Text - आकाशवाणी छत्रपती संभाजीनगर - दिनांक 04.03.2025 रोजीचे सायंकाळी 06.10 वाजताचे मराठी बातमीपत्र

 Regional Marathi Text Bulletin, Chhatrapati Sambhajinagar

Date – 04 March 2025

Time 18.10 to 18.20

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक – ०४ मार्च २०२५ सायंकाळी ६.१०

****

·      औरंगजेब उदात्तीकरण प्रकरणी अबू आझमींविरोधात विधीमंडळात प्रचंड गदारोळ-कठोर कारवाई करण्याची विधान परिषदेचे सभापती राम शिंदे यांची सूचना

·      धनंजय मुंडे यांच्याकडून मंत्रिपदाचा राजीनामा-मुख्यमंत्र्यावर हक्कभंगाचा विरोधकांचा इशारा

·      परभणी-छत्रपती संभाजीनगर-करंजगाव या रेल्वे मार्गाच्या दुहेरीकरणाला प्रारंभ

आणि

·      आयसीसी अजिंक्यपद करंडक क्रिकेट स्पर्धेत उपांत्य फेरीच्या पहिला सामन्यात ऑस्ट्रेलियाचं भारतासमोर २६५ धावांचं आव्हान

****

समाजवादी पार्टीचे आमदार अबु आझमी यांनी औरंगजेबाचं उदात्तीकरण केल्याचे आज विधीमंडळात तीव्र पडसाद उमटले. विधानसभेत कामकाज सुरू होताच, मंत्री उदय सामंत, गुलाबराव पाटील यांच्यासह महायुतीच्या अनेक आमदारांनी अबू आझमींविरोधात कारवाईची मागणी करत, घोषणाबाजी सुरू केल्यानं, अध्यक्ष राहुल नार्वेकर यांनी कामकाज १० मिनिटांसाठी तहकूब केलं. कामकाज पुन्हा सुरू झाल्यावरही गदारोळ सुरूच राहिल्यानं कामकाज अर्ध्या तासासाठी तहकूब करण्यात आलं. त्यानंतर उपमुख्यमंत्री एकनाथ शिंदे यांनी अबू आझमी यांच्यावर देशद्रोहाचा गुन्हा दाखल करून निलंबनाची मागणी केली.

बाईट – एकनाथ शिंदे

 

यानंतरही गदारोळ वाढत गेल्यानं, सदनाचं कामकाज पुन्हा १५ मिनिटांसाठी आणि नंतर दिवसभरासाठी तहकूब करावं लागलं. विधान परिषदेत गटनेते प्रवीण दरेकर यांनी अबू आझमींविरोधात देशद्रोहाचा गुन्हा दाखल करून अटकेची मागणी केली, सत्ताधारी बाकांवरच्या सदस्यांनी या मागणीसाठी जोरदार घोषणाबाजी सुरू केली. गदारोळ वाढत गेल्यानं, सभापती राम शिंदे यांनी कामकाज अर्ध्या तासासाठी तहकूब केलं. कामकाज पुन्हा सुरू झाल्यावर विरोधी पक्षनेते अंबादास दानवे यांनीही अबू आझमी यांच्यासह शिवाजी महाराजांविषयी आक्षेपार्ह विधान केल्या प्रकरणी इतरांवरही कारवाई करावी, अशी मागणी केली. सभागृहनेते उपमुख्यमंत्री एकनाथ शिंदे यांनीही अबू आझमी हे जाणीवपूर्वक वारंवार अवमानकारक वक्तव्य करत असल्याने, त्यांचा जाहीर निषेध करत कारवाईची मागणी केली. सभापती राम शिंदे यांनीही महापुरुषांबाबत आक्षेपार्ह वक्तव्य करणाऱ्या सर्वाविरोधात सरकारने कठोर कारवाई करावी, अशी सूचना केली.

बाईट – सभापती राम शिंदे

 यानंतरही गदारोळ सुरू राहिल्याने, कामकाज १५ मिनिटांसाठी आणि नंतर दिवसभरासाठी तहकूब झालं.

