Text - AIR News Bulletin, Aurangabad 25.07.2018 - 18.00

Regional Marathi Text Bulletin, Aurangabad

Date - 25 July 2018

Time - 18.00 to 18.05

Language Marathi

आकाशवाणी औरंगाबाद

प्रादेशिक बातम्या

दिनांक २५ जुलै २०१८ सायंकाळी ६.००

****

राफेल विमान खरेदी प्रकरणी काँग्रेसनं आज लोकसभेत पंतप्रधान नरेंद्र मोदी आणि संरक्षणमंत्री निर्मला सीतारामन यांच्याविरुद्ध हक्कभंग प्रस्ताव दाखल केला. हा प्रश्न विशेषाधिकार समितीकडे पाठवण्याची विनंती काँग्रेस नेते मल्लिकार्जुन खरगे यांनी लोकसभा अध्यक्ष सुमित्रा महाजन यांना केली, यावर, हा प्रश्न आपल्या विचाराधीन असल्याचं महाजन यांनी सांगितलं. राफेल खरेदीबाबत संसदेत दिशाभूल करणारी चुकीची माहिती सादर केल्याचं नमूद करत, काँग्रेस अध्यक्ष राहुल गांधी यांच्याविरुद्धही, भाजपा खासदार अनुराग ठाकूर यांनी हक्कभंग प्रस्ताव दाखल केला आहे.

****

मुंबई, ठाणे, पालघर आणि नवी मुंबईतलं बंद आंदोलन मागे घेतल्याचं काही वेळापूर्वी सकल मराठा क्रांती मोर्चानं एका पत्रकार परिषदेत घोषित केलं.

दरम्यान, औरंगाबाद जिल्ह्यातल्या कन्नडचे आमदार हर्षवर्धन जाधव यांनी आज मराठा आरक्षणाच्या मागणीच्या समर्थनार्थ विधानसभा सदस्यत्वाचा राजीनामा दिला. वार्ताहरांशी बोलतांना त्यांनी ही माहिती दिली. राज्य सरकारनं तात्काळ आरक्षणाचे आदेश जारी करावेत अन्यथा आपण राजीनामा देऊ असं त्यांनी काल घोषित केलं होतं.

आजच्या बंदला नाशिक जिल्ह्यात मोठा प्रतिसाद मिळाला. आंदोलकांनी ठिकठिकाणी रास्ता रोको केलं, तसंच गंगापूर धरणात मुख्यमंत्री देवेंद्र फडणवीस आणि महसूल मंत्री चंद्रकांत पाटील यांच्या प्रतिमा बुडवून जलसमाधी आंदोलन केलं. औरंगाबाद शहरात सिडको भागात बसवर दगडफेकीच्या घटना घडल्या असून, शहरात क्रांती चौकात आज सलग पाचव्या दिवशी ठिय्या आंदोलन करण्यात आलं. हिंगोली आणि जालना जिल्ह्यातही बंदला चांगला प्रतिसाद मिळाला. जालना इथं जिल्हा परिषदेसमोर मराठा क्रांती मोर्च्याच्यावतीनं धरणे आंदोलन करण्यात आलं. भोकरदन इथे आंदोलकांनी मुंडन करून घेत सरकारचा निषेध केला. अंबड तालुक्यात सोलापूर - औरंगाबाद मार्गावर रास्ता रोको करताना आंदोलकांनी टायर पेटवून दिल्यानं वाहतूक विस्कळीत झाल्याचं तसंच दोन बसेसवर दगडफेक करण्यात आल्याचं आमच्या वार्ताहरानं कळवलं आहे. परभणी जिल्ह्यातही बससेवा बंदच होती. अहमदनगर जिल्ह्यातल्या कर्जत इथं आंदोलकांनी वन विभागाची गाडी पेटवली. साताऱ्यात आंदोलकांनी दगडफेक आणि तोडफोड केल्यानंतर पोलिसांनी अश्रुधुराचा वापर केला. यावेळी झालेल्या गोंधळात पोलिस अधीक्षकांसह पाच पोलिस कर्मचारी जखमी झाले. यावेळी पुणे - बेंगलोर महामार्गावरची वाहतूक बंद झाली होती. वाशिम जिल्ह्यात बंदसह चक्काजाम करण्यात आलं. धुळे शहरात सरकार आणि निष्क्रीय १४७ मराठा आमदारांची प्रतिकात्मक शवयात्रा काढण्यात आली. यावेळी धुळे जिल्हाधिकारी कार्यालयाच्या इमारतीवर चढून जितेंद्र जांभळे या तरुणानं आत्महत्येचा प्रयत्न केला, मात्र पोलिसांनी त्याला ताब्यात घेतलं.

दरम्यान, मुख्यमंत्री देवेंद्र फडणवीस यांच्या वक्तव्यामुळे राज्यातली परिस्थिती चिघळल्याचा आरोप करत, राज्यपालांनी मुख्यमंत्र्यांचा राजीनामा घ्यावा, तसंच त्यांच्यावर गुन्हा दाखल करण्यात यावा, अशी मागणी संभाजी ब्रिगेडचे प्रदेशाध्यक्ष मनोज आखरे यांनी केली. प्रवरासंगम इथल्या पुलाचं, काकासाहेब शिंदे पूल, असं नामकरण करणार असल्याचंही आखरे यांनी म्हटलं.

****

सकल मराठा समाजाच्यावतीनं राज्यात काढण्यात आलेल्या शांततापूर्ण मोर्चांनंतर, राज्य सरकारनं त्याची दखल घेत विविध प्रकारचे निर्णय घेतले असून आजही सकल मराठा समाजाशी चर्चा करण्यास राज्य सरकार तयार आहे, असं मुख्यमंत्री देवेंद्र फडणवीस यांनी एका निवेदनात म्हटलं आहे. आरक्षणाचा प्रश्न सध्या न्यायप्रविष्ट असल्याचं सांगत, राज्य सरकार आपल्या अधिकारातल्या सगळ्या बाबी पूर्ण करण्याचा प्रामाणिकपणे प्रयत्न करीत आहे, असं मुख्यमंत्र्यांनी म्हटलं आहे. हिंसा किंवा आंदोलनाचा अवलंब न करता शासनाशी चर्चा करावी, असं आवाहनही मुख्यमंत्र्यांनी केलं आहे.

****

जालना जिल्ह्यातले परतूरचे माजी आमदार वैजनाथराव आकात यांचं आज दीर्घ आजारानं निधन झालं. ते ८९ वर्षांचे होते. १९८५ मध्ये परतूर मतदारसंघातून काँग्रेस पक्षाचे सदस्य म्हणून ते विधानसभेवर निवडून आले होते. त्यांच्यावर उद्या परतूर इथं अंत्यसंस्कार करण्यात येणार आहेत.

****