आकाशवाणी छत्रपती संभाजीनगर – दिनांक 30.09.2026 रोजीचे सकाळी 11.00 वाजेचे मराठी बातमीपत्र

 Regional Marathi Text Bulletin, Chhatrapati Sambhajinagar

Date 30 September 2026

Time 11.00 to 11.05 AM

Language Marathi

आकाशवाणी छत्रपती संभाजीनगर

प्रादेशिक बातम्या

दिनांक ३० सप्टेंबर २०२६ सकाळी ११.०० वाजता

****

जपानमध्ये सुरु असलेल्या आशियाई क्रीडा स्पर्धेत भारताने आज तीरंदाजीत दोन सुवर्ण पदकांची कमाई केली. महिला कंपाउंड सांघिक प्रकारात ज्योती सुरेखा वेण्णम, चिकिता तनिपार्थी आणि प्रथिका प्रदीप यांच्या संघाने चीनचा २३८-२३४ असा पराभव करत सुवर्ण पदकाला गवसणी घातली. तसंच साहिल जाधव-चिकिता तनिपार्थी यांच्या मिश्र कंपाउंप जोडीनेही दक्षिण कोरियाचा पराभव करत सुवर्ण पदक पटकावलं.

स्क्वॅशमध्ये महिला संघाने सिंगापूरचा दो - शून्य असा पराभव करत उपान्त्य फेरीत प्रवेश केला. कुस्तीमध्ये पुरुषांच्या ८७ किलो वजनी गटात सुनील कुमारनेही उपान्त्य फेरी गाठली.

भारत आता या स्पर्धेत आठ सुवर्ण, २१ रौप्य आणि २६ कांस्य पदकांसह ५५ पदकं जिंकून दहाव्या स्थानावर आहे. 

****

विकसित भारताच्या जडणघडणीत आशय निर्मिती क्षेत्र आणि कृत्रिम बुद्धिमत्तेची भूमिका महत्त्वाची असल्याचं केंद्रीय माहिती आणि प्रसारण राज्यमंत्री डॉ. एल. मुरुगन यांनी म्हटलं आहे. नवी दिल्ली इथं आयोजित ‘यूट्यूब इम्पॅक्ट समिट २०२६’ला संबोधित करताना ते काल बोलत होते. देशाच्या आर्थिक विकासाला, रोजगाराला आणि जागतिक स्तरावर सांस्कृतिक प्रसाराला चालना देण्यात भारताच्या डिजिटल आणि सर्जनशील अर्थव्यवस्थेची भूमिका वाढत असल्याचं मुरुगन यांनी अधोरेखित केलं. युवा आशय निर्मात्यांनी कृत्रिम बुद्धिमत्तेचा उपयोग नवोन्मेष आणि सक्षमीकरणाचं साधन म्हणून करावा, असं आवाहन त्यांनी केलं.

****

राज्याची अर्थव्यवस्था एक ट्रिलियन डॉलरपर्यंत नेण्याच्या उद्दिष्टात सर्वांगीण आर्थिक विकासाला चालना देणाऱ्या गुणवत्तापूर्ण पायाभूत सुविधांची निर्मिती करावी, असं प्रतिपादन सार्वजनिक बांधकाम मंत्री शिवेंद्रसिंह राजे भोसले यांनी केलं. सार्वजनिक बांधकाम विभागाच्या वतीनं अभियंता दिन २०२६ निमित्त गेल्या दोन वर्षांत उल्लेखनीय कामगिरी करणाऱ्या अभियंते आणि कर्मचाऱ्यांचा काल मुंबईत गौरव करण्यात आला, त्यावेळी ते बोलत होते. राज्याच्या आर्थिक विकासासाठी सक्षम पायाभूत सुविधांची आवश्यकता असून, सार्वजनिक बांधकाम विभागानं दर्जा, वेळ आणि कार्यक्षमता यांना प्राधान्य देत काम करावं, असंही त्यांनी नमूद केलं.