अबू आझमी यांच्याविरोधात मुंबईत मरीन ड्राइव्ह पोलीस ठाण्यात गुन्हा दाखल झाला आहे. खासदार नरेश म्हस्के यांनी आझमी यांच्याविरोधात तक्रार दाखल केली होती.

दरम्यान, औरंगजेब प्रकरणी आपलं वक्तव्य मागे घेत असल्याचं निवेदन अबु आजमी यांनी समाजमाध्यमांवरून जारी केलं आहे.

****

अन्न आणि नागरी पुरवठा मंत्री धनंजय मुंडे यांनी आज मंत्रिपदाचा राजीनामा दिला. मुख्यमंत्री देवेंद्र फडणवीस यांनी विधीमंडळ परिसरात माध्यमांशी बोलतांना ही माहिती दिली. त्यांचा राजीनामा आपण स्वीकारला असून, पुढच्या कारवाईसाठी राज्यपालांकडे पाठवल्याचं मुख्यमंत्र्यांनी सांगितलं. ते म्हणाले –

बाईट – मुख्यमंत्री देवेंद्र फडणवीस

 दरम्यान, नुकत्याच हाती आलेल्या माहितीनुसार राज्यपालांनी हा राजीनामा स्वीकारला आहे.

मुंडे यांनी वैद्यकीय कारणास्तव राजीनामा दिला असल्याचं म्हटलं आहे. संतोष देशमुख हत्या प्रकरणातल्या आरोपींना कठोरात कठोर शिक्षा व्हावी, ही आपली पहिल्या दिवसापासूनची ठाम मागणी असल्याचं मुंडे यांनी या संदेशात नमूद केलं आहे.

****

पर्यावरण मंत्री पंकजा मुंडे यांनी धनंजय मुंडे यांचा राजीनाम्याचा निर्णय योग्य असल्याचं म्हटलं आहे, त्या नागपुरात माध्यमांशी बोलत होत्या, धनंजय मुंडे यांनी शपथच घ्यायला नको होती, असं मत पंकजा मुंडे यांनी व्यक्त केलं, त्या म्हणाल्या –

बाईट – पंकजा मुंडे

****

संतोष देशमुख हत्येप्रकरणी पुरावे असूनही कारवाईला उशीर केल्याचा आरोप करत, मुख्यमंत्री देवेंद्र फडणवीस आणि उपमुख्यमंत्री अजित पवार यांनी राजीनामा द्यावा, अशी मागणी, महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केली आहे. मुंडे यांना बडतर्फ का केलं नाही असा प्रश्नही त्यांनी विचारला आहे.

काँग्रेस नेते नाना पटोले यांनी, मुंडे यांच्या राजीनाम्याची माहिती सदनात न देता, थेट माध्यमांना देणं हर सभागृहाचा अवमान असल्याचं म्हटलं आहे. याप्रकरणी मुख्यमंत्री फडणवीस यांच्यावर हक्कभंग आणू, असा इशारा पटोले यांनी दिला. या प्रकरणातल्या आरोपीला सरकार पाठिशी घालत असल्याचा आरोप करत, सरकारला या प्रकरणात सहआरोपी करण्याची मागणी केली.

बाईट – नाना पटोले

****

संतोष देशमुख हत्या प्रकरणाची हृदयद्रावक छायाचित्रं कालपासून प्रसारमाध्यमांवरून व्हायरल होत आहेत, या भीषण हत्याकांडाच्या निषेर्धाथ आज बीड जिल्हा बंदची हाक दिली होती. जिल्ह्यात बहुतांशी कडकडीत बंद पाळण्यात येत असल्याचं आमच्या वार्ताहरानं कळवलं आहे. या घटनेच्या निषेधार्थ नागरीकांनी बीड शहरातून निषेध फेरी काढली. केज इथं टायर जाळून निषेध नोंदवण्यात आला. काही वेळ रस्ता रोको आंदोलनही करण्यात आलं.

आमदार सुरेश धस आणि संदीप क्षीरसागर यांनी या बंदला पाठिंबा दर्शवला. या प्रकरणातल्या आरोपींना फाशीची शिक्षा देण्याची मागणी धस यांनी विधीमंडळ परिसरात वार्ताहरांशी बोलताना केली.

