं उद्घाटन केल्यानंतर ते बोलत होते. यावेळी पुण्यश्लोक अहिल्यादेवी होळकर मैदानाचं लोकार्पण कोकाटे यांच्या हस्ते करण्यात आलं. २२ ऑगस्टपर्यंत चालणाऱ्या या क्रीडा महाकुंभात विविध १८ प्रकारच्या स्पर्धांमध्ये वीस हजार खेळाडू सहभागी झाले आहेत.

****

अमेरिकेतल्या नेब्रास्का विद्यापीठ आणि भुवनेश्वर इथल्या भारतीय तंत्रज्ञान संस्थेतल्या शास्त्रज्ञांनी अहिल्यानगर जिल्ह्यात हिवरे बाजार पाणलोट क्षेत्राला भेट देऊन प्रकल्प कार्यपद्धतीचा अभ्यास केला. मृद आणि जलसंधारण अभियांत्रिकी विभागाचे प्राध्यापक तथा विभाग प्रमुख डॉ. सचिन कुमार नांदगुडे यांनी या प्रकल्पात वापरल्या जाणाऱ्या तंत्रज्ञानाची सविस्तर माहिती दिली. यावेळी पद्मश्री पोपटराव पवार यांची भेट घेऊन नैसर्गिक संसाधनांचं व्यवस्थापन, पाणलोट क्षेत्र विकास आदीबाबत चर्चा झाली.

****

हिंगोली जिल्ह्यात मालवाहू वाहनाला अज्ञात वाहनाने धडक देऊन झालेल्या अपघातात दोन तरुणांचा मृत्यू झाला. वाशिम - हिंगोली मार्गावर आज सकाळी हा अपघात झाला. अपघातातले मृत दोघे अमरावती जिल्ह्यातल्या दर्यापूरचे रहिवासी होते.

****

हवामान

राज्यात आज कोकण, विदर्भ तसंच मराठवाड्याच्या काही भागात विजांच्या कडकडाटासह पावसाची शक्यता आहे. मराठवाड्यात परभणी, हिंगोली आणि नांदेड या जिल्ह्यांना आज हवामान विभागाने ऑरेंज अलर्ट तर उर्वरित जिल्ह्यांना यलो अलर्ट दिला आहे.

****

यवतमाळ जिल्ह्यात सुरू असलेल्या मुसळधार पावसामुळे ईसापूर धरणातून सुमारे पाच हजार घनफूट प्रति सेकंद वेगाने पैनगंगा नदीपात्रात विसर्ग सुरू आहे. या पार्श्वभूमीवर पुसद, उमरखेड, महागांव तसंच नांदेड जिल्ह्यात पैनगंगा नदी काठावरील नागरिकांना सतर्कतेचा इशारा देण्यात आला आहे.

****