****

विमुक्त जाती आणि भटक्या जमातींच्या नागरिकांना आवश्यक ओळखपत्रं तसंच प्रमाणपत्रं सुलभतेने उपलब्ध करून देण्यासाठी राष्ट्रनेता ते राष्ट्रपिता विशेष  अभियानांतर्गत ‘भटके-विमुक्त हक्क आणि प्रमाणपत्र अभियान’ राबवण्यात आलं. याशिवाय ‘सेवा संकल्प अभियानात आतापर्यंत राज्यभर चार हजार ५८९ प्रमाणपत्रे आणि कागदपत्रांचं वितरण करण्यात आल्याची माहिती इतर मागास बहुजन कल्याण मंत्री अतुल सावे यांनी दिली. राज्यभरात याअंतर्गत ९८ ठिकाणी विशेष शिबिरं घेण्यात आली.

****

नाशिकमध्ये कांदा खरेदीतल्या अनियमिततेच्या चौकशीसाठी जिल्हाधिकाऱ्यांच्या अध्यक्षतेखाली चौकशी समिती गठित करण्यात आली आहे. केंद्र शासनाच्या ग्राहक व्यवहार, अन्न आणि सार्वजनिक वितरण मंत्रालयामार्फत किंमत स्थिरीकरण निधी योजनेंतर्गत नाफेड आणि एनसीसीएफ या केंद्रीय नोडल संस्थांच्या माध्यमातून २०२६-२७ साठी कांदा खरेदी प्रक्रिया राबवण्यात येत आहे. या प्रक्रियेदरम्यान अनियमितता अथवा गैरव्यवस्थापन झाल्याबाबत लोकप्रतिनिधी, कांदा उत्पादक शेतकरी तसंच शेतकरी उत्पादक संघटनांकडून शासनाकडे तक्रारी प्राप्त झाल्या आहेत. या पार्श्वभूमीवर ही चौकशी करण्यात येणार आहे.

****

नाशिक जिल्ह्यात त्र्यंबकेश्वर इथल्या तीर्थराज कुशावर्त भाविकांसाठी आजपासून महिनाभरासाठी बंद राहणार आहे. पुरातत्व विभागाकडून ऐतिहासिक वारसा, जतन-संवर्धनासाठी विविध नूतनीकरण आणि देखभाल दुरुस्तीची कामं हाती घेतली जाणार असल्याची माहिती, जिल्हाधिकारी आयुष प्रसाद यांनी दिली.

****

औरंगाबाद विभाग पदवीधर मतदारसंघासाठी लातूर जिल्ह्यात ८३ प्रारूप मतदान केंद्रे प्रस्तावित करण्यात आली आहेत. या मतदान केंद्रांबाबत मान्यताप्राप्त राजकीय पक्षांच्या प्रतिनिधींची बैठक काल जिल्हाधिकारी तथा जिल्हा निवडणूक अधिकारी डॉ. भारत बास्टेवाड यांच्या अध्यक्षतेखाली झाली. या प्रारूप मतदान केंद्रांबाबत हरकती किंवा सूचना असल्यास त्या विहित मुदतीत सादर करण्याचं आवाहन करण्यात आलं आहे.

****

आगामी सण उत्सवांच्या काळात प्रवाशांची होणारी गर्दी लक्षात घेत दक्षिण मध्य रेल्वे काही विशेष गाड्या चालवणार आहे. यामध्ये नांदेड-दिल्ली-नांदेड, जालना-छपरा-जालना आणि नांदेड-उधना-नांदेड या गाड्यांचा समावेश आहे.

दरम्यान, हडपसर-घोरपडी दरम्यान तिसऱ्या रेल्वे मार्गाच्या कामामुळे बीडहून पुणे जंक्शनला जाणारी आणि पुणे जंक्शनहून बीडला येणारी रेल्वेसेवा तीन ऑक्टोबरला रद्द करण्यात आली आहे.

****