****

परभणी-छत्रपती संभाजीनगर-करंजगाव या रेल्वे मार्गाच्या दुहेरीकरणाच्या कामाला प्रारंभ झाल्याची माहिती, दक्षिण मध्य रेल्वेच्या नांदेड विभागीय व्यवस्थापक नीती सरकार यांनी दिली आहे. त्या आज छत्रपती संभाजीनगर इथल्या मुकुंदवाडी रेल्वे स्थानकाची भेट देऊन पाहणी केल्यानंतर बोलत होत्या. मुकुंदवाडी इथं भुयारी मार्ग करण्याचा प्रस्ताव पाठवला असल्याचंही नीती सरकार यांनी यावेळी सांगितलं. दरम्यान, जालना इथंही सरकार यांनी बैठक घेऊन चर्चा केली. जालना ते छत्रपती संभाजीनगर दरम्यानच्या स्थानकांवर मूलभूत सुविधा उपलब्ध करून देण्यात येतील, असं आश्वासन त्यांनी दिलं

****

आयसीसी अजिंक्यपद करंडक क्रिकेट स्पर्धेत आज उपांत्य फेरीच्या पहिला सामन्यात ऑस्ट्रेलियानं भारतासमोर २६५ धावांचं आव्हान ठेवलं आहे. दुबई इथं सुरू असलेल्या या सामन्यात ऑस्ट्रेलियानं नाणेफेक जिंकत, प्रथम फलंदाजीचा निर्णय घेतला. ऑस्ट्रेलियाचा संघ २६४ धावांवर सर्वबाद झाला. भारताकडून मोहम्मद शमीने तीन, रवींद्र जडेजा आणि वरुण चक्रवर्तीने प्रत्येकी दोन बळी घेतले.

****

धाराशिव तालुक्यात ढोकी इथल्या संशयित बर्ड फ्लू रुग्णाचे नमुने पुण्यातील राष्ट्रीय विषाणू परीक्षण प्रयोगशाळेत तपासणीसाठी पाठवण्यात आले होते. हा अहवाल नकारात्मक आला असून, सदरील रुग्णाला बर्ड फ्लूची लागण झालेली नसल्याचं स्पष्ट झाल्याचं, आमच्या वार्ताहरानं कळवलं आहे.

****

शेतकऱ्यांना कर्जमाफी द्यावी तसंच नुकसान भरपाई अनुदान द्यावे यासह अन्य मागण्यासाठी जालना काँग्रेस कमिटीच्यावतीनं आज जिल्हाधिकारी कार्यालयावर मोर्चा काढण्यात आला. काँग्रेस पदाधिकाऱ्यांच्या शिष्टमंडळाने जिल्हाधिकारी डॉ.श्रीकृष्ण पांचाळ यांची भेट घेऊन मागण्यांचे निवेदन सादर केलं. दरम्यान, मस्साजोगचे सरपंच संतोष देशमुख यांच्या हत्येच्या निषेधार्थ गांधीचमन चौकात सकल मराठा समाजाच्यावतीने निषेध आंदोलन करण्यात आलं.

****

लातूर शहरातील नागरिकांच्या विविध मागण्यांसाठी काँग्रेस पक्षाच्या वतीने आज घंटानाद आंदोलन करण्यात आलं. माजी मंत्री आमदार अमित देशमुख यांच्या मार्गदर्शनाने झालेल्या या आंदोलनात अनेक पदाधिकारी आणि कार्यकर्ते सहभागी झाले होते.

****

हिंगोली जिल्ह्याच्या औंढा तालुक्यातल्या सिद्धेश्वर धरणाचे चार दरवाजे आज एक फुटाने उघडण्यात आले. सध्या दोन हजार ५०० क्युसेक पाण्याचा विसर्ग नदीपात्रात करण्यात येत आहे.

****

छत्रपती संभाजीनगर जिल्ह्यात पैठणचे तहसीलदार सारंग भिकूसिंग चव्हाण आणि इतर दोघांना लाचलुचपत प्रतिबंधक विभागाच्या पथकानं एक लाख रुपये लाच घेतल्या प्रकरणी अटक केली.

****